လွှတ်တော်သစ်အတွက် ပြင်ဆင်လုပ်ကိုင်နေမှုများ

နိုဝင်ဘာလ ၇ ရက်နေ့က ရွေးကောက်ပွဲတွေကျင်းပပေးအပြီး ရက်ပေါင်း ၉၀ အတွင်း ပြည်သူ့လွှတ်တော် ခေါ်ယူပေးရမယ်ဆိုတဲ့ ဥပေဒ သတ်မှတ်ချက်အရ စစ်အစိုးရအနေနဲ့ မကြာခင် သတင်းပတ်တွေအတွင်းမှာပဲ လွှတ်တော်ခေါ်ယူ ကျင်းပပေးရတော့မှာ ဖြစ်ပါတယ်။ ဒါပေမဲ့ အခုလက်ရှိ အချိန်အထိတော့ ရွေးကောက်ပွဲမှာ အနိုင်ရထားတဲ့ လွှတ်တော်အမတ်တွေဆီကို အသိအမှတ်ပြု ခန့်အပ်လွှာတွေတောင် မပေးပို့ရသေးတာမို့ ဒီ ဇန်နဝါရီလ အလယ်ပိုင်း အထိတော့ ဖြစ်လာနိုင်ဖွယ်မရှိဘူးလို့ NDF အမျိုးသား ဒီမိုကရက်တစ် အင်အားစု အဖွဲ့ကနေ ဝင်ရောက်ယှဉ်ပြိုင်ပြီး အနိုင်ရထားတဲ့ သင်္ဃန်းကျွန်းမြို့နယ် လွှတ်တော်အမတ် ဦးသိန်းညွန့်က ပြောပါတယ်။ လွှတ်တော်တွင်းကို ရောက်လို့ရှိရင် သူ့အနေနဲ့ အဆိုပြုဖို့ ပြင်ဆင်ထားတဲ့အချက်တွေ ရှိတယ်လို့လည်း ဆိုပါတယ်။

ဦးသိန်းညွန့် ။ ။ ကျနော်က နှစ်ခုပေါ့ဗျာ။ တခုကတော့ နိုင်ငံရေးအကျဉ်းသမားတွေ အပါအဝင် အကျဉ်းသား တွေကို ပြန်လွှတ်ဖို့၊ နိုင်ငံခြားရောက်နေတဲ့လူတွေ ငြိမ်းချမ်းစွာပေါ့ဗျာ၊ မိခင်နိုင်ငံကိုပြန်လာပြီး မိသားစုနဲ့ ပေါင်းနိုင်ဖို့၊ ငြိမ်းချမ်းရေးနယ်မြေတွေ တိုးချဲ့ဖို့အတွက်ဆိုရင် ဥပဒေကဲ့သို့ အာဏာတည်တဲ့ အမိန့်ပေါ့ဗျာ၊ အဲဒီ အမိန့်ကတော့ အထွေထွေသင်ပုန်းချေ လွတ်ငြိမ်းချမ်းသာခွင့် အမိန့်ပေါ့။ အဲဒါထုတ်ဖို့။ မူလတုန်း က တော့ ဥပဒေကြမ်းတင်ဖို့ ကျနော်တို့ ပြင်ထားပါတယ်။ ဒါပေမဲ့ ကျနော် ဒီဥပဒေတွေကို လေ့လာကြည့်တဲ့ အခါမှာ နိုင်ငံတော်သမ္မတပဲ လုပ်နိုင်တယ်ဆိုတဲ့အတွက် ဒီဟာကို နိုင်ငံတော်သမတ္တက နေပဲ အထွေထွေ သင်ပုန်းချေ လွတ်ငြိမ်းချမ်းသာခွင့်ထုတ်ပေးဖို့ လွှတ်တော်မှာ အဆိုတင်ပါ့မယ်။ ဒါ နံပတ် တစ်ပါ။

