အမေရိကန်ပြည်ထောင်စု နယူးဂျာစီပြည်နယ်ကို ဗဟိုပြုပြီး ၄.၈ ပြင်းအားနဲ့ ငလျင်လှုပ်ခဲ့တယ်လို့ အမေရိကန်ဘူဗိဗေဒတိုင်းတာရေးဌာနက ပြောပါတယ်။ လှုပ်ခတ်သွားတဲ့ ငလျင်ဒဏ်ကို နယူးဂျာစီနဲ့ ကပ်နေတဲ့ နယူးယောက်မြို့တချို့နေရာတွေအထိ ခံစားခဲ့ရပါတယ်။
နယူးယောက်မြို့ကုလသမဂ္ဂဌာနချုပ်မှာ ဂါဇာအရေးဆွေးနွေးနေတဲ့ လုံခြုံရေးကောင်စီအစည်းအဝေးကို ငလျင်လှုပ်လို့ ယာယီရပ်ခဲ့ရပါတယ်။ နယူးယောက်ရဲ့ အထင်ကရ Empire State အဆောက်အဦးကြီးကတော့ ဘာမှ ထိခိုက်မှုမရှိဘူးဆိုတဲ့သဘော "I AM FINE" လို့ X လူမှုကွန်ရက်မှာ ရေးတင်ခဲ့ပါတယ်။ Brooklyn အရပ်က အဆောက်အဦးတချို့တော့ ငလျင်လှုပ်ခတ်သွားတာကို သိသိသာသာ ခံစားခဲ့ရတယ်လို့ အဲဒီမှာ ရှိနေသူတွေက ပြောပါတယ်။ New Jersey ပြည်နယ် နဲ့ကပ်နေတဲ့ Pennsylvania ပြည်နယ် Philadelphia မြို့အထိ ငလျင်လှုပ်တာ ခံစားရတယ်လို့ လူမှုကွန်ရက်တွေမှာ ရေးသားနေကြပါတယ်။