ခြေဥပြင်ရေး ပူးပေါင်းကော်မတီဝင်စာရင်း လွှတ်တော်အတည်ပြု

အငြင်းပွားနေတဲ့ ၂၀၀၈ ဖွဲ့စည်းပုံ အခြေခံဥပဒေပြင်ဆင်ရေး ပူးပေါင်းကော်မတီ အဖွဲ့ဝင်စာရင်းကို ဒီကနေ့ ပြည်ထောင်စု လွှတ်တော်မှာ မဲခွဲ အတည်ပြုလိုက်ပါပြီ။ ဒီလို ဖွဲ့စည်းလိုက်တဲ့အပေါ်မှာ ပြည်ထောင်စု ကြံ့ခိုင်ရေးနဲ့ ဖွံ့ဖြိုးရေးပါတီနဲ့ တပ်မတော်ကိုယ်စားလှယ်တွေက သဘောတူညီတာမရှိပေမဲ့ ကော်မတီမှာ ပူးပေါင်းပါဝင်ရေးကိစ္စ ပါတီတွင်း ဆက်လက်ဆွေးနွေးဖို့တော့ ရှိနေပါတယ်။ ဒီသတင်းကိုတော့ ဗွီအိုအေ မြန်မာပိုင်းသတင်းထောက် ကိုမိုးဇော်က တင်ပြထားပါတယ်။

၂၀၀၈ ဖွဲ့စည်းပုံ အခြေခံဥပဒေပြင်ဆင်ရေး ပူးပေါင်းကော်မတီဖွဲ့စည်းရေးအတွက် ညှိနှိုင်းဆွေးနွေးပွဲ ၂ကြိမ်ပြုလုပ်ခဲ့ပေမယ့် မအောင်မြင်ခဲ့တဲ့နောက်မှာ ဒီနေ့ ပြည်ထောင်စုလွှတ်တော်မှာ မဲခွဲ အဆုံးအဖြတ် ခံယူခဲ့တာဖြစ်ပါတယ်။

ဒီလို မဲခွဲဆုံးဖြတ်ခဲ့တဲ့အခြေအနေကို ပြည်ထောင်စု လွှတ်တော်နာယက ဦးတီခွန်မြတ်က အခုလို ထုတ်ပြန်ကြေညာပါတယ်။

“ အဆိုထောက်ခံမဲ ၃၈၉မဲ၊ ကန့်ကွက်မဲ ၁၉၂မဲ၊ ကြားနေမဲ ၃မဲဖြစ်ပါတယ်။ ထောက်ခံဆန္ဒမဲများတဲ့အတွက် ပြည်ထောင်စုသမ္မတ မြန်မာနိုင်ငံတော် ဖွဲ့စည်းပုံအခြေခံဥပဒေပံ ုအခြေခံဥပဒေ ၂၀၀၈ခုနှစ် ပြင်ဆင်ရေးပူးပေါင်းကော်မတီ ဖွဲ့စည်းတာဝန်ပေးအပ်ခြင်း အမိန့် ကြေညာစာမူကြမ်းကို လွှတ်တော်က အတည်ပြုကြောင်းနဲ့ ဖွဲ့စည်းမိန့်ရဲ့ နိုင်ငံရေးပါတီ အစုအဖွဲ့ အချို့နေရာမှာ ကျန်ရှိနေတဲ့ အမည်စာရင်းများအတွက် အမည်စာရင်းရရှိချိန်မှာ ထပ်မံထုတ်ပြန်ပေးမည်ဖြစ်ကြောင်း ကြေညာပါတယ်။ ”

ဖွဲ့စည်းလိုက်တဲ့ ၄၅ဦးပါ ပူးပေါင်းကော်မတီကို ပြည်ခိုင်ဖြိုးပါတီ၊ ရခိုင်အမျိုးသားပါတီနဲ့ တပ်မတော်သား လွှတ်တော်ကိုယ်စားလှယ်အစုအဖွဲ့က ကန့်ကွက်ခဲ့တာတွေရှိသလို ပြန်လည်သုံးသပ် ညှိနှိုင်းဖို့ ဆွေးနွေးထား တာဖြစ်ပါတယ်။

မဲခွဲမဆုံးဖြတ်ခင်မှာ ဆွေးနွေးဖို့ တောင်းဆိုခဲ့တဲ့ တပ်မတော်သား လွှတ်တော်ကိုယ်စားလှယ်နဲ့ လွှတ်တေ်ာ ကိုယ်စားလှယ်တစ်ချို့ကိုနာယကက ဆွေးနွေးခွင့် မပေးခဲ့ပါဘူး။

ပူးပေါင်းကော်မတီ ဖွဲ့စည်းရေးနဲ့ပတ်သက်ပြီး အဓိက သဘောမတူတဲ့အချက်ကို ပြည်ခိုင်ဖြိုးပါတီ ပျော်ဘွယ်မဲဆန္ဒနယ်က လွှတ်တော်ကိုယ်စားလှယ် ဦးသောင်းအေးက လွှတ်တော်ခေတ္တရပ်နားချိန်မှာ သတင်းမီဒီယာတွေကို အခုလို ရှင်းလင်းပါတယ်။