နောက်တချက်က တကြိမ်တည်းမှာ ကျနော်တို့နိုင်ငံရဲ့ အမျိုးသားလိုအပ်ချက်ပေါ့ဗျာ။ နိုင်ငံခြားရင်းနှီးမြှုပ်နှံမှု တိုက်ရိုက်ရဖို့အတွက်နော် အနောက် နိုင်ငံတွေ၊ အထူးသဖြင့် အမေရိကန်နဲ့ အီးယူက စီးပွားရေးအရ ပိတ်ဆို့ ထားတဲ့ဟာတွေကို ပြန်လည်ပယ်ဖျက်ပေးဖို့ပေါ့ဗျာ။ ပြည်ထောင်စုလွှတ်တော် သို့မဟုတ် ပြည်သူ့လွှတ်တော် က တိုက်တွန်းတဲ့ အဆိုတွေ တင်ဖို့တော့ ကျနော် ပြင်ဆင်ထားပါတယ်။

ဦးသန်းလွင်ထွန်း ။ ။ ဟုတ်ကဲ့။ အဲဒီတော့ ဦးသိန်းညွန့်ပြောပြသွားတဲ့ အချက် နှစ်ချက်မှာ ပထမ အချက် ကတော့ ရှင်းပါတယ်။ ဒါ ပြည်တွင်းရေး ကိစ္စပေါ့နော်၊ ပြည်တွင်းမှာ လွှတ်တော်အနေနဲ့ အထွေထွေ သင်ပုန်းချေရေး အမိန့်ပြန်တမ်းတရပ်ကို ထုတ်ပြန်ပေးဖို့ နိုင်ငံတော် သမ္မတဆီကို တင်ပြပေးမယ့် အချက် ပေါ့နော်၊ ဒါကတော့ ပြည်တွင်းမှာ လုပ်ကိုင်နိုင်တဲ့အချက်ပဲ။ ဒါပေမဲ့ နိုင်ငံတကာက ပိတ်ဆို့အရေးယူမှုတွေကို ရုပ်သိမ်းပေးဖို့ဆိုတဲ့ အချက်ကတော့ နိုင်ငံရပ်ခြားနဲ့ အဓိက သက်ဆိုင်မနေဘူးလား။ လွှတ်တော်ထဲကနေ ဘာတွေများ လုပ်ဆောင်နိုင်မှာလဲ။ အထူးသဖြင့်ပေ့ါနော် မြန်မာနိုင်ငံအပေါ်ကို စီးပွားရေးအရ ပိတ်ဆို့ ထားတယ် ဆိုတာဟာ နိုင်ငံတကာ သက်ဆိုင်ရာ နိုင်ငံအသီးသီးရဲ့ မြန်မာနိုင်ငံအပေါ်ထားရှိတဲ့ မူဝါဒတွေ၊ မြန်မာနိုင်ငံရဲ့အခြေအနေ၊ ယေဘုယျ အခြေအနေအပေါ် သုံးသပ်ချက်တွေကြောင့် ဒီလို ပြဌာန်းထားမှုတွေ၊ ဒီလို ပိတ်ဆို့မှုတွေရှိနေတာ မဟုတ်ဘူးလား။ အဲဒါကို လွှတ်တော်အနေနဲ့ ဘယ်လိုတောင်းဆိုမှုတွေ လုပ်ပြီးတော့ ဘယ်လိုများထိရောက်အောင် တင်ပြနိုင်မှာလဲ။

