ကိုယ်ပိုင်သံစဉ်သီချင်းထောင်ကျော်ရေးစပ်ခဲ့သူ တေးရေးတေးဆို ဆောင်းဦးလှိုင်ဟာ နိုင်ငံရဲ့ ဒီမိုကရေစီအပြောင်းအလဲမှာ သူ့အနုပညာနဲ့ တတ်စွမ်းသမျှပါဝင်ဖို့ သံဓိဌာန်ချထားသူပါ။ သူ့သီချင်းတချို့ကလည်း ဒီလို သူ့ရည်ရွယ်ချက်ကို ထင်ဟပ်စေပါတယ်။ မအင်ကြင်းနိုင် တွေ့ဆုံမေးမြန်းထားပါတယ်။
မေး ။ ။ ကိုဆောင်းဦးလှိုင် အခု Washington DC ကို ရောက်နေတဲ့အခိုက်မှာ ကျမတို့ VOA ရုံးကိုလာပြီးတော့ အင်တာဗျူးခွင့် ပေးတဲ့အတွက် ကျေးဇူးအများကြီးတင်ပါတယ်။ ပထမဦးဆုံး မေးချင်တာက အခု အမေရိကန်နိုင်ငံမှာ ကိုဆောင်းဦးလှိုင်ရဲ့ တကိုယ်တော်ရှိုး Arrival One Man Show ကို စတင်ပြီးတော့ လှည့်လည်နေတာ ပြည်နယ်အနံှ - အဲဒီဖျော်ဖြေပွဲတွေ ဖြစ်လာတဲ့အကြောင်းလေးကို ပြောပြပါ။
ဖြေ ။ ။ ကျနော်က အမေရိကမှာ သုံးနှစ်လောက် ခေတ္တလာရောက်နေထိုင်ဖို့ အစီအစဉ်ရှိတယ်။ အဲဒီလို အစီအစဉ်ရှိတော့ ဒီလိုလာတဲ့အချိန်မှာ ရောက်ခါစမှာ ကျနော့်ရဲ့ တကိုယ်တော်ရှိုးတွေကို အမေရိကရဲ့ မြို့ကြီးတွေမှာ ကျင်းပဖို့ လွန်ခဲ့တဲ့ (၁) နှစ်လောက်ကတည်းက ကျနော်တို့ စီစဉ်နေတာ၊ စီစဉ်ပြီးတော့ ကျနော် ဒီမြို့အသီးသီးမှာရှိတဲ့ ကျနော့်ရဲ့ သူငယ်ချင်းတွေ၊ မိတ်ဆွေတွေကို Event Organizer အဖြစ် မေတ္တာရပ်ခံပြီးတော့ အမေရိကမှာရှိတဲ့ Major cities တွေမှာ “Arrival One Man Show” ခေါင်းစဉ်နဲ့ တကိုယ်တော်ပွဲတွေ လှည့်လည်သီဆိုနေတာပါ။
မေး ။ ။ အဲဒီတော့ အမေရိကန်မှာရှိနေတဲ့ မြန်မာပရိသတ်တွေနဲ့ ပြန်ပြီးထိတွေ့ခွင့်ရတာလေးက ဘယ်လိုရှိပါလဲ။
ဖြေ ။ ။ ကျနော်က ပြည်တွင်းမှာ မဆိုဖြစ်တာ ကြာပြီ။ ပြည်တွင်းမှာ မဆိုဖြစ်တာကြာတော့ ကျနော့်ရဲ့ Music, Musician Life ဂီတသမားဘဝ ဆက်လက်ပြီးထိန်းသိမ်းနိုင်ဖို့အတွက် ပြည်ပမှာ တခါတလေ ပွဲလေးတွေ ဆိုဖြစ်တယ်။ Australia, Singapore, Malaysia တို့မှာ ဆိုခဲ့တယ်။ အခုကြတော့ အမေရိကမှာ ဆိုတာပေါ့။ ဒီလိုမှ ပြည်တွင်းက ပရိသတ်က ကျနော် သီချင်းဆိုနေသေးတယ်ဆိုတာကို သူတို့သိရမယ်။ အမေရိကမှာကြတော့ ကျနော့်ကို အားပေးကြတဲ့ ပရိသတ်ပေါင်းများစွာ မြို့ပေါင်းများစွာမှာရှိတဲ့ ကျနော့်မိတ်ဆွေပရိသတ်တွေနဲ့ ပြန်လည်ဆုံဆည်းခွင့်လည်းရတော့ နောက်ပြီး ကျနော့်ရဲ့ Income လေးလည်း ကျနော် လူမှုရေးသမားဘဝ၊ Actvist သမားဘဝ ဆယ်နှစ်လောက် ဖြတ်သန်းပြီးတော့ Income လေးလည်း လိုတာနဲ့ ဒီမှာ ဒီပွဲစဉ်တွေကို ကျင်းပဖြစ်တာပါ။
မေး ။ ။ ဒါနဲ့ ဒါက တကိုယ်တော်ပွဲစဉ်ပေါ့။ ဒါနဲ့ မြန်မာနိုင်ငံကနေ ကိုဆောင်းဦးလှိုင် ထွက်လာတာ ဘယ်လောက်ကြာပြီလဲ။ နှစ်ပေါင်းဘယ်လောက် ရှိပြီလဲ။
ဖြေ ။ ။ ကျနော် မြန်မာပြည်က ထွက်လာတာ (၅) နှစ်ကျော်သွားပြီ။
မေး ။ ။ ဒီကြားထဲမှာ မြန်မာပြည်ကို ပြန်ဖြစ်သေးလား။
ဖြေ ။ ။ ကျနော့်အဖေ ကျန်းမာရေးကြောင့် တစ်ရက်နှစ်ရက်ပဲ ဒီကြားထဲမှာ ပြန်ဖြစ်တယ်။ အဲဒီ တစ်ရက်နှစ်ရက်ကလည်း သိုသိုသိပ်သိပ်ပါ - အဖေကို သွားကြည့်ပြီးတော့ ပြန်လာခဲ့တာပါ။
မေး ။ ။ အဲဒီတော့ ကိုဆောင်းဦးလှိုင် ပြည်ပမှာ တောက်လျှောက်နေနေတဲ့ ကာလအတွင်း ကိုဆောင်းဦးလှိုင်ရဲ့ အနုပညာ - အထူးသဖြင့် ကိုဆောင်းဦးလှိုင်က တေးဆိုသာမက၊ အထူးသဖြင့် နာမည်ကြီးတာက ကိုယ်ပိုင်တေးသီချင်းတွေကို ရေးတဲ့နေရာမှာ အပုဒ်ပေါင်းများစွာမှာ ကိုယ်ပိုင်သီချင်းအဖြစ်ကို ရေးသားနိုင်ခဲ့တယ်။ နောက်ပြီးတော့ ဒီလိုနာမည်ကြီး အဆိုတော်တေးရေးဆရာလည်း ဖြစ်တော့ ပြည်ပမှာ နေထိုင်နေတဲ့အချိန်မှာ ဒီလိုအနုပညာ ဖန်တီးမှုတွေကို ဆက်လုပ်ဖြစ်လား။
ဖြေ ။ ။ အခုခေတ်ကတော့ ပြောင်းလဲသွားပြီ။ ကျနော်တို့က ပြည်တွင်းမှာ နေထိုင်လား၊ ပြည်ပမှာ နေထိုင်လား ဆိုတဲ့ စည်းတွေခြားနာခြင်း မရှိတော့ဘူး။ Social Media ခေတ်၊ Internet, Online ပေါ်မှာ activities တွေ အများကြီးလုပ်နိုင်ကြတယ်။ ကျနော့်ပရိသတ်တွေက Online ပေါ်က ကျနော့်သီချင်းတွေကို ကြည့်ရှုနိုင်ကြတယ်။ အဲဒါတွေက Free - ဒါမှ ကျနော့်ပရိသတ်က ကျနော် သီချင်းတချို့ကို ဆက်လက်လုပ်နေဆဲဆိုတာကို သူတို့ သတိထားမိမယ်။ နားဆင်ခွင့်ရမယ်ဆိုတော့ အဲဒီ activities တွေကိုတော့ တော်တော်များများ လုပ်ဖြစ်ခဲ့ပါတယ်။ ပြီးခဲ့တဲ့ (၅) နှစ်မှာ ပြည်တွင်းကို မပြန်ဖြစ်ပေမယ့် လုပ်ဖြစ်ပါတယ်။
မေး ။ ။ အဲဒီမှာ ကိုယ်ပိုင်တေးသီချင်းတွေထဲမှာ ဒေါ်အောင်ဆန်းစုကြည်တို့ ၂၀၁၅ မဲဆွယ်စည်းရုံးရေးကာလ'မှာ ‘မေမေနိုင်မှ ဖြစ်မှာပါ’ သီချင်းလိုမျိုး။ နောက်တခါ ဒေါ်အောင်ဆန်းစုကြည် အကျယ်ချုပ်၊ မြန်မာနိုင်ငံမှာ ဖိနှိပ်ခံကာလတုန်းက ‘မျှော်လင့်ချက် တစုံတရာ’ - နောက် ဒေါ်အောင်ဆန်းစုကြည်ကို ရည်ရွယ်ပြီးတော့ ဆိုခဲ့တဲ့ ‘မေမေနိုင်မှ ဖြစ်မှာပါ’ နိုင်ငံရေးဆန်တဲ့ တေးသီချင်းမျိုးတွေကို ကိုဆောင်းဦးလှိုင် နောက်ပိုင်းမှာ တော်တော်လေး ခေတ်စနစ်ကို ထင်ဟပ်စေတဲ့ ကိုယ်ပိုင်သီချင်းတွေ ရေးလာတာလည်း တွေ့ရတယ်။ အရင်တုန်းက အချစ်သီချင်းနဲ့ နာမည်ကြီးခဲ့သူပေါ့။ အဲဒီလိုမျိုး ခေတ်စနစ်နဲ့အညီ ကိုယ်ပိုင်တေးသီချင်းတွေ ဒီလိုပြောင်းလဲပြီးတော့ အဲဒီလို ရေးလာနိုင်တဲ့ အခြေအနေ၊ အနေအထားကိုလည်း ပြောပြပါ။
ဖြေ ။ ။ ငယ်စဉ်ကတော့ မြန်မာနိုင်ငံမှာ စာပေစီစစ်ရေးဆိုတာ ရှိတယ်။ ကျနော်တို့ တေးသီချင်းတွေက ဆင်ဆာဖြတ်ရတယ်။ ဖြတ်ရတဲ့အခါကြတော့ ကျနော်တို့က နိုင်ငံရေး၊ ဘာသာရေးတို့ အဲဒီလိုမျိုးတွေ ကျနော်တို့ ရေးလို့မရဘူး။ အချစ်သီချင်းကိုပဲ ကျနော်တို့က အခြေခံရေးရတယ်။ ဒါမှ သူတို့က ထုတ်ဝေခွင့်ပြုတယ်။ အဲဒါကြောင့် မြန်မာ့ဂီတလောကမှာ အချစ်သီချင်းတွေကပဲ နှစ်ပေါင်းများစွာ လွှမ်းမိုးထားတယ်။ နောက် တိုင်းပြည်အပြောင်းအလဲဖြစ်လာတဲ့အခါ ကျနော်တို့ အနုပညာသမားတွေက တတတ်တအား ပါဝင်ရတယ်။ ပါဝင်ပြီးတော့ နိုးဆော်ရတယ်၊ လှုံဆော်ရတဲ့ကဏ္ဍတွေ ရှိတဲ့အခါကြတော့ အဲဒီအချိန်မှာပဲ ကျနော်က အသက်အရွယ်ကလည်း မငယ်တော့ဘူး၊ ရင့်ကြတ်လာခဲ့ပြီဆိုတော့ တိုင်းရေးပြည်ရေးလည်း စိတ်ဝင်စားတယ်။ ကျနော်က ရှစ်ဆယ့်ရှစ်တုန်းက ဆေးတက္ကသိုလ် (၁) ကျောင်းသား။ ကျနော်တို့က နိုင်ငံရေးလှုပ်ရှားမှုထဲမှာ ကိုယ်တိုင်ပါဝင်ခဲ့တဲ့အပြင် စိတ်ဝင်စားမှုကလည်း တအားရှိတယ်။ ရှိတယ်ဆိုတော့ ဒါကြောင့် ဒီအရွယ်မှာ အချစ်သီချင်းထက်စာရင် အခုနလို အများပြည်သူ နိုးဆော်ရေး၊ အများပြည်သူရဲ့ နိုင်ငံရေးအမြင်၊ လူမှုရေးအမြင်၊ ခံယူချက် အစရှိတာတွေကို ကျနော်က တစုံတခုနည်းနဲ့ တိုက်တွန်းနိုးဆော်ဖို့ - အကောင်းဘက်တွေ ကျနော်တို့ ဖြစ်စေချင်တဲ့ နိုင်ငံကို ကောင်းစေချင်တဲ့ ဒီမိုကရေစီနိုင်ငံ ဖြစ်စေချင်တဲ့ စေတနာတွေနဲ့ ဦးတည်ပြီးရေးတော့ အချစ်သီချင်းတွေ နည်းသွားပြီ၊ နိုင်ငံရေး၊ လူမှုရေး ရှုထောင့်ကသီချင်းတွေ များသွားတာပါ။
ဒါပေမဲ့ ဒါတွေကို ပြန်ပြောရရင်တော့ တိုင်းပြည်လေးအတွက် ထိုက်သင့်တဲ့ လိုအပ်တဲ့အချိန်မှာ ထိုက်သင့်တဲ့ သီချင်းလေးတွေ ထုတ်လုပ်နိုင်ခဲ့ပေမယ့် ဒီလိုသီချင်းတွေက ‘မျှော်လင့်ချက် တစံတရာ’ ကတော့ မဆိုပါဘူး။ ဒါပေမဲ့ ‘မေမေနိုင်မှ ဖြစ်မယ်’ ဆိုတဲ့ သီချင်းမျိုးက နေ့တိုင်းနားထောင်လို့ကောင်းတဲ့ သီချင်မျိုး မဟုတ်ဘူး။ ရွေးကောက်ပွဲရှိရင်၊ နိုင်ငံရေးလှုပ်ရှားမှုတွေ များပြားတဲ့အချိန်မှာပဲ နားထောင်လို့ကောင်းတဲ့ သီချင်းဆိုတော့ နေ့တဓုဝ နားထောင်တဲ့ သီချင်းမဟုတ်တော့ ဒါတွေ လုပ်ခဲ့သော်ငြားလဲ အချိန်ကာလအပိုင်းအခြားတခုအထိပဲ ဒီသီချင်းတွေက ပရိသတ်အတွက်တော့ အကျိုးရှိခဲ့တာမျိုး ရှိရင်ရှိခဲ့မယ်.။ အချိန်ကာလ အပိုင်းအခြားတခုအထိပါပဲ။
မေး ။ ။ အခုအထိ တေးသီချင်းပေါင်း အပုဒ်ပေါင်း ဘယ်လောက်အထိ ရေးခဲ့ပြီးပြီလဲ။
ဖြေ ။ ။ တစ်ထောင်ကျော်သွားပြီ။
မေး ။ ။ အဲဒါ နှစ်ပေါင်း ဘယ်နှစ်နှစ်လောက်ပါလဲ။
ဖြေ ။ ။ ကျနော် (၁၈) နှစ်ကျော်က စရေးတယ်ဆိုရင် နှစ်ပေါင်း (၃၀) နီးပါး ရှိသွားပါပြီ။
