အစ္စရေး ဂါဇာစစ်ဆင်ရေး နေ့စဉ်လေးနာရီကြာ ရပ်ဆိုင်းပေးမည်

အစ္စရေးဘက်က ဂါဇာမြောက်ပိုင်းဒေသ စစ်ဆင်ရေးတွေကို အခုကြာသပတေးနေ့ကစပြီး နေ့စဉ် လေးနာရီကြာ ရပ်ဆိုင်းထားပေးမယ်လို့ အမေရိကန်သမ္မတအိမ်ဖြူတော်က ပြောပါတယ်။

အစ္စရေးတပ်တွေဟာ ဂါဇာမြို့မှာ ဟားမတ်စစ်သွေးကြွတွေကို စစ်ဆင်တိုက်ခိုက်နေတာကြောင့် ပါလက်စတိုင်းအရပ်သားအများအပြား အဲဒီဒေသကနေ စွန့်ခွာနေကြရတာပါ။ ဒီအချိန်မှာပဲ အစ္စရေးဘက်က တနေ့လေးနာရီ အပစ်ရပ်ထားမယ်လို့ အမေရိကန် အိမ်ဖြူတော် အမျိုးသားလုံခြုံရေးကောင်စီ ပြောခွင့်ရသူ John Kirby က ပြောဆိုလိုက်တာပါ။ ဒီလို ခဏတာ အပစ်ရပ်ပေးလိုက်တာကြောင့် လူသားစာနာမှုလမ်းကြောင်းတွေကို သုံးပြီး ပါလက်စတိုင်းတွေ ရှောင်တိမ်းထွက်ခွာဖို့ အချိန်ရမှာဖြစ်တယ်လို့လည်း John Kirby က ပြောပါတယ်။

အမေရိကန်သမ္မတ Joe Biden နဲ့ အစ္စရေးဝန်ကြီးချုပ် Benjamin Netanyhahu တို့ကြား ဆွေးနွေးမှုကနေ အခုလို အချိန်တိုစစ်ရပ်စဲထားဖို့ ဖြစ်လာပြီး ဒီအချိန်အတွင်းမှာတော့ ဘယ်စစ်ဆင်ရေးမှ ရှိမှာမဟုတ်ဘူးလို့ အစ္စရေးဘက်က ပြောတဲ့အကြောင်းလည်း ပြောပါတယ်။ လူပေါင်း ၁,၄၀၀ ကျော်သေဆုံးခဲ့ရတဲ့ အောက်တိုဘာလ ၇ ရက်နေ့ အကြမ်းဖက်တိုက်ခိုက်ခံရမှုဖြစ်ပြီးတဲ့နောက် အစ္စရေးဘက်က ဟားမတ်စ်တွေကို ပစ်မှတ်ထား စစ်ဆင်ခဲ့တာပါ။

ဟားမတ်စ်တွေက လူ ၂၄၀ လောက်ကို ပြန်ပေးဆွဲဖမ်းဆီးထားပါတယ်။ အမေရိကန်၊ ဗြိတိန်၊ အီးယူအပါအဝင် အနောက်နိုင်ငံအတော်များများဟာ ဟားမတ်စ်အဖွဲ့ကို အကြမ်းဖက်အဖွဲ့အစည်းအဖြစ် သတ်မှတ်ထားကြတာပါ။ အခုလို ယာယီအချိန်တို အပစ်ရပ်ထားမှုကြောင့် ထိခိုက်ဒဏ်ရာရတဲ့ အရပ်သားတွေနဲ့ နိုင်ငံခြားသားတွေ ဘေးလွတ်ရာရှောင်တိမ်းနိုင်ခွင့်ရဖို့ မျှော်လင့်ထားကြောင်း အရှေ့အလယ်ပိုင်းဒေသ လူသားချင်းစာနာမှုဆိုင်ရာအမေရိကန်အထူးသံအမတ် David Satterfield က ပြောပါတယ်။

အစ္စရေး ဂါဇာစစ်ဆင်ရေး နေ့စဉ်လေးနာရီကြာ ရပ်ဆိုင်းပေးမည်