ဦးသိန်းညွန့် ။ ။ ကျနော်တို့ အဲဒါနဲ့ပတ်သက်ပြီးတော့ ပြောရလို့ရှိရင် ဗမာပြည်သူလူထုရဲ့ အသံကိုပေါ့ဗျာ၊ ပိတ်ဆို့ထားတဲ့ နိုင်ငံတွေက ကြားစေချင်ပါတယ်။ ဘာကြောင့်လဲဆိုတော့ အခုပြောမယ့် ကျနော်တို့ အနေနဲ့ ဆိုရင် ကျနော်တို့က ဘယ်သူဌေးကြီးတွေ ဘယ်သူတွေနဲ့မှ ပတ်သက်တဲ့သူတွေ မဟုတ်ဘူး။ ကျနော်တို့ တိုင်းပြည်ရဲ့ အကျိုးစီးပွားအတွက် စီးပွားရေး ပိတ်ဆို့ထားတာကို ပြန်လည်ပြီး ပယ်ဖျက်ပေးဖို့ ကျနော်တို့ တင်ပြတာက မြန်မာပြည်သူလူထုရဲ့ ဒီနေ့ အခြေအနေအရ ဆင်းရဲမွဲတေမှု လွတ်မြောက်ရေးပေါ့ဗျာ။ ကျနော် သဘောတရားတွေ၊ မူဝါဒတွေမပြောချင်ပါဘူး။ ဆင်းရဲမွဲတေမှု လွတ်မြောက်ဖို့ဆိုရင် နိုင်ငံခြားရင်းနှီးမြှုပ်နှံမှု လိုတယ်။ ဒါမှသာ ကျနော်တို့မှာ နည်းပညာတွေရပြီးတော့ ရင်းနှီးမြှုပ်နှံမှုတွေရပြီးတော့ လူတွေ အလုပ်အကိုင် ရမှာပါ။ ဒီအဆိုကို အနောက်နိုင်ငံတွေကို ကျနော်တို့ တင်ပြမှာပါ။ ဒီလိုတင်ပြတဲ့အခါမှာ ကျနော်တို့မျှော်လင့်ချက်က တချက်ပါပဲ။ မြန်မာပြည်သူလူထုက ရွေးချယ်တင်မြှောက်ထားတဲ့ လူတွေရဲ့ အသံကို ဒီမိုကရေစီကျင့်သုံးနေတဲ့ နိုင်ငံကြီးများက ပြန်လည်ပြီးတော့ သုံးသပ်ဆင်ခြင်ဖို့ တင်ပြခြင်း၊ တင်ပြမယ့်သဘောပါပဲ။ ဒါပါပဲ။

ဦးသန်းလွင်ထွန်း ။ ။ အဲဒီတော့ နိုင်ငံတကာ စီးပွားရေးပိတ်ဆို့မှုတွေရဲ့ မြန်မာနိုင်ငံအပေါ် သက်ရောက်မှု ပေါ့နော်။ ဒီနေရာမှာ နှစ်မျိုးကွဲပါတယ်။ တချို့ကတော့ ဒီလိုစီးပွားရေး ပိတ်ဆို့မှုတွေကြောင့် မြန်မာနိုင်ငံ စစ်အစိုးရရဲ့ အုပ်ချုပ်သူတွေရဲ့ လုပ်ပိုင်ခွင့်တွေ၊ သူတို့အပေါ်မှာပဲ ထိခိုက်ပြီးတော့၊ တစုံတရာ သက်ရောက်မှု တွေ ရှိပြီးတော့ မြန်မာနိုင်ငံအတွင်းမှာ ပြုပြင်ပြောင်းလဲမှုတွေ တစုံတရာ ရှိလာမလားဆိုတဲ့ ရည်ရွယ်ချက်နဲ့ လုပ်နေကြတာပါ။ အဲဒီတော့ တချက်တည်းမှာ တဘက်တည်းမှာပဲ စောစောက ဦးသိန်းညွန့် ပြောသွားသလို ပေါ့နော်။ မြန်မာပြည်တွင်းမှာ ဆင်းရဲမွဲတေမှုတွေဟာ နိုင်ငံတကာ ပိတ်ဆို့မှုတွေကြောင့် ဖြစ်တယ်လို့ဆိုတဲ့ နေရာမှာလည်း ငြင်းချက်ထုတ်တာတွေကတော့ ဒီလို စီးပွားရေးပိတ်ဆို့မှုတွေကြောင့် မဟုတ်ဘဲနဲ့ စစ်အစိုးရရဲ့ စီမံအုပ်ချုပ်မှုညံ့ဖျင်းမှု၊ အလွဲသုံးစားလုပ်မှုတွေကြောင့်လို့ ထောက်ပြတာတွေလည်း ရှိပါတယ်။

