နေရပ်စွန့်ခွါသူ အမြန်လက်ခံရေး မြန်မာ-ဘင်္ဂလားဒေ့ရှ် သဘောတူ

ဘင်္ဂလားဒေ့ရှ်နိုင်ငံ၊ Cox’s Bazar ဒေသကို ထွက်ပြေးတိမ်းရှောင်သွားတဲ့ ရခိုင်ဒေသက နေရပ်စွန့်ခွာသွားသူတွေကို ပြန်လည် လက်ခံရေးလုပ်ငန်းကို အလျင်အမြန်စတင်ဖို့ နှစ်နိုင်ငံကြား သဘောတူညီကြတယ်လို့ နိုင်ငံတော်အတိုင်ပင်ခံရုံး ဝန်ကြီးဌာနရဲ့ သြဂုတ်လ ၁၀ ရက်နေ့စွဲနဲ့ သတင်းထုတ်ပြန်ချက်တခုမှာ ဖော်ပြထားပါတယ်။

မြန်မာနိုင်ငံမှာရောက်နေတဲ့ ဘင်္ဂလားဒေ့ရှ်နိုင်ငံခြားရေးဝန်ကြီး အဘူအာဆန် မာမွတ် အာလီနဲ့ နိုင်ငံတော်အတိုင်ပင်ခံရုံးဝန်ကြီး ဦးကျော်တင့်ဆွေတို့ ပါဝင်တက်ရောက်ပြီး နေပြည်တော်မှာကျင်းပတဲ့ အစည်းအဝေးအတွင်း အဲဒီလို သဘောတူညီကြတာပါ။

သဘောတူညီချက် ၈ ချက်ကို သတင်းထုတ်ပြန်ချက်ထဲမှာ အသေးစိတ်ဖော်ပြထားပြီး နေရပ်စွန့်ခွာသွားသူတွေ ကိုယ့်သဘော ဆန္ဒအလျောက် လုံခြုံစိတ်ချစွာနဲ့ ဂုဏ်သိက္ခာရှိစွာ နေရပ်ပြန်နိုင်ရေးဆောင်ရွက်ဖို့နဲ့ နှစ်နိုင်ငံဝန်ကြီးတွေအကြား တိုက်ရိုက် ဆက်သွယ်နိုင်တဲ့ HOTLINE တခု ထူထောင်ထားတာ၊ စိစစ်ရေးပုံစံတွေကို Cox’s Bazar မှာ ရောက်နေ သူတွေထံ ဖြန့်ဝေရေးနဲ့ ဖြည့်စွက်ရေးဆိုင်ရာ၊ နှစ်နိုင်ငံစလုံးမှာ ယာယီလက်ခံရေး စခန်းတွေနဲ့ ကြားစခန်းတွေ ဆောက်လုပ် ဖွင့်လှစ်ရေးဆိုင်ရာ၊ အကြမ်း ဖက်မှုနဲ့ မူးယစ် ဆေးဝါးတိုက်ရေး ပူးပေါင်းဆောင်ရွက်မှုဆိုင်ရာ၊ နှစ်နိုင်ငံနယ်နိမိတ် အထူးသဖြင့် နိုင်ငံ တကာပိုင်နက်နဲ့ မြန်မာ ပိုင်နက်နယ်မြေပေါ်မှာ တည်ဆောက်ထားတဲ့ ခြံစည်းရိုးကြား မှာ နေထိုင်နေသူတွေကို ပြန်လည်လက်ခံရေးဆိုင်ရာ၊ အဲဒီလူတွေကို လူသားစာနာမှု အကူအညီတွေ ပေးရေးဆိုင်ရာတွေအပြင် နေရပ်စွန့်ခွာသွားသူတွေကို ဘင်္ဂလားဒေ့ရှ်က ထုတ်ပေးထားတဲ့ သက်သေခံလက်မှတ်ပေါ်မှာ သုံးထားတဲ့ အသုံးအနှုန်းကို ပြန်ပြင်ပေးဖို့ ဘင်္ဂလားဒေ့ရှ်က သဘောတူတဲ့အကြောင်းနဲ့ နယ်စပ်မျဉ်း ကို ပူးတွဲစစ်ဆေးဖို့ သဘောတူကြတယ်ဆိုတာတွေကို ဖော်ပြထားပါတယ်။

ဘင်္ဂလားဒေ့ရှ်ဘက်က ထုတ်ပေးထားတဲ့ သက်သေခံလက်မှတ်ပေါ်မှာ သုံးထားတဲ့ အသုံးအနှုန်းက ဘာဆိုတာကိုတော့ အတိုင်ပင်ခံရုံးဝန်ကြီးဌာနနဲ့ သတင်းထုတ်ပြန်ချက် ထဲမှာ အတိအကျ ဖော်ပြမထားပါဘူး။

နေရပ်စွန့်ခွါသူ အမြန်လက်ခံရေး မြန်မာ-ဘင်္ဂလားဒေ့ရှ် သဘောတူ