မေး ။ ။ အဲဒီအထဲမှာ ကိုယ်ပိုင်တေးသီချင်းတွေထဲမှာ နောက်ပိုင်းကိုယ်ကိုယ်တိုင် အားအရဆုံး - ဒါကတော့ အနုပညာရှင်တဦးအနေနဲ့တော့ ကိုယ်ဖန်တီးခဲ့တဲ့ တေးသီချင်းတွေကိုတော့ အားရတယ်။ အခုကိုယ်ကိုယ်တိုင် အားအရဆုံးနဲ့ တကယ့်ကို ကိုယ့်စိတ်ကြိုက် ဖန်တီးခဲ့တဲ့ အပုဒ်အတွက်က ဘာလဲ။
ဖြေ ။ ။ အဲဒီမေးခွန်းလေးတွေ မေးရင် ကျနော်အမြဲဖြေလေ့ရှိပါတယ်။ ကျနော် ရေးလိုက်တဲ့ သီချင်းလေးတွေက ကျနော့်သားသမီးတွေပဲ။ အဲဒီတော့ ဘယ်သူက ပိုလှတယ်၊ ဘယ်သူကတော့ ရုပ်ဆိုးတယ်ပြောဖို့ ခက်တာပေါ့။ သို့သော် ကျနော်လည်း အားရ ပိုပြီးအားရကျေနပ်တဲ့ ပရိသတ်နဲ့ တသားတည်းကျတဲ့ သီချင်းတွေတော့ အများကြီးရှိပါတယ်။ အဲဒီသီချင်းတွေထဲကပဲ အခုလာမယ့် မယ်ရီလန်းမှာ ပွဲတပွဲ ကျနော် မကြာခင်ဆိုမယ်။ ဇွန်လ (၈) ရက်နေ့မှာဆိုမယ့်ပွဲမှာ ကျနော့်ရဲ့ ပရိသတ်နဲ့ တသားတည်းကျတဲ့ ကျနော်လည်း စိတ်တိုင်းကျတဲ့ သီချင်းပေါင်းများစွာကို သီဆိုပါတယ်။ တစ်ထောင်ထဲမှာမှ ကျနော် စိတ်တိုင်းကျတဲ့ သီချင်းတွေလည်း ရှိခဲ့သလို၊ စိတ်တိုင်းကျသော်လဲ မအောင်မြင်တဲ့ သီချင်းတွေလည်း ရှိပါတယ်။ တခါတလေကြတော့လဲ ကိုယ်ငယ်စဉ်က ထင်တော့ထင်ခဲ့တယ် ကောင်းပါတယ်လို့ - ထင်ပြီးတော့ ရေးခဲ့တယ်။ ဒါပေမဲ့ ဒီအချိန်ကြတော့ သိပ်ပြီးအားမရတာလည်း ရှိတယ်။
မေး ။ ။ ကိုဆောင်းဦးလှိုင်က တေးသီချင်၊ အနုပညာရှင်တဦးအနေနဲ့ စစ်အာဏာရှင်စနစ်ကိုလည်း ဖြတ်သန်းခဲ့ရတယ်။ အခုဆိုရင် ကျမတို့နိုင်ငံမှာ ဒီမိုကရေစီ အပြောင်းအလဲ၊ ဒေါ်အောင်ဆန်းစုကြည် ဦးဆောင်နေတဲ့ အရပ်သားအစိုးရ တက်လာတဲ့ ဒီလို ခေတ်စနစ်တခုကာလကို ဖြတ်သန်းလာတဲ့ တေးရေးအနုပညာရှင်တဦးအနေနဲ့ အခု ဘယ်လိုသုံးသပ်လဲ။ နိုင်ငံရဲ့ အခြေအနေနဲ့ နောက်ပြီးတော့ ကိုဆောင်းဦးလှိုင်ရဲ့ အနုပညာ ဖန်တီးမှုနဲ့အတူ နိုင်ငံရဲ့ အခြေအနေ။