အထူးသဖြင့်ပေါ့နော်- ဒီနောက်ပိုင်းတွေမှာဆိုလို့ရှိရင် မြန်မာနိုင်ငံအတွင်းမှာရရှိနေတဲ့ သဘာ၀ ဓာတ်ငွေ့ ရောင်းရငွေတွေ၊ သယံဇာတပစ္စည်း ထုတ်ရောင်းလို့ရတဲ့ ဘဏ္ဍာငွေတွေ၊ လျှပ်စစ်ထုတ်ရောင်းလို့ရတဲ့ ဒီ ဘဏ္ဍာငွေတွေဟာ ဘယ်ရောက်သွားသလဲဆိုတဲ့ မေးခွန်းတွေတောင်ရှိနေတယ်ဆိုတော့ ဒါဟာ စီမံခန့်ခွဲမှု အဓိကပြဿနာ ဖြစ်နေတယ်လေ။ အဲဒီတော့ အဲဒီဟာနဲ့ ပတ်သက်လို့ရော ဦးသိန်းညွန့်တို့အနေနဲ့က နဂိုထဲက ဘယ်လို ယုံကြည်မှုတွေ ရှိခဲ့လို့လဲခင်ဗျ။

ဦးသိန်းညွန့် ။ ။ ကျနော်တို့က တိုင်းပြည်ရဲ့လိုအပ်ချက်ကိုပဲကြည့်တာပါ။ ခုနက ပြောတဲ့အချက်တွေထဲမှာ ကျနော်သဘောတူတဲ့ အချက်တွေရှိပါတယ်။ ကျနော်တို့ရဲ့ စီမံခန့်ခွဲမှု အားနည်းချက်တွေ၊ ကျနော်တို့ ကိုယ်တိုင်မြင်နေတဲ့ အချက်အလက်တွေအရ ကျနော်တို့တိုင်းပြည်မှာ ပြင်စရာတွေ အများကြီး ရှိပါတယ်။ ဒါကတပိုင်းပါ။ တကြိမ်တည်းမှာ ကျနော်တို့ ပြည်တွင်းပိုင်းမှာ ပြင်စရာတွေ၊ ပြောစရာတွေကို လွှတ်တော် အတွင်းမှာပေါ့ဗျာ။ သူတို့ ပေးထားတဲ့ အခြေခံဥပဒေနဲ့ ဥပဒေဘောင်အတွင်းကတော့ ပြောနိုင်သမျှ ကျနော်တို့ပြောပါမယ်။ ထောက်ပြနိုင်သမျှ ထောက်ပြပါမယ်။ စီးပွားရေးပိတ်ဆို့မှုဟာ ကျနော်တို့အမြင်ပြောရင် လူတစုကိုထိတာထက် လူထုကိုထိပါတယ်။ လူတစုကတော့ အားလုံးသိတဲ့အတိုင်းပဲ၊ အင်မတန်မှ ချမ်းသာ ကြွယ်ဝတဲ့ အဆင့်မှာ ရှိပါတယ်။ လူထုကြီးကတော့ အင်မတန်မှ ဆင်းရဲမွဲတေမှုဘဝမှာ ရောက်နေပါတယ်။ ဒီလိုအခြေအနေမျိုးမှာ ဆင်းရဲမွဲတေမှုကို တိုက်ဖျက်ဖို့ဆိုရင် ပြည်တွင်းမှာ ကျင့်သုံးနေတဲ့ စီးပွားရေးမူဝါဒ အားနည်းချက်တွေကို ပြင်ဖို့လိုသလို တကြိမ်တည်းမှာ အနောက်နိုင်ငံတွေက ပိတ်ဆို့ထားတဲ့ စီးပွားရေး ပိတ်ဆို့မှုကိုလည်း ပြန်လည်ပယ်ဖျက်ပေးဖို့ လိုအပ်တယ်လို့ ဒီလိုပဲကျနော်တို့ မြင်တဲ့အတွက် ဒီအဆိုတွေကို လွှတ်တော်မှာတင်ဖို့ ကျနော်တို့ ပြင်ဆင်ရခြင်း ဖြစ်ပါတယ်။

