အစ္စရေး-ဟားမတ်စ် ပဋိပက္ခအပါအဝင် ကမ္ဘာ့ စိန်ခေါ်ချက်တွေ ရှိနေပေမဲ့ အင်ဒိုပစိဖိတ်ဒေသကို အမေရိကန်က အဓိကထားပါတယ်လို့ အမေရိကန်နိုင်ငံခြားရေးဝန်ကြီးက ပြောပါတယ်။ တူရကီနိုင်ငံခြားရေးဝန်ကြီး ဟာကင်န် ဖီဒန် (Hakan Fidan) နဲ့ ၂ နာရီခွဲကြာ ဆွေးနွေးပြီးနောက် တူရကီနိုင်ငံရဲ့မြို့တော် အင်န်ကာရာလေဆိပ်မှာ အမေရိကန်နိုင်ငံခြားရေးဝန်ကြီး ဘလင်ကန်က ပြောလိုက်တာပါ။
“ဂါဇာ အကြပ်အတည်းအပေါ် ကြီးကြီးမားမား အာရုံစိုက်ထားတာတောင်မှ အင်ဒိုပစိဖိတ်နဲ့ ကမ္ဘာ့ တခြားနေရာတွေက အမေရိကန်ရဲ့ အကျိုးစီးပွါးကို မြှင့်တင်မယ့် အရေးကြီးလုပ်ငန်းတွေမှာ ကျနော်တို့ တန်းတူ အာရုံစိုက်လုပ်ဆောင်နေပါတယ်” လို့ မစ္စတာ ဘလင်ကန် က ပြောပါတယ်။
G-7 ခေါ် စက်မှုထိပ်သီး ၇ နိုင်ငံ နိုင်ငံခြားရေးဝန်ကြီးတွေရဲ့ အစည်းအဝေးကိုတက်ရောက်ဖို့ ဂျပန်နိုင်ငံ တိုကျိုမြို့ကို အင်္ဂါနေ့ မှာ မစ္စတာဘလင်ကန်ရောက်လာမှာပါ။ ဒီ အစည်းအဝေးမှာ မကြာမီက သူ သွားခဲ့တဲ့ အရှေ့အလယ်ပိုင်းခရီးစဥ်အကြောင်းကို ရှင်းလင်းတင်ပြဖို့ အစီအစဥ်ရှိတယ်လို့ သူက ဆိုပါတယ်။ ဂျပန်နိုင်ငံက G-7 အဖွဲ့ရဲ့ ဒီနှစ်သဘာပတိဖြစ်ပါတယ်။
ဂျပန်ဝန်ကြီးချုပ် ဖူမီအိုကီရှီဒါ Fumio Kishida နဲ့ နိုင်ငံခြားရေးဝန်ကြီး ယိုကို ကာမီကာဝါး Yoko Kamikawa တို့ နဲ့ မစ္စတာ ဘလင်ကန်တွေ့ဆုံတဲ့အခါ ဒေသတွင်းလုံခြုံရေးအပြင် ယူကရိန်း စီးပွါးရေး နာလန်ထူရေးနဲ့ စွမ်းအင်လိုအပ်ချက်တွေက အဓိက ဆွေးနွေးကြမယ့်အကြောင်းရပ်တွေ ဖြစ်ပါတယ်။
Your browser doesn’t support HTML5
“ကမ္ဘာ့စိန်ခေါ်ချက်တွေရှိပေမယ့် အင်ဒိုပစိဖိတ်ဒေသအလေးထား”ကန် နိုင်ငံခြားရေးဝန်ကြီး