၄ ကြိမ်မြောက် လူ့အခွင့်အရေးနဲ့ လူ့ဂုဏ်သိက္ခာ နိုင်ငံတကာ ရုပ်ရှင်ပွဲတော်မှာ ဆုချီးမြှင့်ခံရတဲ့ ဇာတ်ကားတွေ ထွက်လာပါပြီ။ ဒီကနေ့ ရန်ကုန်မြို့မှာကျင်းပတဲ့ အခမ်းအနားအတွင်း ဆုရဇာတ်ကားတွေကို ကြေညာခဲ့တာပါ။ အဲဒီအခမ်းအနား ကို ကိုယ်တိုင်သွားတက်တဲ့ ဗွီအိုအေအယ်ဒီတာတဦးဖြစ်သူ ကိုသားညွန့်ဦးကို ကိုကျော်ကျော်သိန်းက ဆက်သွယ် မေးမြန်းထား ပါတယ်။
ကိုကျော်ကျော်သိန်း။ ။ လူ့အခွင့်အရေးနဲ့ လူ့ဂုဏ်သိက္ခာ ရုပ်ရှင်ပွဲတော် ဆုပေးပွဲ ပြီးသွားပြီဆိုတဲ့အခါကျတော့ ဘယ်ဇာတ်ကားတွေ ၊ ဘာဆုတွေ ဆွတ်ခူးသွားတယ်ဆိုတာ ပြောပြပါခင်ဗျ။
ကိုသားညွန့်ဦး။ ။ ဟုတ်ကဲ့ခင်ဗျ။ အဓိကတော့ ပေးတဲ့ဆု ၉ ဆုရှိပါတယ်။ ဒါပေမယ့် ကျနော်ခြုံပြီးပြောလိုက်မယ်ဆိုရင်တော့ အဓိကကျတဲ့ ဒေါ်အောင်ဆန်းစုကြည် အမျိုးသားဆု ပေါ့နော်။ ဒေါ်အောင်ဆန်းစုကြည်က ပြည်တွင်းပြည်ပ ခွဲထားတာရှိပါတယ်။ ဒေါ်အောင်ဆန်းစုကြည် အမျိုးသားဆု နဲ့ ဟံသာဝတီဆုကိုတော့ The Vein လို့ခေါ်တဲ့ “မှော်” ဆိုတဲ့ကား အဲဒါကတော့ ဖားကန့်ကျောက်စိမ်းမှာရှိတဲ့ ရေမဆေးကျောက်ပေါ့နော် ၊ အဲဒီကျောက်တွေကို ရှာတဲ့ လုပ်သားတွေရဲ့အကြောင်း ဖြစ်ရပ်မှန်တွေကို မှတ်တမ်းတင်ထားတဲ့ကားလေးပေါ့ အဲဒီကားက ဒေါ်အောင်ဆန်းစုကြည်ဆု ရော ဟံသာဝတီ ဦးဝင်းတင် ဆုရော ရရှိသွားပါတယ်။ ဆုတွေထဲမှာတော့ ထူးထူးခြားခြား ကျနော်တို့ VOA ကနေပြီးတော့ ပထမဆုံးပေးတဲ့ဆု ကျနော်တို့ရွေးချယ်ခဲ့ပါတယ် အဲဒါကတော့ ရိုးမြေကျဆိုတဲ့ ကားလေးပါ။ ဒါကတော့ ဒုက္ခိတ ဖြစ်နေတဲ့ လူတယောက်ရဲ့ ဘဝအကြောင်းကို ရိုက်ထားတာပါ။
ကိုကျော်ကျော်သိန်း။ ။ ဟုတ်ကဲ့ ဆိုတော့ ကျန်တဲ့ဆုတွေပေါ့လေ ဒေါ်အောင်ဆန်းစုကြည်ဆုအပါအဝင် ကျန်တဲ့ဆုတွေကို ရွေးချယ်တဲ့နေရာမှာ အခြေခံစဉ်းစားတဲ့ပုံနဲ့ VOA ဆုကို ရွေးချယ်တဲ့ နေရာမှာ အခြေခံ စဉ်းစားပုံ ဘယ်လိုကွာခြားချက်တွေများ ရှိပါသလဲ။