ဦးသန်းလွင်ထွန်း ။ ။ ဟုတ်ကဲ့ခင်ဗျ၊ စောစောကပြောသွားတဲ့အထဲမှာပဲ ထပ်ပါတဲ့ကိစ္စက လွှတ်တော် အတွင်းမှာ ပြဋ္ဌာန်းထားတဲ့ ဥပဒေဘောင်တွေ အရ လုပ်ပိုင်ခွင့်တွေအရဆိုတာ ပါပါတယ်။ ဒီနေရာမှာ ပြီးခဲ့တဲ့လအတွင်းမှာပဲ ဗိုလ်ချုပ်မှူးကြီးသန်းရွှေအမိန့်နဲ့ လွှတ်တော်တွင်းမှာ စည်းမျဉ်းကန့်သတ်မှုတွေကို အမိန့်ပြဌာန်းချက်တရပ် ထုတ်ပြန်တယ်လို့ ကျနော်တို့ကြားရပါတယ်။ အထူးသဖြင့် နိုင်ငံတော်လုံခြုံရေးကို ထိပါးစေတဲ့ကိစ္စတွေကို မဆွေးနွေးရဘူး။ အစိုးရရဲ့မူဝါဒတွေကို မပုတ်ခတ်ရဘူး။ ဒါ့အပြင် လွှတ်တော်အတွင်း မှာ ဆန္ဒပြမှုတွေမလုပ်ရဘူးဆိုတဲ့ ကြေညာချက်မျိုးထုတ်တယ်လို့လည်း ကျနော်တို့ကြားရပါတယ်။ အဲဒါနဲ့ ပတ်သက်လို့ရော ဦးသိန်းညွန့်တို့အနေနဲ့ ဘယ်လိုတွေများ ကြားသိထားတာရှိသလဲ။

ဦးသိန်းညွန့် ။ ။ ဒီနေ့ပဲလေ နိုင်ငံတော်ပြန်တမ်းကနေ ပြည်ထောင်စုလွှတ်တော် အပါအဝင်ပေါ့ဗျာ-လွှတ်တော် သုံးရပ်နဲ့ ပတ်သက်တဲ့ ဥပဒေတွေ ကျနော် လေ့လာကြည့်ပါတယ်။ အဲဒီလေ့လာကြည့်တဲ့အခါမှာ အစိုးရနဲ့ ပတ်သက်တဲ့မူဝါဒတော့ မပါဘူး၊ ယေဘုယျကတော့ ခုနကပြောသလိုပေါ့ဗျာ၊ ပြည်တွင်းနဲ့ ပတ်သက်တဲ့အခါမှာ ဒီနိုင်ငံတော်နဲ့ ပတ်သက်တာ၊ ပြည်ထောင်စု မပြိုကွဲရေးနဲ့ ပတ်သက်တာ အဲဒီအချက်တွေတော့ ပါပါတယ်။ အဲဒီအချက်တွေမှ လွဲပြီးတော့ လွတ်လပ်စွာ ဝေဖန်ဆွေးနွေးပိုင်ခွင့် ရှိတယ်ဆိုတာ အဲဒီ လွှတ်တော်သုံးရပ် ဥပဒေထဲမှာ ဖော်ပြထားတာရှိပါတယ်။ အဲဒီတော့ ကျနော်တို့ကတော့ ပေးထားတဲ့ ဘောင်အတွင်းက နေပြီးတော့ ကျနော်တို့ လုပ်လို့ရတဲ့ လုပ်ပိုင်ခွင့်ကို သုံးသွားမယ်၊ သုံးနိုင်အောင်လည်း ကျနော်တို့ ကြိုးစားမှာ ပေါ့ဗျာ။ နှစ် နှစ်ဆယ်လုံးလုံး၊ ၉၀ ခုနှစ်က ကျနော်လွှတ်တော်အမတ် ဖြစ်ခဲ့ပြီးတော့ အနှစ်နှစ်ဆယ်လုံးလုံး ကျနော်တို့ ဘာလုပ်ပိုင်ခွင့်မှ မရခဲ့ဘူးဗျာ။

