စိုက်ပျိုးရေးကဏ္ဍ ဖွံ့ဖြိုးရေးအတွက် အစိုးရအသုံးစရိတ် ခွဲဝေမှုမှာ အပြောင်းအလဲတွေလုပ်ဖို့ လိုတယ်လို့ ကမ္ဘာ့ဘဏ်အုပ်စုက ဆိုပါတယ်။ စက်မှုလယ်ယာ ဝန်ဆောင်မှုလုပ်ငန်းနဲ့ ဆည်မြောင်းအခြေခံ အဆောက်အအုံ တည်ဆောက်ရေးမှာ အသုံးပြုမယ့်ငွေကို သုတေသန၊ ဆည်မြောင်းစီမံခန့်ခွဲမှု၊ မြေဆီလွှာစီမံခန့်ခွဲမှု၊ သီးနံှ၊ မွေးမြူးရေးနဲ့ ငါးလုပ်ငန်း၊ တိုးချဲ့ပညာပေးမှု၊ စိုက်ပျိုးရေးစီမံကိန်း ရေးဆွဲမှု စတာတွေမှာ သုံးသင့်တယ်လို့ ဆိုပါတယ်။ တိုးချဲ့ပညာပေးလုပ်ငန်း၊ ဆည်မြောင်းဝန်ဆောင်မှုလုပ်ငန်း နဲ့ စီမံခန့်ခွဲမှု စတာတွေအတွက် အသုံးစရိတ် ခွဲဝေသတ်မှတ်တာဟာ အကျိုးအရှိဆုံး ဖြစ်ပါတယ်။
အစိုးရ စိုက်ပျိုးရေးအသုံးစရိတ် အသုံးပြုပုံကို ပြောင်းလဲပြစ်ဖို့ အကြံပေးထားတာပါ။ ဖွံ့ဖြိုးရေးအတွက် လုပ်ဆောင်ရမယ့် ကိစ္စတွေကို မလုပ်ဘဲ မလိုအပ်တဲ့ကိစ္စတွေမှာ ငွေကုန်ခံပြီး “မရောင်ရာဆီလူး” ဖြစ်နေတာကို ပြုပြင်ပြောင်းလဲဖို့ ဖြစ်ပါတယ်။ ဒါပေမဲ့ လက်ရှိ စီမံကိန်းတွေကို အကောင်အထည်ဖော်ရာမှာ စွမ်းရည်တိုးမြှင့်ပြီး ပိုမိုထိရောက်စွာ လုပ်နိုင်ရင်လည်း စိုက်ပျိုးရေး ဖွံ့ဖြိုးနိုင်တယ်လို့လည်း ဆိုပါတယ်။ အကောင်အထည်ဖော်ရာမှာ စွမ်းရည်ရှိဖို့အတွက် နည်းပညာဆိုင်ရာ ကိစ္စရပ်တွေနဲ့ ဈေးကွက်လိုအပ်ချက်အတိုင်း လုပ်ဆောင်နိုင်ဖို့ သက်ဆိုင်ရာဝန်ထမ်းတွေကို အရည်အသွေးရှိလာအောင် လုပ်ဖို့ လိုပါတယ်။
လက်ရှိ စီမံကိန်းပုံစံကို ပြုပြင်ပြောင်းလဲပြီး အခြားစိုက်ပျိုးရေးလုပ်ငန်းမှာ အသုံးပြုနိုင်ရင်လည်း ဖွံ့ဖြိုးမှုစွမ်းရည်ကို မြှင့်တင်နိုင်ပါတယ်။ ဥပမာ ဆန်စပါး စိုက်ပျိုးရေးအတွက် ပံ့ပိုးထားတာတွေကို မတူကွဲပြားတဲ့ အခြားလယ်ယာလုပ်ငန်းတွေမှာ သုံးစွဲတာမျိုး ဖြစ်ပါတယ်။ ဆည်မြောင်းနဲ့ ကျေးလက်လမ်း အဆင့်မြှင့်မှု၊ ဓါတ်မြေသြဇာနဲ့ ပိုးသတ်ဆေး အရည်အသွေး