အမေရိကန်သမ္မတ Joe Biden နဲ့ တရုတ်သမ္မတ Xi Jinping တို့ ရှေ့တပတ်ထဲ တွေ့ဆုံမယ်လို့ မျှော်လင့်ရတဲ့ အမေရိကန် အနောက်ဘက်ခြမ်း ဆန်ဖရန်စစ္စကိုမြို့မှာ ကျင်းပမယ့် APEC အာရှပစိဖိတ် စီးပွားရေးပူပေါင်းဆောင်ရွက်မှု ဆွေးနွေးပွဲမတိုင်ခင် တရုတ် ဒုဝန်ကြီးချုပ် He Lifeng နဲ့ အမေရိကန်ဘဏ္ဍာရေးဝန်ကြီး Janet Yellen တို့ရဲ့ ၂ ရက်တာ တွေ့ဆုံဆွေးနွေးပွဲကို ကြာသပတေးနေ့မှာ စတင်လိုက်ပါတယ်။
ဒီတွေ့ဆုံမှုက တရုတ်−အမေရိကန် ဆက်ဆံရေး တင်းမာနေတာကို ဖြေလျော့ရေးနဲ့ ကာကွယ်ရေး၊ ကုန်သွယ်ရေး ၊ ဥတုရာသီ ဖေါက်ပြန်ပြောင်းလဲမှု ကိစ္စရပ်တွေမှာပါ ဆွေးနွေးသွားနိုင်ဖို့ လမ်းကြောင်း ဆက်ဖွင့်ထားနိုင်ရေးအတွက် ရည်ရွယ်ပုံရပါတယ်။
ဘဏ္ဍာရေးဝန်ကြီး Yellen နဲ့ တရုတ်ဒုဝန်ကြီးချုပ် Lifeng တို့ ကြာသပတေးနဲ့ သောကြာ ၂ ရက်ကြာ တွေ့ဆုံမှုပြီးရင်တော့ ရှေ့တပတ်ထဲ ဆန်ဖရန်စစ္စကိုမှာ ကျင်းပမယ့် APEC ဖိုရမ်ရဲ့ ဘေးပန်းမှာ သမ္မတ Biden နဲ့ သမ္မတ Xi Jinping တို့ သီးသန့် တွေ့ဆုံကြလိမ့်မယ်လို့ မျှော်လင့်ရပါတယ်။
တရုတ်ဒုဝန်ကြီးချုပ် Lifeng နဲ့ အမေရိကန်ဝန်ကြီး Yellen တို့ အခုတခေါက်တွေ့ဆုံမှုက အမေရိကန်−တရုတ် သမ္မတ ၂ ဦးတွေ့ဆုံကြမယ့်ပွဲ ပျက်မသွားရအောင်လို့ အခိုင်အမာဖြစ်စေရေး ညှိနှိုင်းတဲ့သဘောလို့ အကဲခတ်တွေက သုံးသပ်ပါတယ်။
အမေရိကန်ပြည်ထောင်စုဟာ တရုတ်ကို ဆန့်ကျင်လမ်းခွဲသွားဖို့ ရည်ရွယ်ချက်မရှိပေမယ့် အမေရိကန်ကုမ္ပဏီတွေနဲ့ လုပ်သားတွေရဲ့ စီးပွားရေးဈေးကွက်ထဲ မျှတစွာပြိုင်ဆိုင်မှုကို တားမြစ်လာတာမျိုးလုပ်လာရင်တော့ တရုတ်တို့နဲ့ တိုက်ရိုက်ပြောဆိုရလိမ့်မယ်လို့ တရုတ် ဒုဝန်ကြီးချုပ်နဲ့ ကြာသပတေးနေ့ တွေ့ဆုံမှုမတိုင်ခင် အမေရိကန်ဝန်ကြီး Yellen က ပြောကြားခဲ့ပါတယ်။
