US Open Tennis အမျိုးသမီး တဦးချင်း ချန်ပီယံလုပွဲကို အမေရိကန်နိုင်ငံ၊ နယူးယောက်မြို့မှာ ဒေသစံတော်ချိန် စနေနေ့ ညနေ က ယှဉ်ပြိုင် ကစားကြတာမှာ အမေရိကန်နိုင်ငံသူ Sloane Stephens က သူ့ရဲ့ပြိုင်ဘက် တနိုင်ငံထဲသူ Madison Keys ကို ၆-၃၊၆-၀ နှစ်ပွဲအပြတ်နဲ့နိုင်ပြီး ချန်ပီယံ ဖြစ်သွားပါတယ်။
ပွဲစဉ်တလျှောက်လုံး Sloane Stephens က အကွက်ကျကျ၊ တဘက်သတ် အသာစီးနဲ့ ကစားပြီး ချန်ပီယံဆုကို ဆွတ်ခူးသွားတာ ဖြစ်ပါတယ်။
၂၀၁၇ ခုနှစ်အတွက် အမျိုးသမီးတဦးချင်း ချန်ပီယံလုပွဲမှာ အမေရိကန်နိုင်ငံသူ အမျိုးသမီး ၂ ဦး ၁၅ နှစ်အတွင်း ပထမဆုံးအကြိမ် တွေ့ကြတာဖြစ်ပြီး ကမ္ဘာ့အဆင့် ၂၂ ရှိတဲ့ Sloane Stephens က ကမ္ဘာ့အဆင့် ၁၅ ရှိတဲ့ Madison Keys ကို အနိုင်ရလိုက်တာ ဖြစ်ပါတယ်။
တကယ်တော့ ဆီမီးဖိုင်နယ်ပွဲတွေမှာလည်း အမေရိကန်နိုင်ငံသူ အမျိုးသမီး ၄ ဦး ရှားရှားပါးပါး ထိပ်ဆုံးမှာ တွေ့ခဲ့ကြတာပါ။ Sloane Stephens က ပြိုင်ဘက် Venus Williams ကို အနိုင်ရပြီး ဗိုလ်လုပွဲ တက်လာတာ ဖြစ်သလို Madison Keys ဟာလည်း ပြိုင်ဘက် အမေရိကန်နိုင်ငံသူ Coco Vandeweghe (ဗန်ဒယ်ဝေး) ကို အနိုင်ရပြီး ဗိုလ်လုပွဲကို တက်လာတာ ဖြစ်ပါတယ်။
အမျိုသားတဦး ချန်ပီယံလုပွဲကိုတော့ ဒေသစံတော်ချိန် တနင်္ဂနွေနေ့ ညနေ ၄ နာရီ အချိန်မှာ စပိန်နိုင်ငံသား ကမ္ဘာ့အဆင့် ၁ Rafael Nadal နဲ့ တောင်အာဖရိကနိုင်ငံသား အဆင့် ၂၈ Kevin Anderson တို့ ယှဉ်ပြိုင်ကြမှာဖြစ်ပါတယ်။
Your browser doesn’t support HTML5
US Open အမျိုးသမီး တင်းနစ် Sloane Stephens ဗိုလ်စွဲ