ဖြေ ။ ။ ကျနော်တို့ လေ့လာဆည်းပူးသလောက် ပြည်တွင်းမှာကော - ကျနော်ဆို အခု ပြည်ပနိုင်ငံတွေ အတော်များများကို သွားခွင့်ရတယ်။ ဒီလိုပဲ လျှောက်သွားနေတယ်။ အဲဒီအခါကြတော့ ကျနော်တို့ အခုလောလောဆယ် မြင်နေရတဲ့ အနေအထားလေးကတော့ ကျနော်တို့ မြန်မာလူမျိုးတွေက အတော်လေး စိတ်ဝမ်းကွဲနေကြတယ်။ မြန်မာနိုင်ငံသားတွေလို့ ပြောရမှာပေါ့။ ဥပမာ ဗမာလူမျိုးအချင်းချင်းတောင်မှ ပြည်ပမှာဆိုရင် ဘုန်းကြီးကျောင်း (အေ) နဲ့ ဘုန်းကြီးကျောင်း (ဘီ) က သိပ်ပြီးတော့ ကွန်မြူနီတီမှာ သဟဇာတ မဖြစ်တာမျိုး။ တယောက်နဲ့တယောက် ပေါင်းသင်းဆက်ဆံရေး အဆင်မပြေမှု ဖြစ်နေတာမျိုးတွေ တွေ့ရတယ်။
တိုင်းရင်းသားတွေဆိုရင် ဗမာလူမျိုးတွေကို နည်းနည်းနာကြင်နေတာကို သတိထားမိတယ်။ သို့သော် ကျနော်က အမြဲလဲရှင်းပြတယ် အားလုံးကို ဒီစစ်အာဏာရှင်တွေအနေနဲ့ ကျနော်တို့ ဗမာလူမျိုး ဗုဒ္ဓဘာသာတွေနဲ့ ခွဲခြားပြီးမြင်ပေးကြဖို့ ကျနော်တို့လည်း အနှိပ်စက်ခံခဲ့ရတဲ့ လူမျိုးထဲမှာ ပါတယ်။ ပါတယ်ဆိုတော့ အဲဒီအချက်အလက်တွေကို အခုကျနော် လေ့လာသလောက်တော့ ပိုပြီးတော့ စိတ်ဝမ်းကွဲလာတဲ့ အခြေအနေကတော့ ဘယ်သူမှ ငြင်းချက်ထုတ်လို့ရတဲ့ အခြေအနေမျိုး မရှိဘူး။ ကျနော်ဆိုရင် အမေရိကလို နိုင်ငံမျိုး၊ တခြားနိုင်ငံခြားမှာ သွားဆိုတာကို ကျနော်ကို ဘယ်ဘာသာဝင်လဲ။ ဘာလူမျိုးလဲ။ သူတို့နဲ့ လူမျိုးချင်းတူရင် လာကြည့်မယ်။ သူတို့နဲ့ ဘာသာချင်းတူရင် လာကြည့်မယ်။ မတူရင်တော့ sorry ပါပဲဆိုပြီး အဖြစ်အပျက်တွေက တော်တော်လေးကို ဖြစ်ခဲ့တယ်။ ကျနော်ဆိုရင် ကံကောင်းပြီး အမေရိကမှာ တယောက်ထဲဆိုတယ် - ထိုက်သင့်တဲ့ အောင်မြင်မှုလေးတော့ ရခဲ့တယ်။ ဒါပေမဲ့ စိတ်ဝမ်းကွဲနေတဲ့ အနေအထားတွေလည်း အများကြီး ကျနော်တို့ လေ့လာသိရှိခဲ့ရတယ်။ ဒါကတော့ နိုင်ငံခေါင်းဆောင်တွေ၊ နိုင်ငံရေးခေါင်းဆောင်တွေ၊ တိုင်းရင်းသားခေါင်းဆောင်တွေအားလုံး သတိထားရမယ့် အချက်ကလေး ဖြစ်ပါတယ်။ စိတ်ဝမ်းကွဲတာ ပိုပြီးတော့ ဆိုးလာခဲ့တယ်ဆိုတဲ့ Message လေးတော့ ပေးချင်ပါတယ်။
မေး ။ ။ ကျေးဇူးအများကြီးတင်ပါတယ်။