ရဲမွန်မှာ သုံးနှစ်နေရတာ၊ မိသားစုတွေရဲ့ စီးပွားရေးတွေကို ပိတ်ဆို့ခံထားရတာ၊ ဒီလိုဟာမျိုး ကျနော်တို့ ကြုံခဲ့ပြီးပါပြီ။ ရင်ဆိုင်ခဲ့ပြီးပါပြီ။ အဲဒါနဲ့ စာရင်တော့ အခု ဥပဒေတွေကပေးထားတဲ့ ဘောင်အတွင်းကနေ လွတ်လပ်စွာ ပြောနိုင်ခွင့်ရှိတယ်ဆိုတဲ့အတွက် ကျနော်တို့လူထုအတွက်၊ ကျနော်တို့ နိုင်ငံအတွက် အဲဒီ ဘောင်အတွင်းကတော့ ကျနော်တို့ ပြောနိုင်သမျှ၊ ဆိုနိုင်သမျှ ကျနော်တို့ပြောဖို့ပြင်ထားပါတယ်။

ဦးသန်းလွင်ထွန်း ။ ။ ဟုတ်ကဲ့။ ဒီနေရာမှာ နိုင်ငံတော်လုံခြုံရေး၊ ပြည်ထောင်စုမပြိုကွဲရေးဆိုတဲ့ စကားရပ် တွေက လိုသလို အဓိပ္ပာယ်ကောက်ဆွဲနိုင်တဲ့ ကျယ်ပြန့်တဲ့ သတ်မှတ်ချက်ကြီးတွေ ဖြစ်မနေဘူးလား။

ဦးသိန်းညွန့် ။ ။ အဲဒါကတော့ ကိုသန်းလွင်ထွန်းရေ့… ကျနော်တို့နိုင်ငံမှာတော့ ပြဋ္ဌာန်းသမျှ ဥပဒေတွေ ကတော့ ကျယ်ပြန့်ပြီးတော့ လိုသလိုအဓိပ္ပာယ် ကောက်နိုင်တဲ့ ဥပဒေတွေ အများကြီးပါသလို။ အဲဒီ ဘောင် အတွင်းကပဲ အလုပ်လုပ်နိုင်ဖို့အတွက် ကျနော်တို့ရှေ့နေ စကားနဲ့ပြောရရင် ဖာပေါက်၊ ယိုပေါက် ထဲက ကျနော်တို့ ရသမျှ ကျနော်တို့ ပြောရဆိုရမှာပဲပေါ့ဗျာ။

ဦးသန်းလွင်ထွန်း ။ ။ ဟုတ်ကဲ့။ ဒီနေရာမှာ ထပ်ပြီးမေးစရာရှိလာတာက လွှတ်တော်အတွင်း ရောက်သွားပြီး လို့ရှိရင် လွှတ်တော်အတွင်းမှာ လုပ်ထုံးလုပ်နည်းတွေနဲ့ ပတ်သက်လို့ပေါ့နော်။ ထုံးစံအရဆိုလို့ရှိရင်တော့ လွှတ်တော်မှာ ရေးရာ ကော်မတီတွေဖွဲ့ကြမယ်။ အဲဒီ ရေးရာကော်မတီတွေထဲမှာပါပြီးတော့မှ ရေးရာ ကော်မတီ တွေထဲမှာ တင်ပြတဲ့အချက်တွေကို လွှတ်တော်ထဲမှာ တကယ့်လွှတ်တော်ရဲ့ စည်းဝေးပွဲကြီးတွေမှာ တင်ပြပြီးတော့ မဲခွဲတဲ့ အဆင့်တွေရောက်လာမယ်ဆိုတော့ ဦးသိန်းညွန့်တို့လို ရွေးချယ်ခံရတဲ့ ပုဂ္ဂိုလ်မျိုး တွေက အတော်လေး လူနည်းစုဖြစ်နေတဲ့အခါကျတော့ ဦးသိန်းညွန့်တို့ တင်ပြတဲ့အချက်တွေက ရေးရာ ကော်မတီအဆင့် (Level) မှာပဲ ပျောက်ကွယ်သွားမယ့် အနေအထား ဖြစ်လာမှာတွေကိုရော မစိုးရိမ်ဘူးလား။

