ဂျပန်နိုင်ငံသား Toru Kubota ကို အမြန်ဆုံး ပြန်လွှတ်ပေးဖို့ ဂျပန် အစိုးရတောင်းဆို

Mr. Kubota ကို အမြန်ဆုံး ပြန်လည်လွှတ်ပေးဖို့ မြန်မာအာဏာပိုင်တွေကို ဂျပန်အစိုးရ က ဆက်လက် တိုက်တွန်း တောင်းဆိုသွားပါ့မယ်။ ဂျပန်နိုင်ငံသားတွေကို အကာအကွယ်ပေးရေး အရ၊ သံရုံး ကောင်စစ်ဝင်နဲ့ တွေ့ဆုံနိုင်တာမျိုး ကျနော်တို့ဘက်က စီစဉ်ထားသလို သူ့မိသားစုနဲ ဆက်သွယ်တာမျိုးတွေ ပံ့ပိုးပေးနေပါတယ်။ လိုအပ်တဲ့ ပံ့ပိုးမှုတွေကို အတတ်နိုင်ဆုံး ဆက်ပေးသွားမှာပါလို့ ဂျပန် အစိုးရဝန်ကြီးအဖွဲ့၊ ဒုတိယ အတွင်းဝန်ချုပ် Yoshihiko Isozaki က ဒီနေ့ တိုကျိုမှာကျင်းပတဲ့သတင်းစာရှင်းလင်းပွဲမှာ ပြောဆိုသွားတာပါတယ်။
Toru Kubota ရဲ့ ကျန်းမာရေး အခြေအနေ ကောင်းမွန်တဲ့အကြောင်းနဲ့ အောက်တိုဘာလ ၅ ရက်နေ့က သူ့ရှေ့နေနဲ့ တွေ့ခွင့်ရခဲ့တဲ့အကြောင်း oshihiko Isozaki က ပြောပါတယ်။ ကျန်းမာရေး ထူးထူးခြားခြား စိုးရိမ်စရာ မရှိဘူးလို့လည်း ပြောဆိုသွားပါတယ်။
Toru Kubota အပေါ် စွဲဆိုထားတဲ့ တပ်မတော်ပြိုကွဲ အကြည်ညို ပျက်အောင် လှုံ့ဆော် လုပ်ဆောင်မှု ပုဒ်မ ၅၀၅-က နဲ့ အီလက်ထရောနစ် ဆက်သွယ်ရေး ဥပဒေပုဒ်မတွေအတွက် ထောင်ဒဏ် ၇ နှစ် မနေ့က ပြစ်ဒဏ်ချမှတ်ခဲ့တာပါ။ ဒီအမှုတွေကို စတင်စစ်ဆေးတဲ့ သြဂုတ်လအတွင်းကပဲ မြန်မာနိုင်ငံဆိုင်ရာ ဂျပန်သံအမတ်ကြီးနဲ့ Toru Kubota တို့ တယ်လီဖုံးဆက်စကားပြော ခွင့်ရခဲ့ပါတယ်။ လူချင်းတွေ့ဆုံခွင့် ဂျပန်သံရုံးက တောင်းခံတာတော့ ကိုဗစ် 19 ရောဂါကာကွယ်ရေး စည်းမျဉ်းနဲ့ တခြားအကြောင်းတွေကြောင့်ဆိုပြီး စစ်ကောင်စီဘက်က ငြင်းဆိုထားတဲ့အကြောင်း ဂျပန်သံအရာရှိတွေက ပြောဆိုထားပါတယ်။