ဂါဇာတိုက်ပွဲကြား ဆေးရုံက ကလေးတွေ ကယ်ထုတ်ဖို့စီစဉ်

အစ္စရေးနဲ့ Hamas စစ်ပွဲဖြစ်နေတဲ့ ဂါဇာဒေသမှာ မြေပြင်တိုက်ပွဲတွေနဲ့ လေကြောင်းတိုက်ခိုက်မှုတွေ ညဘက်မှာ ဆက်လက် ဖြစ်ပွားခဲ့ပါတယ်။ ဂါဇာဒေသမှာ အကြီးဆုံးဖြစ်တဲ့ Shifa ဆေးရုံကိုလည်း လုံးဝပိတ်ဆို့ဝိုင်းရံခံထားရကြောင်း ညွှန်ကြားရေးမှူး Mohammad Abu Salmiya က မနေ့နှောင်းပိုင်းမှာပဲ ပြောခဲ့တာပါ။

အစ္စရေးစစ်တပ်ကတော့ စာနာမှုပြဿနာ အကြီးအကျယ် ကြုံနေရတဲ့ Shifa ဆေးရုံကနေ ဒီကနေ့ ကလေးတွေကို ဘေးလွတ်ရာ ကယ်ထုတ်နိုင်အောင် ကူညီမယ်လို့ ပြောပါတယ်။ ဆေးရုံမှာသုံးနေတဲ့ မီးစက်အတွက် စက်သုံးဆီပြတ်လပ်ခဲ့ရာက မနေ့တုန်းက ကလေးငယ် ၂ ယောက် သေဆုံးခဲ့ပြီး၊ နောက်ထပ်လည်း အသက်အန္တရာယ် ထိခိုက်မဲ့ အခြေအနေနဲ့ ရင်ဆိုင်နေရတာပါ။ ညဘက်မှာ တိုက်ပွဲတွေ ဆက်ဖြစ်နေတာကြောင့် ကလေးတွေကို ဘေးလွတ်ရာ ကယ်ထုတ်မယ့် အစီအစဉ် အထမြောက် မမြောက်ဆိုတာလည်း ရှင်းရှင်းလင်းလင်း မသိရပဲ ဖြစ်နေပါတယ်။

အစ္စရေး ဝန်ကြီးချုပ် Benjamin Netanyahu ကတော့ အောက်တိုဘာလ ၇ ရက်နေ့က ဟားမတ်တိုက်ခိုက်မှုအတွင်း ဖမ်းဆီးသွားတဲ့ ဓားစာခံတွေ ပြန်လွှတ်မယ့် အစီအစဉ် မပါဘဲ အပစ်အခတ် ရပ်စဲရေး မလုပ်နိုင်ဘူးလို့ တစိုက်မတ်မတ် ငြင်းဆန်ထားပါတယ်။ ဂါဇာမှာရှိတဲ့ ဆေးရုံတွေ ဗုံးဒဏ်အပြင်းအထန် ခံနေရတယ်လို့လည်း ပြင်သစ်နိုင်ငံ အခြေစိုက် နယ်စည်းမခြား ဆရာဝန်များအဖွဲ့ (MSF) ကပြောပါတယ်။

ဂါဇာတိုက်ပွဲကြား ဆေးရုံက ကလေးတွေ ကယ်ထုတ်ဖို့စီစဉ်