အမေရိကန် သမ္မတ ဂျိုးဘိုင်ဒန်နဲ့ တရုတ် သမ္မတ ရှီကျင့်ဖျင်တို့ စနေနေ့ တွေ့ဆုံပွဲ မတိုင်မီ အမေရိကန် ပြည်ထောင်စုအနေနဲ့ "တရုတ်တနိုင်ငံတည်းမူကို" လေးစားလိုက်နာဖို့၊ ထိုင်ဝမ်သမ္မတ Lai ရဲ့ ပစိဖိတ်ဒေသ အတွင်း ခရီးစဥ်မှာ အမေရိကန်ကို ခရီးတထောက် နားခွင့်မပြုဖို့ နဲ့ "တရုတ်-အမေရိကန် ဆက်ဆံရေး ကောင်းမွန် ခိုင်မာစေရေး” တောင်းဆိုကြောင်း တရုတ်နိုင်ငံခြားရေးဌာန ပြောရေးဆိုခွင့်ရှိသူ Lin Jian က သောကြာနေ့မှာ သတင်းထောက်တွေကို ပြောပါတယ်။
ဒါဟာ အမေရိကန်နိုင်ငံခြားရေးဝန်ကြီး အန်ထိုနီ ဘလင်ကန်က ပီရူးနိုင်ငံ လီမာမြို့မှာ ကျင်းပတဲ့ အာရှ-ပစိဖိတ် စီးပွားရေး ပူးပေါင်းဆောင်ရွက်မှု (APEC) ထိပ်သီးအစည်းအဝေး မတိုင်မီ အစည်းအဝေးကို တက်ရောက်လာတဲ့ ထိုင်ဝမ် ကိုယ်စားလှယ် Lin Hsin-I နဲ့ တွေ့ဆုံ အပြီးမှာလည်း ဖြစ်ပါတယ်။ ကြိုတင် တရားဝင် ထုတ်ပြန်ကြေညာထားခြင်း မရှိတဲ့ ကြာသပတေးနေ့က တွေ့ဆုံမှုက မိနစ် ၂၀ လောက် ကြာပြီး စီးပွားရေး ပူးပေါင်းဆောင်ရွက်မှုနဲ့ ပွင့်လင်း တက်ကြွ ငြိမ်းချမ်းတဲ့ အင်ဒို-ပစိဖိတ်ဒေသ ဖြစ်ပေါ်ရေး ဘုံတူညီ မျှဝေတဲ့ ကတိကဝတ်တွေ အကြောင်း အဓိကထား ဆွေးနွေးခဲ့ကြကြောင်း ဝန်ကြီး ဘလင်ကန်က X လူမှုကွန်ရက်မှာ သတင်းထုတ်ပြန်ပါတယ်။
“အရေးကြီးတဲ့ စီးပွားရေး ပူးပေါင်းဆောင်ရွက်မှုကို ဆွေးနွေးခဲ့တယ်” လို့ အစည်းအဝေးမှာ ပါဝင်ခဲ့တဲ့ အရှေ့အာရှနှင့် ပစိဖိတ်ရေးရာ လက်ထောက် နိုင်ငံခြားရေးဝန်ကြီး Daniel Kritenbrink က ကြာသပတေးနေ့နှောင်းပိုင်း ဖုန်းကတဆင့် ပြုလုပ်တဲ့ သတင်းစာရှင်းလင်းပွဲအတွင်း သတင်းထောက်တွေကို ပြောပါတယ်။ ထိုင်ဝမ် ရဲ့ ထုတ်ပြန်ချက်ထဲမှာ အမေရိကန်-တိုင်ဝမ် မိတ်ဖက်ဆက်ဆံရေးကို အားကောင်းလာစေဖို့နဲ့ ဒေသတွင်း ငြိမ်းချမ်းရေးနဲ့ တည်ငြိမ်ရေးအတွက် မဟာဗျူဟာများကို ဆွေးနွေးခဲ့ကြကြောင်း ပြောပါတယ်။
ဝန်ကြီး ဘလင်ကန်နဲ့ တွေ့ဆုံခဲ့တဲ့ Lin ဟာ ထိုင်ဝမ်ရဲ့ ဒုတိယဝန်ကြီးချုပ်ဟောင်းလည်း ဖြစ်ခဲ့သလို သမ္မတ Lai Ching-te ရဲ့ အကြီးတန်း သမ္မတအကြံပေးတဦးဖြစ်ပြီး ပီရူးနိုင်ငံမှာ ကျင်းပတဲ့ ဒီနှစ် APEC ခေါင်းဆောင်များ အစည်းအဝေးကို ထိုင်ဝမ်ကိုယ်စားပြုပြီး တက်ရောက်လာတာပါ။
တချိန်တည်းမှာပဲ ကမ္ဘာ့ထိပ်တန်း အဆင့်မြင့် တပိုင်း လျှပ်ကူး ပစ္စည်း ထုတ်လုပ်သူ ထိုင်ဝမ် ကုမ္ပဏီ ဖြစ်တဲ့ ထိုင်ဝမ် ဆီမီးကွန်ဒတ်တာ ကုမ္ပဏီ (TSMC) က ချစ်ပ်ပြား နဲ့ သိပ္ပံ ဆိုင်ရာ အက်ဥပဒေ အောက်က ရန်ပုံငွေ ဒေါ်လာ ၆.၆ ဘီလီယံ ရရှိမယ်လို့ သောကြာနေ့က အိမ်ဖြူတော်မှာ ကြေညာပါတယ်။
ဒါက အရီဇိုးနားပြည်နယ်မှာ စက်ရုံ ၃ ခုတည်ဆောက်မယ့် TSMC ရဲ့ ဒေါ်လာ ၆၅ ဘီလီယံရင်းနှီးမြုပ်နှံမှုကို အထောက်အပံ့ပေးမှာ ဖြစ်ပြီး လာမယ့် ဆယ်စုနှစ်ထဲမှာ သောင်းနဲ့ချီတဲ့ အလုပ်အကိုင်တွေကို ဖန်တီးပေးမှာ ဖြစ်ပါတယ်။ ထိုင်ဝမ်ရဲ့ ရင်းနှီးမြှုပ်နှံမှုဟာ အမေရိကန်သမိုင်းမှာ လုံးဝအသစ်ဖြစ်တဲ့ စီမံကိန်း တခု အနေနဲ့ အကြီးမားဆုံး နိုင်ငံခြားတိုက်ရိုက်ရင်းနှီးမြှုပ်နှံမှုလို့ အိမ်ဖြူတော်က သတင်းထုတ်ပြန်ပါတယ်။
Forum