“ဥပဒေနဲ့အညီ လုပ်ဆောင်ချက်မရှိဘူး။ နောက်တစ်ခုက အန်ကယ်တို့ကို ၂ကြိမ်အစည်းအဝေးခေါ်ထားတဲ့ ကိုယ်စားလှယ်တွေရဲ့ တင်ပြချက်တွေ အပေါ်မှာ နာယကဟာ အရေးယူဆောင်ရွက်မှု၊ ပြန်လည်ဆွေးနွေး ညှိနှိုင်းမှု၊ ဒါတွေ မလုပ်ဘဲနဲ့ ၈ ရက်နေ့ အစည်းအဝေးလည်း ဒီတိုင်းပြီးဆုံးသွားတယ်။ ၁၅ရက်နေ့ အစည်းအဝေးလည်း ဒီတိုင်းပြီးဆုံးသွားတယ်။ ပြီးတော့မှ သူ့ရဲ့ လုပ်ပိုင်ခွင့်တာဝန်အရဆိုပြီးတော့ လုပ်ဆောင် သွားတဲ့လုပ်ဆောင်ချက်မျိုးဟာ ပြည်ထောင်စုလွှတ်တော်မှာ လုပ်သင့် မလုပ်သင့် အားလုံးစဉ်းစားစေချင်တဲ့ သဘောဖြစ်ပါတယ်။”

တပ်မတော်ဘက်ကတော့ ပူးပေါင်းကော်မတီ ဖွဲ့စည်းရေးအတွက် ညှိနှိုင်းဆွေးနွေးပွဲ ၂ကြိမ် ကျင်းပခဲ့ရာမှာ တပ်မတော်နဲ့ အခြားပါတီတွေရဲ့ ဆွေးနွေးချက်တွေကို လစ်လျှူရှုပြီး လွှတ်တော်အတွင်း မဲခွဲတဲ့အပေါ်မှာတော့ အားလုံးရဲ့ သဘောဆန္ဒမပါဝင်ကြောင်း၊ ဥပဒေကို မလိမ့်တပတ်လုပ်ရာရောက်ကြောင်း ဗိုလ်မှူး ချုပ် မောင်မောင်က ဝေဖန်ထားပါတယ်။

ပူးပေါင်းကော်မတီမှာ ပါဝင်ရေးနဲ့ပတ်သက်ပြီး ဗိုလ်မှုးချုပ်မောင်မောင်က အခုလို ပြောပါတယ်။

“ ကျနေ်ာတို့ကတော့ ဥပဒေနဲ့အညီ ဆက်လက်ဆောင်ရွက်တယ်ဆိုရင်တော့ ပါဝင်နိုင်အောင်တော့ ကြိုးစားရမှာပေါ့လေ။ ဒါလည်း ပြန်ပြီးတော့မှ ကျနော်တို့ အစုအဖွဲ့မှာ ပြန်စဉ်းစားပြီးတော့ ဆုံးဖြတ်ပြီးတော့ ဘယ်လို ပါဝင်မလဲဆိုတာ ဆက်လက်ပြီးဆောင်ရွက်ပါမယ်။ နောက်တစ်ခုကလည်း ပြည်သူအများလိုချင်တဲ့ ဖွဲ့စည်းပုံပြင်ဆင်ရေးမှာ တပ်မတော်က မပါဘူးဆိုရင်လည်း မသင့်တော်ဘူးပေါ့လေ။ ကျနော်တို့အနေနဲ့ ပြင်ဖို့အတွက် စိတ်ကူးရှိပြီးသား။ စီမံပြီးသား ဒါပေမဲ့ ပြင်မယ့် ပုံစံနဲ့ လုပ်ထုံးလုပ်နည်း ဥပဒေနဲ့ မညီဘဲနဲ့ ဥပဒေကို ကျော်လွန်တာတို့ မလိမ့်တပတ်နဲ့ လုပ်နေတာတို့ ဒါမျိုးတွေဖြစ်နေတာဟာ ကျနော်တို့ နိုင်ငံအတွက်လည်း မကောင်းဘူးဗျ။ ”

ပြည်ခိုင်ဖြိုးပါတီကလည်း ဖွဲ့စည်းပုံပြင်ဆင်ရေးကို မကန့်ကွက်ကြောင်း၊ ပြင်ဆင်ရာမှာ ဥပဒေနဲ့အညီဖြစ်ရေးကို သာလိုလားပြီး ပူးပေါင်းကော်မတီမှာ ပါဝင်ရေးကိုတော့ စဉ်းစားဆုံးဖြတ်မှာဖြစ်ကြောင်း ဦးသောင်းအေးက ပြောပါတယ်။

