VOA အမေရိကန်အသံ သတင်းဌာန

VOA အမေရိကန်အသံ သတင်းဌာနသည် သတင်းလွတ်လပ်ခွင့်မရှိသော၊ သတင်းလွတ်လပ်ခွင့်များကို ကန့်သတ် ချုပ်ခြယ်နေသော ကမ္ဘာ့နေရာ ဒေသများရှိ ပြည်သူများထံသို့ ဘာသာစကားပေါင်း ၄၅ မျိုးကျော်ဖြင့် မီဒီယာလိုင်းပေါင်းစုံမှ အသံလွှင့်ပေးနေသည့် ကမ္ဘာ့အကြီးဆုံး Multi-Media နိုင်ငံတကာ သတင်းဌာနကြီးဖြစ်သည်။ ၁၉၄၂ ခုနှစ်တွင် စတင်ထူထောင်ခဲ့သည့် VOA သည် လွတ်လပ်၊ မျှတ၊ မှန်ကန်၊ ပြည့်စုံသည့်သတင်းများ တင်ဆက်ပေးနေပါသည်။ VOA သည် အမေရိကန်ပြည်သူတို့၏ အခွန်ငွေဖြင့် ထောက်ပံ့ ထူထောင်ထားသည့် US Agency for Global Media (USAGM) ကမ္ဘာလုံးဆိုင်ရာ အမေရိကန်မီဒီယာအေဂျင်စီ အဖွဲ့ကြီး၏ အစိတ်အပိုင်း တခုဖြစ်သည်။

VOA ၏ ရည်မှန်းချက်နှင့် သတင်းဖော်ပြပိုင်ခွင့် လွတ်လပ်မှုကို အမေရိကန်ဥပဒေများဖြင့် အာမခံ အကာကွယ်ပေးထားသည်။ VOA သတင်းထောက်များအား အစိုးရအဖွ့ဲအစည်းများ၊ နိုင်ငံရေးလောကအဖွဲ့အစည်းများက သြဇာလွှမ်းမိုးခြင်း၊ ဖိအားပေးခြင်း၊ ကလဲ့စားခြေ တုန့်ပြန်ခြင်းများ မရှိစေရန်လည်း အဆိုပါဥပဒေများက အကာကွယ်ပေးထားသည်။

၁၉၇၆ ခုနှစ်တွင်အမေရိကန်သမ္မတ Gerald R. Ford လက်မှတ်ရေးထိုးခဲ့သည့် VOA Charter ခေါ်၊ VOA ပဋိဉာဏ်စာတမ်းတွင် ဖော်ပြထားသည်မှာ -

၁။ VOA သည် တိကျခိုင်မာသည့်၊ ယုံကြည်အားကိုးရသည့် သတင်းဌာနတခုအဖြစ် စဉ်ဆက်မပြတ် ရပ်တည်ရမည်။ VOA သတင်းများသည် တိကျ၊ မှန်ကန်၊ ပြည့်စုံသည့်အပြင် ဘက်လိုက်မှုကင်းရှင်းရမည်။

၂။ VOA သည် အမေရိကန်ပြည်ထောင်စုကို ကိုယ်စားပြုသည်။ သို့ရာတွင် အမေရိကန် လူ့အသိုင်းအဝိုင်း၏ အစိတ်အပိုင်း တခုတည်းကိုသာ ကိုယ်စားပြုသည်မဟုတ်ဘဲ အမေရိကန် လူ့အသိုင်းအဝိုင်းကြီးတခုလုံး၏ အတွေးအမြင်များ၊ အခြေပြုရပ်တည်မှုများအားလုံးကို လွှမ်းခြုံဘက်ညီစွာ ကိုယ်စားပြုခြင်းဖြစ်သည်။

၃။ VOA သည် အမေရိကန်ပြည်ထောင်စု၏ မူဝါဒဆိုင်ရာများကို ရှင်းလင်း၊ ပြတ်သားစွာ တင်ပြဖော်ထုတ်ရမည်။ အလားတူပင် အဆိုပါ မူဝါဒများနှင့်ပတ်သက်၍ တာဝန်ခံမှုအပြည့်ရှိသည့် အပြန်အလှန်ဆွေးနွေးပြောဆိုမှုများ၊ ထင်မြင်ယူဆချက်များကိုလည်း ဖော်ပြရမည်။

၁၉၉၄ ခုနှစ်တွင်လည်း အမေရိကန်ပြည်ထောင်စုလွှတ်တော်က US International Broadcasting Act ခေါ် အမေရိကန်ပြည်ထောင်စု နိုင်ငံတကာ အသံလွှင့်ဥပဒေကို အတည်ပြုပြဌာန်းပေးခဲ့သည်။ အဆိုပါဥပဒေအရ VOA သတင်းထောက်များအနေဖြင့် တိကျ၊ ပြည့်စုံ၊ မျှတပြီး ယုံကြည်စိတ်ချရသောသတင်းများ စုဆောင်းတင်ပြရန်အပြင် အမေရိကန်ပြည်ထောင်စု၏ အမျိုးမျိုး အဖုံဖုံသော လူမှုရေးနှင့်ယဉ်ကျေးမှု အသိုင်းအဝိုင်းတရပ်လုံးကို ကိုယ်စားပြုရန် သတ်မှတ်ပြဌာန်းထားသည်။

၂၀၁၆ ခုနှစ်တွင်လည်း အမေရိကန်ပြည်ထောင်စုလွှတ်တော်က National Defense Authorization Act ခေါ် အမျိုးသားကာကွယ်ရေး အခွင့်အာဏာဥပဒေကို အတည်ပြုပြဌာန်းပေးခဲ့ပြီး VOA သတင်းစုဆောင်းမှုနှင့် တင်ပြမှုများ သီးခြားလွတ်လပ်ခွင့်နှင့် ဘက်လိုက်မှုမရှိစေရေး ဆက်လက်ထောက်ခံ ဆောင်ရွက်ပေးခဲ့သည်။

VOA သတင်းထောက်များသည် ကမ္ဘာ့သတင်းလွတ်လပ်ခွင့် အခြေခံများ၏ စံနမူနာပြအဖြစ် နေ့စဉ် ကြိုးစားဆောင်ရွက်လျက်ရှိသည်။

VOA အမေရိကန်အသံ

“မရှိမဖြစ် သတင်းလွတ်လပ်ခွင့်"