နိုင်ငံတကာ အာကာသ သိပ္ပံပညာရှင်အဖွဲ့တဖွဲ့ဟာ သက်ရှိသတ္တဝါတွေ နေထိုင်လို့ရမယ့် ဂြိုလ်တလုံးပါဝင်တဲ့ နေစကြဝဠာ သစ်တခုကို တွေ့ရှိခဲ့တယ်လို့ အဲဒီ သုတေသနအဖွဲ့ကို ဦးဆောင်ခဲ့သူ စပိန် အာကာသ ရူပဗေဒ ပညာရှင်တဦးက ကြာသပတေးနေ့မှာပြောပါတယ်။
အလင်းနှစ် ၃၁ နှစ်အကွာမှာရှိတဲ့ GJ 357d လို့ အမည်ပေးထားတဲ့ အေးမြတဲ့ကြယ်တလုံးကို ဂြိုလ်သစ် ၁ လုံးက လည်ပတ်နေတာကို တွေ့ရှိခဲ့ရတာ ဖြစ်တယ်လို့ Canary ကျွန်းစုမှာ အာကာသ ရူပဗေဒ သိပ္ပံပညာရှင်Rafael Luque က ပြောပါတယ်။ ဒီတွေ့ရှိမှုကို အမေရိကန်အာကာသ စူးစမ်းရေးဌာန NASA ကလည်း ပြောထားပါတယ်။
သူတို့ရဲ့ TESS အခေါ် ဂြိုလ်ရှာဖွေရေး ဂြိုလ်တုက အဲဒီတွေ့ရှိမှုကို အတည်ပြုတယ်လို့ ဆိုပါတယ်။ ဒီ ဂြိုလ် ၃ လုံးထဲမှာ အဝေးဆုံး ဂြိုလ်ကတော့ သက်ရှိသတ္တဝါတွေ နေနိုင်ဖွယ်အခြေအနေရှိပြီး ကျန်တဲ့ ၂ လုံးကတော့ ပူပြင်းလွန်းတယ်လို့ သိပ္ပံပညာရှင် တွေက ယူဆနေကြပါတယ်။
သက်ရှိတွေ နေထိုင်နိုင်တဲ့ လက္ခဏာတွေထဲမှာ ကျောက်သား မြေပြင်တည်ရှိမှုနဲ့ နေနဲ့အကွာအဝေးဟာ ကမ္ဘာနဲ့ နေအကွာအဝေး မှာရှိနေတာကြောင့် ရေရရှိနိုင်တဲ့ အပူချိန် ရရှိနိုင်မှုတို့ဟာ အဓိကကျတယ်လို့ သိပ္ပံပညာရှင်တွေက ပြောပါတယ်။
