သမ္မတဖြစ်တာကြောင့် ၂၀၂၀ ရွေးကောက်ပွဲကို ဥပဒေမဲ့ပယ်ဖျက်ဖို့ ကြံစည်ခဲ့တယ်ဆိုတဲ့ စွဲဆိုခြင်းကနေ မစ္စတာထရမ့်မှာ ကင်းလွတ်ခွင့်မရှိဘူးလို့ ဝါရှင်တန် အယူခံတရားရုံးက အင်္ဂါနေ့မှာ တညီတညွတ်တည်း ဆုံးဖြတ်လိုက်ပါတယ်။
သမ္မတအဖြစ် တာဝန်ရှိစဥ် နောက်ဆုံးရက်တွေမှာလုပ်ခဲ့တာကြောင့် သမ္မတတယောက်ရဲ့ တာဝန်ဝတ္တရားတွေနဲ့ ဆက်စပ်နေပြီး သမ္မတကိုတရားစွဲဆိုလို့ မရတဲ့အတွက် ဒီအမှုကိုစွဲဆိုမရကြောင်း မစ္စတာထရမ့်နဲ့ သူ့ရှေ့နေတွေက လျှောက်ထားခဲ့ကြတာပါ။
တရားရုံးမှာ တရားသူကြီးသုံးယောက်ထိုင်ပြီး သုံးမဲ-သုညမဲနဲ့ ဆုံးဖြတ်ခဲ့တာဖြစ်ပါတယ်။ သမ္မတဟောင်း မစ္စတာထရမ့်ဟာ သာမန်နိုင်ငံသားတယောက်ဖြစ်လာပြီး အခြားသော ရာဇဝတ်ကြောင်းအရ စွဲဆိုခံရသူအားလုံး ခုခံသလို ခုခံရမှာဖြစ်တယ်လို့ တရားရုံးက ဆိုပါတယ်။ ရွေးကောက်ပွဲကို လွှတ်တော်ကအတည်ပြုရာမှာ ဖီလာကန့်လန့်လုပ်ဖို့ ဒုတိယသမ္မတအပြင် ပြည်နယ် ရွေးကောက်ပွဲတာဝန်ရှိသူတွေနဲ့ တရားရေးဌာနကို ဖိအားပေးခဲ့ပြီး မဲမသမာမှု ရှိတယ်လို့ မှားယွင်းစွာ ပြောဆိုခဲ့ကြောင်း အစိုးရအထူးရှေ့နေ မစ္စတာ ဂျက်စမစ် က မစ္စတာထရမ့်ကို တရားစွဲဆိုခဲ့တာပါ။
သမ္မတဟောင်း ထရမ့်ဟာ စွဲဆိုချက်ပေါင်း ၉၁ ခုနဲ့ ဒီအမှုအပြင် အခြား ရာဇဝတ်မှု ၃ မှုကိုလည်း ရင်ဆိုင်နေရပါတယ်။ "အမှားမလုပ်ခဲ့ဘူး" လို့ မစ္စတာ ထရမ့်ကတော့ ပြောပါတယ်။
