ဥရောပရှိ ကန်စစ်ဘက်စခန်းများ လုံခြုံရေးသတိပေးချက်ထုတ်ပြန်

'ဥရောပမှာရှိတဲ့အမေရိကန်စစ်ဘက်ပုဂ္ဂိုလ်တွေနဲ့ စစ်အခြေစိုက်စခန်းတွေ အကြမ်းဖက်တိုက်ခိုက်ခံရနိုင်ခြေရှိနေတယ်' ဆိုတဲ့ထောက်လှမ်းရေးသတင်းတွေကြောင့် လုံခြုံရေးသတိပေးချက်တွေ ထုတ်ပြန်ထားပါတယ်။ စစ်စခန်းတွေမှာ Force Protection Condition ကာကွယ်ရေးသတိပေးချက်တွေထုတ်ပြန်ထားတယ်လို့ အမေရိကန်-ဥရောပ စစ်အခြေစိုက်စခန်း EUCOM ကအမေရိကန် ကာကွယ်ရေးအရာရှိတဦးက ဗွီအိုအေကို တနင်္လာနေ့မှာ အတည်ပြုပြောဆိုပါတယ်။

ထောက်လှမ်းရေးသတင်းပါအချက်တွေနဲ့ပတ်သက်လို့တော့ အဲဒီအရာရှိက ပြောမသွားပါဘူး။ နိုင်ငံအတော်များများက အကြမ်းဖက်မှုတန်ပြန်ခြေမှုန်းရေးအရာရှိတွေကလည်း မကြာခင်ကျင်းပတော့မယ့် ပြင်သစ်အိုလံပစ်ပွဲတော်ကာလတဝိုက်နဲ့ စစ်အခြေစိုက်စခန်းတွေအပေါ် ခြိမ်းခြောက်မှုတွေတိုးလာတယ်လို့ သတိပေးထားတာပါ။ EUCOM က တနင်္လာနေ့ထုတ်ပြန်ချက်မှာတော့ ခြိမ်းခြောက်မှုတခုတည်းကြောင့်မဟုတ်ဘဲ ဘက်ပေါင်းစုံအခြေအနေတွေကိုထည့်သွင်းစဥ်းစားပြီးမှ ခုလို လုံခြုံရေးတိုးမြှင့်ထားရတာဖြစ်တယ်လို့ ဖော်ပြထားပါတယ်။

ဥရောပဖလားနဲ့ အိုလံပစ်အားကစားပွဲတော်အပါအဝင် လူတွေလာရောက်စုဝေးကြမယ့် ပွဲတော်တွေရှိနေသလို ဥရောပစစ်ဘက်အခြေစိုက်စခန်းအတော်များများမှာ ခြိမ်းခြောက်မှုတွေတိုးလာတဲ့အတွက်လုံခြုံရေးတိုးမြှင့်ခဲ့တာဖြစ်တယ်လို့ ကြေညာချက်မှာ ပြောထားပါတယ်။ အမေရိကန်ကာကွယ်ရေးအရာရှိကလည်း စစ်ဘက်တပ်ဖွဲ့ဝင်တွေအနေနဲ့ အလုပ်ချိန်မှာရော အားလပ်ချိန်မှာပါ သတိမပြတ်ထားဖို့ ပိုမို ဆောင်ရွက်ထားကြတယ်လို့ ပြောပါတယ်။

ပြီးခဲ့တဲ့လက Recorded Future ဆိုင်ဘာလုံခြုံရေးအဖွဲ့က ထုတ်ပြန်တဲ့အစီရင်ခံစာမှာတော့ ကွန်ပျူတာစနစ်တွေထဲ ထိုးဖောက်တိုက်ခိုက်ခံရနိုင်ခြေတိုးလာနေတဲ့အပြင် ပြင်သစ်အိုလံပစ်ပွဲအတွက် အကြီးဆုံးခြိမ်းခြောက်မှုအဖြစ် အကြမ်းဖက်တိုက်ခိုက်မှုတွေ ဖြစ်လာနိုင်ခြေရှိတာကို ဖော်ပြထားပါတယ်။

ဥရောပရှိ ကန်စစ်ဖက်စခန်းများ လုံခြုံရေးသတိပေးချက်ထုတ်ပြန်