မဲမခွဲမီ ပြည်ထောင်စုလွှတ်တော် ဒုတိယနာယကက ပူးပေါင်းကော်မတီ ဖွဲ့စည်းတာနဲ့ ပတ်သက်ပြီးရှင်းလင်းရာမှာ ဒီကော်မတီက ဖွဲ့စည်းပုံအခြေခံဥပဒေကို လေ့လာသုံးသပ်ပြီး ပြည်ထောင်စုလွှတ်တော်ကို အစီရင်ခံဖို့၊ ဒီအစီရင်ခံစာကို လွှတ်တော်က ဆွေးနွေး ဆုံးဖြတ်ပြီးတဲ့နောက်မှာ ဖွဲ့စည်းပုံအခြေခံ ဥပဒေပြင်ဆင်သည့် ဥပဒေမူကြမ်းကို ဖွဲ့စည်းပုံအခြေခံဥပဒေ အခန်း ၁၂ အရ ဆောင်ရွက်မှာဖြစ်ကြောင်း ထည့်သွင်း ပြောကြား ထားပါတယ်။

ပူးပေါင်းကော်မတီရဲ့ အတွင်းရေးမှူးဖြစ်သူ ရန်ကုန်တိုင်းဒေသကြီးမဲဆန္ဒနယ် အမှတ် ၁၃က လွှတ်တော်ကိုယ်စားလှယ် ဒေါက်တာမြတ်ဉာဏစိုးက ကော်မတီလုပ်ငန်းတွေကို အမြန်ဆုံး ဆောင်ရွက်မှာဖြစ်ကြောင်း ပြောဆိုပါတယ်။

“ ပူးပေါင်းကော်မတီဟာ ဖွဲ့စည်းပုံအခြေခံဥပဒေ မူကြမ်းကြီးကို ၂၀ရာခိုင်နှုန်း တွေ မလိုဘဲနဲ့ တန်းတင်လိုက်တော့ မှာလားဆို မဟုတ်ပါဘူး။ two steps ပါ။ ပထမအကြိမ်လွှတ်တော်တုန်း က တော့ လေ့လာရေးဆိုပြီးတော့ one step သွားခဲ့တယ်။ ပြီးတဲ့အခါကျတော့မှ အကောင်အထည်ဖော်ရေးဆိုပြီး two steps ။ ဒီ two steps လုံးကို ဒီပူးပေါင်းကော်မတီ တစ်ရပ်တည်းကနေပဲ ထိထိရောက်ရောက်နဲ့ပေါ့။ မြန်မြန်ဆန်ဆန် အဓိကကတော့ timing ပဲ။ မြန်မြန်ဆန်ဆန် အချိန်မဆွဲဘဲ တစ်ကယ့် ပြည်သူတွေ လိုလားနေတဲ့ ဆန္ဒအစစ်အမှန်ကို မြန်မြန်ဆန်ဆန်ဆောင်ရွက်နိုင်ဖို့ အတွက် ဒီပူးပေါင်းကော်မတီ အနေနဲ့ ဆောင်ရွက်သွားမှာဖြစ်ပါတယ်။ ”

ဒီကနေ့ ဖွဲ့စည်းလိုက်တဲ့ ပူးပေါင်းကော်မတီမှာ အမျိုးသားဒီမိုကရေစီအဖွဲ့ချုပ်က ၁၈ဦး၊ တပ်မတော်သား လွှတ်တော်ကိုယ်စားလှယ် ၈ဦး၊ ပြည်ခိုင်ဖြိုး၊ ရခိုင် အမျိုးသားပါတီနဲ့ ရှမ်းတိုင်းရင်းသားများ ဒီမိုကရေစီ အဖွဲ့ချုပ်က ၂ဦးစီ၊ လွှတ်တော်တွင်းမှာ ကိုယ်စားလှယ် ၁ ဦးကနေ ၅ ဦးစီအထိရှိတဲ့ ပါတီတွေက ၁၀ဦးနဲ့ တစ်သီးပုဂ္ဂလ ကိုယ်စားလှယ် ၁ဦးတို့နဲ့ သတ်မှတ်ထားပါတယ်။

လွှတ်တော်တွင်းမှာ နိုင်ငံရေးပါတီ ၁၄ ခုရှိရာမှာ ၁၃ ခုကပူးပေါင်းကော်မတီမှာ ပါဝင်မယ့် ကိုယ်စားလှယ်စာရင်း ပေးပို့ထားပြီး တပ်မတော်နဲ့ ပြည်ခိုင်ဖြိုးပါတီက ပေးပို့တာမရှိသေးပါတယ်။ ပေးပို့လာချိန်မှာ ပူးပေါင်းကော်မတီပါ အမည်စာရင်းတွေကို ထပ်မံထုတ်ပြန်ဖို့ ရှိနေပါတယ်။

ခြေဥပြင်ရေး ပူးပေါင်းကော်မတီဝင်စာရင်း လွှတ်တော်အတည်ပြု