ကမ္ဘာမှာ စစ်ပွဲတွေ၊ ဖိနှိပ်မှုတွေနဲ့ လူ့အခွင့်အရေးချိုးဖောက်မှုတွေကြောင့် နေရပ်စွန့်ရသူအရေအတွက်ဟာ စက်တင်ဘာလကုန်မှာ ၁၁၄ သန်းကျော်သွားပြီလို့ ကုလသမဂ္ဂ ဒုက္ခသည်များအေဂျင်စီ UNHCR က ပြောကြားလိုက်ပါတယ်။ ၂၀၂၃ ခုနှစ် နှစ်လယ်ပိုင်းအထိ လူတွေ နေရပ်စွန့်ထွက်ပြေးရတဲ့ အဓိက အကြောင်းတွေက ယူကရိန်းစစ်ပွဲ၊ ဆူဒန်နဲ့ ကွန်ဂိုနိုင်ငံတွေမှာဖြစ်နေတဲ့ ပဋိပက္ခ၊ မြန်မာနိုင်ငံက တိုက်ပွဲတွေကြောင့်ဖြစ်တယ်လို့ UNHCR က ဒီနေ့ အောက်တိုဘာ ၂၅ ရက်နေ့ နေ့စွဲနဲ့ အစီရင်ခံစာ ထုတ်ပြန်ပါတယ်။ ၂၀၂၃ ခုနှစ်ရဲ့ ပထမ ၆ လအတွင်းမှာ မိုးခေါင်ရေရှားတာ၊ ရေကြီးတာတွေကြောင့်လဲ လူအမြောက်အများ နေရပ်စွန့်ခဲ့ကြရတယ်လို့ UNHCR ရဲ့ ၆ လ အစီရင်ခံစာမှာ ထောက်ပြထားပါတယ်။
မြန်မာနိုင်ငံမှာဆိုရင် စစ်တပ်အာဏာသိမ်းပြီးနောက်ပိုင်း အကြမ်းဖက်မှုတွေ ပျံ့နှံ့ဖြစ်ပွားနေတာမှာ ၂၀၂၃ ခုနှစ် နှစ်စကနေ ဇွန်လအထိ အိုးအိမ်ပြစ် ထွက်ပြေးကြရသူ ၄ သိန်း ၄ သောင်း ၃ ထောင်ထက်မနည်းရှိခဲ့ပြီး လူသားချင်းစာနာစရာ အခြေအနေ ပိုပြီး ဆိုးဆိုးရွားရွားဖြစ်လာတယ်လို့ UNHCR ကပြောပါတယ်။
အခုဆိုရင် မြန်မာနိုင်ငံထဲမှာ ပြည်တွင်းဒုက္ခသည် ၁.၈ သန်းအထိ ရှိနေပြီး၊ ဒုက္ခသည်အဖြစ်လျှောက်ထားကြသူ ၁.၃ သန်းဟာလည်း အိမ်နီးချင်းနိုင်ငံတွေမှာ နေစရာအတည်တကျမရှိ ဖြစ်နေကြတယ်လို့ ပြောပါတယ်။ အထူးသဖြင့် ဘင်္ဂလားဒေရှ့်နိုင်ငံမှာရောက်နေကြတဲ့ ဒုက္ခသည်တွေ အဆိုးဆုံးဖြစ်တယ်လို့ ကုလသမဂ္ဂ ဒုက္ခသည်များအေဂျင်စီ UNHCR ရဲ့ ၆ လစာ အစီရင်ခံစာမှာ ဖော်ပြထားပါတယ်။
Your browser doesn’t support HTML5
မြန်မာနဲ့ ကမ္ဘာမှာ ဒုက္ခသည် စံချိန်တင်တိုး (UNHCR)