မြန်မာနိုင်ငံတွင်း ပဋိပက္ခတွေကြားထဲ အမျိုးသမီးတွေ၊ မိန်းကလေးငယ်တွေဟာ လိင်ပိုင်းဆိုင်ရာအကြမ်းဖက်မှုခံရနိုင်ခြေ များလာပြီး မျိုးဆက်ပွားကျန်းမာရေးဆိုင်ရာ အထောက်အပံ့ဝန်ဆောင်မှုရပိုင်ခွင့်တွေ ဆုံးရှုံးလာတယ်လို့ UNFPA ကုလသမဂ္ဂ လူဦးရေ ရံပုံငွေအဖွဲ့က ထုတ်ပြန်ပါတယ်။
စစ်တပ်ကအာဏာသိမ်းပြီးနောက် သုံးနှစ်အတွင်းပဋိပက္ခတွေမှာ လူဦးရေ ၂ သန်းကျော်အိုးမဲ့အိမ်မဲ့ဖြစ်ကြရပြီး အဲဒီအထဲ တဝက်ကျော်ဟာ အမျိုးသမီးတွေဖြစ်ကြတယ်လို့လည်း UNFPA က ထုတ်ပြန်ပါတယ်။ မြန်မာနိုင်ငံတွင်း အမျိုးသမီးနဲ့မိန်းကလေးငယ် ၉.၂ သန်းဟာ လူသားချင်းစာနာမှုအကူအညီတွေ အရေးပေါ်လိုအပ်နေတယ်လို့လည်း ဆိုပါတယ်။
အခက်အခဲတွေကြားထဲမှာပဲ UNFPA ဝန်ထမ်းတွေနဲ့ မြေပြင်မှာရှိတဲ့လက်တွဲဖက်အဖွဲ့အစည်းတွေဟာ ဒီအမျိုးသမီးတွေကို အကာအကွယ်ပေးရေး ကျန်းမာရေးကိစ္စတွေကို ဆက်ပြီးဆောင်ရွက်နေကြတယ်လို့ မြန်မာနိုင်ငံကို သုံးရက်ကြာသွားရောက်ခဲ့တဲ့ UNFPA အာရှ ပစိဖိတ်ဒေသဆိုင်ရာညွန်ကြားရေးမှုး Mr.Pio Smith က ပြောပါတယ်။ UNFPA အာရှပစိတ်ဒေသအကြီးအကဲဟာ နေပြည်တော်ကိုလည်းသွားရောက်ခဲ့ပြီး အကူအညီပေးရေးကိစ္စ၊ UNFPA ဝန်ထမ်းတွေရဲ့ပြည်ဝင်ခွင့်ဗီဇာကိစ္စတွေကို မြန်မာအာဏာပိုင်တွေနဲ့ဆွေးနွေးခဲ့တယ်လို့လည်း သိရပါတယ်။
လက်ရှိမြန်မာနိုင်ငံတွင်း နိုင်ငံရေးအခြေအနေနဲ့ ပဋိပက္ခတွေကြောင့် ၂၀၂၄ မှာလုပ်မယ့် သန်းခေါင်စာရင်းကောက်ယူမှုတွေမှာ UNFPA အနေနဲ့ အကူအညီပေးနိုင်မှာမဟုတ်ဘူးဆိုတာကိုလည်း မြန်မာအာဏာပိုင်တွေကို ပြောခဲ့တယ်လို့ သိရပါတယ်။