ထိန်းသိမ်းမှု၊ မြေဆီလွှာ စီမံခန့်ခွဲမှု၊ တိုးချဲ့ပညာပေးလုပ်ငန်း၊ မျိုးစေ့နဲ့ ဈေးကွက်သတင်း စတာတွေမှာ အားကောင်းလာရင်လည်း စီမံကိန်းအကောင်အထည်ဖော်ရာမှာ ထိရောက်နိုင်ပါတယ်။ အစိုးရဘဏ္ဍာငွေ စီမံခန့််ခွဲမှု ကောင်းရင်ကောင်းသလို အကျိုးခံစားနိုင်ပါတယ်။ အစိုးရဘတ်ဂျက် ပြင်ဆင်တဲ့အခါမှာ ဗဟိုအစိုးရဌာနတွေဟာ စီမံကိန်းအကောင်အထည်ဖော်နေတဲ့ ဒေသဆိုင်ရာဌာနတွေနဲ့ ညှိနှိုင်းဆောင်ရွက်ရပါလိမ့်မယ်။
အစိုးရဘဏ္ဍာငွေ စီမံခန့်ခွဲမှု ပိုမိုကောင်းမွန်လာရင် အကျိုးခံစားရနိုင်တယ်လို့ ဆိုပါတယ်။ ဘတ်ဂျက်အသုံးစရိတ်ကို ပြင်ဆင်ပုံ၊ စီမံကိန်းဟောင်းတွေထဲက သင်ခန်းစာ ရယူနိုင်ပုံ စတာတွေပေါ်မှာ မူတည်ပြီး စီမံကိန်း အကောင်အထည်ဖော်မှု စွမ်းရည် တိုးပွားနိုင်ပါတယ်။ ဥပမာ စိုက်ပျိုးရေး၊ မွေးမြူရေးနဲ့ ဆည်မြောင်းဝန်ကြီးရဲ့ လက်အောက်ခံဌာနတွေဟာ ဝန်ကြီးရုံးကိ ဘတ်ဂျက် မတင်ပြမီ စိုက်ပျိုးရေး စီမံကိန်းဌာနကို တင်ပြနိုင်ရင် ပိုပြီး အကျိုးရှည်မယ်လို့ ဆိုပါတယ်။ ဆည်မြောင်းကဏ္ဍမှာ ပိုမိုအကျိုးဖြစ်ထွန်းဖို့အတွက် အခြေခံအဆောက်အအုံ တည်ဆောက်ရေးမှာ ရင်းနှီးမြုပ်နံှမှုမပြုဘဲ အခြေခံအဆောက်အအုံ စီမံခန့်ခွဲမှုမှာ ရင်းနှီးဖို့ လိုပါတယ်။ အသစ်ဆောက်လုပ်မယ့်အစား လက်ရှိဆည်မြောင်းစနစ် ပိုမိုကောင်းမွန်လာအောင် ရင်းနှီးမြုပ်နံှတာဟာ ဆည်မြောင်းစီမံကိန်းကို ပိုမိုအကျိုးသက်ရောက်စေပါတယ်။
စိုက်ပျိုးရေး ပညာပေးလုပ်ငန်း မြှင့်တင်ရေးမှာ ပထမဦးဆုံး လုပ်ရမှာကတော့ ပညာရေးဝန်ထမ်းတွေ အရည်အသွေး ရှိလာအောင် ဘတ်ဂျက်အသုံးစရိတ် များများပေးဖို့ ဖြစ်ပါတယ်။ ဆန်စပါး ထုတ်လုပ်မှုကနေ မတူကွဲပြားတဲ့ အခြားလယ်ယာလုပ်ငန်းကို ပြောင်းလဲလုပ်ကိုင်နိုင်အောင် ရည်ရွယ်တာဟာ ပညာပေးလုပ်ငန်းရဲ့ အလေးပေးဆောင်ရွက်မှု ဖြစ်ရပါလိမ့်မယ်။ ဒီနေရာမှာ နည်းပညာအသုံးပြုမှု၊ အလှုရှင်ရဲ့ ကူညီထောက်ပံ့မှု၊ ပုဂ္ဂလိကကဏ္ဍ စတာတွေ အရေးကြီးလာပါတယ်။ စိုက်ပျိုးရေး ပညာပေးဌာနနဲ့ အခြားစိုက်ပျိုးရေးဌာနတွေ ထိရောက်စွာ ပူးပေါင်းဆောင်ရွက်နိုင်ဖို့လည်း လိုပါတယ်။ သမဝါယမအဖွဲ့အစည်း၊ ပုဂ္ဂလိကဘဏ်၊ အသေးစား ငွေကြေးလုပ်ငန်း စတာတွေကို ကူညီပံ့ပိုးနိုင်ဖို့အတွက် မြန်မာ့လယ်ယာဖွံ့ဖြိုးရေးဘဏ်ကို ပြုပြင်ပြောင်းလဲရင်လည်း အစိုးရအသုံးစရိတ်ဟာ အကျိုးရှိနိုင်ပါတယ်။
၂၀၁၇ ကနေ ၂၀၂၁ အထိဖြစ်တဲ့ ငါးနှစ်ကာလအတွင်းမှာ အလှုရှင်တွေရဲ့ ထောက်ပံ့မှု နှစ်ဆတိုးလာလိမ့်မယ်လို့ ခန့်မှန်းထားပါတယ်။ လောလောဆယ်ပံ့ပိုးဖို့ ကတိပြုထားတာဟာ ဒေါ်လာသန်း (၇၆၀) ရှိပြီး တိုးပွားလာလိမ့်မယ်လို့ ခန့်မှန်းရပါတယ်။ စိုက်ပျိုးရေးဝန်ကြီးဌာနရဲ့ မဟာဗျူဟာဦးတည်ချက်နဲ့ ကိုက်ညီအောင် ထောက်ပံ့တဲ့နေရာမှာ အလှုရှင်အဖွဲ့အစည်းတွေဟာ အစိုးရထက်သာပါတယ်။ ဒါပေမဲ့ စိုက်ပျိုးရေး၊ မွေးမြူရေးနဲ့ ဆည်မြောင်းဝန်ကြီးဌာနဟာ အလှုရှင်တွေပေးတဲ့ ဘဏ္ဍာငွေနဲ့ အသိပညာကို အပြည့်အဝ အသုံးချနိုင်စွမ်း မရှိတဲ့အတွက် ပေးသလောက် အကျိုးမခံစားရဘဲ ဖြစ်နေပါတယ်။
မနှစ်ကစတဲ့ (၅) နှစ်ကာလကို စိုက်ပျိုးရေးကဏ္ဍ ဖွံ့ဖြိုးရေးမဟာဗျူဟာနဲ့ ရင်းနှီးမြုပ်နံှမှု အစီအစဉ်လို့ ခေါ်ပါတယ်။ ဒီ အစီအစဉ်ကို အကောင်အထည်ဖော်ဖို့အတွက် ပုဂ္ဂလိက ရင်းနှီးမြုပ်နံှမှုတွေ တိုးပွားလာဖို့ လိုပါတယ်။ ဒါကြောင့် စိုက်ပျိုးရေးမူဝါဒနဲ့ စီးပွားရေးဆိုင်ရာ စည်းမျဉ်းဥပဒေ ပိုမိုကောင်းမွန်လာအောင် ဆောင်ရွက်ရပါလိမ့်မယ်။ ပုဂ္ဂလိလုပ်ငန်းနဲ့ ပြိုင်ဆိုင်သလို ဖြစ်မယ့်ကိစ္စတွေကို ရှောင်ရှားဖို့ အကြံပေးထားပါတယ်။ ပုဂ္ဂလိက ရင်းနှီးမြုပ်နံှမှု တိုးပွားလာဖို့အတွက် အထောက်အကူပြုတဲ့ လုပ်ငန်းတွေကိုလည်း ဦးစားပေးပြီး အစိုးရစိုက်ပျိုးရေးစရိတ်ကိုသုံးဖို့ ကမ္ဘာ့ဘဏ်အုပ်စုက အကြံပေးထားပါတယ်။
