တောင်တရုတ်ပင်လယ်အရေး တရုတ်နဲ့ ဖိလစ်ပိုင် ဆွေးနွေး

တောင်တရုတ်ပင်လယ်ထဲမှာ ရေနယ်နိမိတ်ပိုင်ဆိုင်မှု အငြင်းပွားနေတဲ့ ဖိလစ်ပိုင်နဲ့ တရုတ် ၂ နိုင်ငံ နိုင်ငံခြားရေးဝန်ကြီးတွေ ဆွေးနွေးခဲ့ကြပါတယ်။ တရုတ်နိုင်ငံခြားရေးဝန်ကြီး Wang Yi နဲ့ ပွင့်ပွင်းလင်းလင်း ဆွေးနွေးခဲ့တယ်လို့ ဖိလစ်ပိုင်နိုင်ငံခြားရေးဝန်ကြီး Enrique Manalo က ဒီနေ့ကြေညာချက်ထုတ်ပြန်ပါတယ်။ တောင်တရုတ်ပင်လယ်ထဲမှာ ဖြစ်နေတဲ့ တင်းမာမှုတွေကို ဖြေရှင်းအတွက် ဆွေးနွေးအဖြေရှာဖို့ လိုအပ်တယ်ဆိုတာ ၂ ဘက်လုံး လက်ခံကြတယ်လို့ သူ့ရဲ့ ထုတ်ပြန်ချက်မှာ ပြောထားပါတယ်။

တရုတ်နိုင်ငံခြားရေးဌာနရဲ့ ထုတ်ပြန်ချက်မှာတော့ တရုတ်နဲ့ ဖိလစ်ပိုင်ကြား ကြုံနေတဲ့ လေးနက်တဲ့ပြဿနာတွေကို ဖိလစ်ပိုင်အနေနဲ့ သတိထားကိုင်တွယ်ရမယ်လို့ ဝန်ကြီး Wang Yi ကသတိပေးပါတယ်။ တရုတ်အနေနဲ့ ကိုယ့်ပိုင်နက်ကို ခုခံကာကွယ်ဖို့ ပြတ်ပြတ်သားသား တုံ့ပြန်တာမျိုး မခံရအောင် ဖိလစ်ပိုင်ဘက်က အတွက်မမှားဖို့လိုတယ်လို့လည်း ဝန်ကြီး Wang Yi ကသတိပေးထားပါတယ်။ ၂ နိုင်ငံဆက်ဆံရေးဟာ ဘယ်လမ်းရွေးမလဲဆိုတဲ့ အခြေအနေကိုရောက်နေပြီး သူ့အဆို ဖိလစ်ပိုင်ဘက်က ပင်လယ်ထဲမှာ ရန်စတဲ့လုပ်ရပ်မှန်သမျှက တရုတ်နိုင်ငံရဲ့ အခွင့်အရေးကို လျှော့တွက်ရာရောက်တယ်လို့ ဆိုထားပါတယ်။

ဆက်စပ်ဖတ်ရှုစရာ

၇ နိုင်ငံပူးတွဲ ဂဠုန်စစ်ရေးလေ့ကျင့်မှု အင်ဒိုနီးရှားမှာ စတင်တရုတ်နဲ့ ပိုင်ဆိုင်မှုအငြင်းပွားရေပြင်မှာ အင်ဒိုနီးရှားဓာတ်ငွေ့တူးဖော်မည် တောင်တရုတ် ပင်လယ်တွင်း တရုတ်နဲ့ဗီယက်နမ် ဆက်ဆံရေးတင်းမာ

တောင်တရုတ်ပင်လယ်ထဲမှာ တရုတ်ရော ဖိလစ်ပိုင်ကပါ သူတို့ပိုင်ဆိုင်တယ်လို့ ပြောနေတဲ့ ရေနယ်နိမိတ်နေရာတချို့မှာ အခုလပိုင်းတွေအတွင်း ဖိလစ်ပိုင်ငါးဖမ်းသင်္ဘောတွေ၊ အစိုးရသင်္ဘောတွေ၊ ကမ်းရိုးတမ်းစောင့်တပ်တွေနဲ့ တရုတ်စစ်သင်္ဘောတွေကြား ထိပ်တိုက်ပြဿနာဖြစ်မှုတွေ ခပ်စိပ်စိပ်ဖြစ်နေပါတယ်။

တောင်တရုတ်ပင်လယ်အရေး တရုတ်နဲ့ ဖိလစ်ပိုင် ဆွေးနွေး