ဦးသိန်းညွန့် ။ ။ ဒါကတော့လေ ပြဌာန်းထားတဲ့ အခြေခံဥပဒေမှာ ကျနော်တို့က ဥပဒေကြမ်းတွေ တင်သွင်း နိုင်တယ်၊ ဆွေးနွေးနိုင်တယ်၊ ဆုံးဖြတ်နိုင်တယ်၊ အဲသလိုပဲ ကျနော်တို့ အဆိုတင်သွင်းနိုင်တယ်၊ ဆွေးနွေး နိုင်တယ်၊ ဆုံးဖြတ်နိုင်တယ်၊ မေးခွန်းတွေ မေးနိုင်တယ်ဆိုတဲ့ အချက်တွေပေါ်က လက်တွေ့ကျကျ လုပ်ရ မှာ ပေါ့ဗျာ။ လွှတ်တော်ရေးရာ ကော်မတီဆိုတာက ဒီနေ့ ကျနော် လေ့လာခဲ့တဲ့ ဥပဒေအရပြောရရင် အနောက် နိုင်ငံကြီးများလို အခြေအနေမျိုး မရှိပါဘူး။ ဥပဒေကြမ်း ရေးဆွဲရေး ကော်မတီအပါအဝင် လွှတ်တော်က အမြဲတမ်းဖွဲ့စည်းမယ့် ရေးရာကော်မတီဆိုတာလည်း လွှတ်တော်ဥက္ကဋ္ဌတွေကနေ ရွေးချယ်တဲ့သူတွေပဲပါမှာပါ။ ကျနော်တို့ကတော့ ပါသည်ဖြစ်စေ၊ မပါသည်ဖြစ်စေပေါ့ဗျာ။ အာဏာရပါတီ မဟုတ်တဲ့အခါကျတော့ ပေးထားတဲ့ အခြေခံဥပဒေဘောင်နဲ့ ဒီ လွှတ်တော် သုံးရပ်ဥပဒေမှာပါတဲ့ ဥပဒေ ပြဋ္ဌာန်းချက်ဘောင် အတွင်း ကတော့ ကျနော်တို့ အလုပ်လုပ်နိုင်အောင် ကျနော်တို့ကြိုးစားရမှာပေါ့။ ဘယ်လောက်ရမယ် မရဘူး ဆိုတာ ကတော့ လက်တွေ့လုပ်ရင်းနဲ့ပဲ ကျနော်တို့ အဖြေထုတ်ရမှာပေါ့ဗျာ။

ဦးသန်းလွင်ထွန်း ။ ။ ဟုတ်ကဲ့။ အဲဒီတော့ အခု ဦးသိန်းညွန့်တို့ရဲ့ မူလပါတီဖြစ်တဲ့ အမျိုးသားဒီမိုကရေစီ အဖွဲ့ချုပ်က ဒေါ်အောင်ဆန်းစုကြည်တို့လည်း ပြန်လည်လွတ်မြောက်လာပါပြီ။ အဲဒီတော့ ဒေါ်အောင်ဆန်းစုကြည် နဲ့ သီးခြား တွေ့ဆုံဖို့ အစီအစဉ်တွေရော ရှိသလားခင်ဗျ။ ဒီကိစ္စတွေနဲ့ရော ဘယ်လို ဆက်ပြီးတော့ ညှိနှိုင်းဆောင်ရွက်သွားဖို့ အစီအစဉ်ရောရှိသလဲ။