ကိုသားညွန့်ဦး။ ။ ဟုတ်ကဲ့ တော်တော်များများဆုတွေရသွားတာကို ကြည့်မယ်ဆိုရင်တော့ နိုင်ငံရေးအခြေအနေနဲ့ ဆက်စပ်ပြီးတော့ ရသွားတာ များပါတယ်။ တချို့ကျတော့လည်း ဒီ ရုပ်ရှင်တည်းဖြတ်မှုအပေါ်မှာ အဓိကထားပြီးတော့ ရသွားတာရှိတော့ နိုင်ငံရေးအပေါ်မှာ အခြေခံထားပြီးတော့ စဉ်းစားပြီး ရိုက်ကူးထားတဲ့ကားတွေက များပါတယ်။ ဒါပေမယ့် ကျနော်တို့ VOA က ပေးတဲ့ဆုနဲ့ ပတ်သက်ပြီးတော့ စဉ်းစားမယ်ဆိုရင်တော့ ကျနော်တို့ ဘယ်လိုစဉ်းစားသလဲဆိုတော့ ဗွီအိုအေ အနေနဲ့ သတင်းဌာနတခုဖြစ်တဲ့အတွက် VOA အနေနဲ့ သတင်းနဲ့အချက်အလက်ဦးစားပေး တင်ဆက်တဲ့ Documentary ကား(မှတ်တမ်းဇာတ်လမ်း) ကို ရွေးခြယ်မယ်လို့ ရည်ရွယ်ရင်း စဉ်းစားတာရှိပါတယ်။ ကျနော်တို့ စုစုပေါင်း ၂၁ ကားကြည့်ပါတယ်။
ဒါပေမယ့်လည်း ကျနော်တို့ ၂၁ ကားကနေပြီးတော့ Jury ၃ ယောက်လုံး တွေးတဲ့ ကားက ခုဏ ကျနော်ပြောသလို သတင်းအချက်အလက်ဦးစားပေးတဲ့ ကားထက်စာလို့ရှိရင် ကျနော်တို့ ကား တကား သွားတွေ့တယ်။ အဲဒါကတော့ လက်ရှိမြန်မာနိုင်ငံ လူ့အဖွဲ့အစည်းမှာ ကြုံနေရတဲ့ ဒုက္ခိတလူတယောက်နဲ့ သူ့မိသားစုဘယ်လိုရုန်းကန်ရသလဲဆိုတဲ့ အားမန်အပြည့်နဲ့ ဘဝသရုပ်ဖော်ထားတဲ့ဇာတ်ကားပါ။ ဒီ ဇာတ်ကားကတော့ စဉ်းစားတာ ဒီလူတယောက်ရဲ့ မိသားစုရုန်းကန်မှုဟာ အားမန်အပြည့်နဲ့ရုန်းကန်မှုဟာ လက်ရှိမြန်မာပြည်မှာကြုံနေရတဲ့ ဆင်းရဲမွဲတေမှု၊ မြန်မာပြည်ရဲ့ ဆင်းရဲမွဲကျမှု ၊ နောက်တခါ မြန်မာပြည်ရဲ့ လူမှုထောက်ပံ့ရေးအစီအစဉ် အားနည်းနေမှု ဒါတွေကို သွားပြီးတော့ ထင်ဟပ်စေတယ် ဖော်ပြနေတယ်ဆိုတာတွေကိုစဉ်းစားချက်နဲ့ အဲဒီကားကို ဗွီအိုအေ ကနေပြီးတော့ ရွေးချယ်ခဲ့တာ ဖြစ်ပါတယ်ခင်ဗျ။ နာမည်ကတော့ ရိုးမြေကျပါ။"
