အာဆီယံ သြစတြေးလျ ထိပ်သီးအစည်းအဝေးမှာ မြန်မာ့အရေးဆွေးနွေးဖို့ HRW တိုက်တွန်း

အာဆီယံခေါင်းဆောင်တွေနဲ့ ဩစတြေးလျအစိုးရတို့အနေနဲ့ မြန်မာနိုင်ငံအတွင်းဖြစ်ပေါ်နေတဲ့ ပဋိပက္ခနဲ့ တခြား ဒေသတွင်း ပြဿနာတွေကို ကိုင်တွယ် ဖြေရှင်းကြဖို့ လိုအပ်ကြောင်း HRW လူ့အခွင့်အရေးစောင့်ကြည့်ရေးအဖွဲ့က ပြောကြားလိုက်ပါတယ်။​ ဩစတြေးလျဝန်ကြီးချုပ် Anthony Albanese က အာဆီယံ ၉ နိုင်ငံက ခေါင်းဆောင်တွေကို ဖိတ်ကြားပြီး မတ်လ ၄ ရက်ကနေ ၆ ရက်နေ့အထိ အာဆီယံ-ဩစတြေးလျ အထူး ထိပ်သီးစည်းဝေးပွဲကို လက်ခံကျင်းပဖို့ ရှိနေတဲ့အချိန်မှာ HRW က အခုလို တောင်းဆိုချက် ထုတ်ပြန်လိုက်တာပါ။

နိုင်ငံရေးအရ စစ်ကောင်စီကို ကိုယ်စားပြုတဲ့ ကိုယ်စားလှယ်ကို အာဆီယံရဲ့ အရေးပါတဲ့ ထိပ်သီး စည်းဝေးပွဲတွေမှာ ဖိတ်ကြားခြင်း မပြုဖို့ အာဆီယံက ဆုံးဖြတ်ထားတာနဲ့အညီ အခု ဩစတြေးလျနဲ့ ပြုလုပ်မယ့် အထူး ထိပ်သီး စည်းဝေးပွဲမှာလည်း အိမ်ရှင် ဩစတြေးလျက အာဆီယံ ၉ နိုင်ငံက ခေါင်းဆောင်တွေကိုဘဲ ဖိတ်ကြားတာ ဖြစ်နိုင်ပါတယ်။

မြန်မာနိုင်ငံမှာ စစ်အာဏာသိမ်းပြီးတဲ့နောက်ပိုင်း ယိုယွင်း ဆုတ်ယုတ်လာနေတဲ့ စာနာမှုဆိုင်ရာ အကျပ်အတည်းတွေနဲ့ လူ့အခွင့်အရေး ချိုးဖောက်မှုတွေကို အာဆီယံအနေနဲ့ ကိုင်တွယ် ဖြေရှင်းခြင်းမရှိကြောင်း၊ အဲဒီရဲ့ အကျိုးဆက်တွေဟာ အိမ်နီးချင်း ထိုင်း၊ အိန္ဒိယနဲ့ တရုတ်နိုင်ငံတို့ကိုပါ သက်ရောက်မှုတွေ ရှိလာနေကြာင်း HRW က ထုတ်ပြန်တဲ့ စာမျက်နှာ ၆၀ ပါ အရှေ့တောင်အာရှ လူ့အခွင့်အရေး အစီရင်ခံစာမှာ ဖော်ပြထားပါတယ်။​ ဒါ့အပြင် ၂၀၁၇ ခုနှစ်ကတည်းက ဘင်္ဂလားဒေ့ရှ်နိုင်ငံကို ထွက်ပြေးသွားကြရတဲ့ ရိုဟင်ဂျာ ဒုက္ခသည်တွေဟာလည်း အခုချိန်ထိ နေရပ်ကို မပြန်နိုင်ကြသေးကြောင်းလည်း အစီရင်ခံစာမှာ ဖော်ပြထားပါတယ်။​

၂၀၂၁ ခုနှစ်၊ ဧပြီလမှာ ချမှတ်ခဲ့တဲ့ အချက် (၅) ချက်ပါ အာဆီယံ ဘုံသဘောတူညီချက်ဟာလည်း မြန်မာစစ်ကောင်စီက ကျူးလွန်နေတဲ့ လူ့အခွင့်အရေးနဲ့ စစ်ရာဇဝတ်မှုတွေကို ကိုင်တွယ် ဖြေရှင်းဖို့ ဘယ်လိုမှ အလုပ်မဖြစ်နိုင်ဘူးလို့ HRW က ဆိုပါတယ်။​

အာဆီယံအလံ

မြန်မာနိုင်ငံကို လေယာဉ်ဆီ တင်ပို့ရောင်းချသူတွေကို ကိုယ့်နိုင်ငံအသီးသီးမှာ ဒဏ်ခတ် အရေးယူတာအပါအဝင် မြန်မာစစ်ကောင်စီအပေါ် အရေးယူမှုတွေ ချမှတ် ဆောင်ရွက်ကြဖို့ အာဆီယံနဲ့ ဩစတြေးလျ အစိုးရတို့အကြား သဘောတူညီချက် ချမှတ်ကြဖို့ လိုအပ်တယ်လို့ HRW လူ့အခွင့်အရေးစောင့်ကြည့်ရေးအဖွဲ့က ပြောပါတယ်။​

အာဆီယံ သြစတြေးလျ ထိပ်သီးအစည်းအဝေးမှာ မြန်မာ့အရေးဆွေးနွေးဖို့ HRW တိုက်တွန်း