ဦးသိန်းညွန့် ။ ။ ကျနော်တို့သင်္ဃန်းကျွန်းမှာ ရွေးကောက်ပွဲနိုင်ပြီးပေါ့ဗျာ၊ နိုဝင်ဘာလ ၂၀ ရက်နေ့မှာ ရွေးကောက်ပွဲအောင်နိုင်ရေးမှာ ပါတဲ့လူတွေကို ဂုဏ်ပြုပွဲအခမ်းအနား လုပ်ပါတယ်။ လူ ၂၀၀ ကျော် တက်ပါတယ်။ အဲဒီအချိန်မှာ ကျနော်တို့ရဲ့ အမျိုးသားခေါင်းဆောင်ကြီး ဗိုလ်ချုပ်အောင်ဆန်းရဲ့သမီး၊ ကျနော်တို့ရဲ့ အထွေထွေအတွင်းရေးမှူးပေါ့ဗျာ၊ ဒေါ်အောင်ဆန်းစုကြည် လာရောက်ပြီးတော့ သင်္ဃန်းကျွန်း မြို့နယ်၊ လူထုရဲ့ အသံကိုမေးမြန်းနိုင်ဖို့၊ သင်္ဃန်းကျွန်းမြို့နယ်လူထုရဲ့ အသံကို နားထောင်ဖို့၊ ဒေါ်အောင်ဆန်းစုကြည်လည်း သင်္ဃန်းကျွန်းမြို့နယ်လူထုကို တိုက်ရိုက်ပြောကြားနိုင်ဖို့အတွက် ကျနော်တို့ မြို့နယ် အောင်နိုင်ရေးကော်မတီက ဒေါ်အောင်ဆန်းစုကြည်ကို ဖိတ်ထားခဲ့ပြီး ဖြစ်ပါတယ်။ သို့သော် အကြောင်းကြောင်းကြောင့်ပေါ့ဗျာ- ဒေါ်အောင်ဆန်းစုကြည် သင်္ဃန်းကျွန်းမြို့နယ်ကို ရောက်မလာနိုင်ခဲ့ပါဘူး။ အခြေအနေကတော့ ဒါပါပဲခင်ဗျား။

ဦးသန်းလွင်ထွန်း ။ ။ ဦးသိန်းညွန့် ကိုယ်တိုင်အနေနဲ့ရရော - အခုလောလောဆယ်၊ ဒီ NDF ပါတီကနေ ပြီးတော့ ဦးသိန်းညွန့်ကို ထုတ်ပယ်ထားတယ်ဆိုတဲ့ ပြဿနာလေးတွေ ရှိနေတော့ အခုလာမယ့် လွှတ်တော် အတွင်းမှာ ဦးသိန်းညွန့်က တသီးပုဂ္ဂလအနေနဲ့ ရပ်တည်မှာလား၊ NDF ရဲ့ ဒုတိယခေါင်းဆောင်အနေနဲ့ပဲ ဆက်လက်ရပ်တည်ဖို့ ကြိုးပမ်းသွားမှာလားဆိုတာလေး သိပါရစေ။

ဦးသိန်းညွန့် ။ ။ အဲဒါကတော့ ပြည်ထောင်စုရွေးကောက်ပွဲကော်မရှင်က ဆုံးဖြတ်ချက်အပေါ်မှာပဲ မူတည် ပြီးတော့ တသီးပုဂ္ဂလအဖြစ် ရပ်တည်ရမယ် ဆိုရင်လည်း ကျနော်ရပ်တည်သွားမှာပဲ။ ရပ်တည်ပြီးတော့ သင်္ဃန်းကျွန်းမြို့နယ်လူထုကို အခြေခံပြီးတော့ နိုင်ငံရေးလမ်းကြောင်းသစ်တခုကို ကျနော် ဖော်ဆောင်ဖို့ ပြင်ဆင်ထားပါတယ်။