ပင်လုံညီလာခံတက်ဖို့ မြောက်ပိုင်းအဖွဲ့တွေကို ဖိတ်ကြား

လာမယ့် ပြည်ထောင်စုငြိမ်းချမ်းရေးညီလာခံ - ၂၁ရာစုပင်လုံတတိယအစည်းအဝေးမှာ တရုတ်-မြန်မာနယ်စပ်အခြေစိုက် မြောက်ပိုင်းလက်နက်ကိုင်အဖွဲ့ ၇ဖွဲ့အပါအဝင် အပစ်ရပ်စာချုပ် NCA ကို လက်မှတ်မရေးထိုးသေးတဲ့ အဖွဲ့ ၉ဖွဲ့ကို ဖိတ်ကြားသွားဖို့ ရှိနေပါတယ်။မြောက်ပိုင်းလက်နက်ကိုင်အဖွဲ့ ၇ဖွဲ့အနက်မှာ ၄ဖွဲ့ကတော့ တက်ရောက်ဖို့ သေချာနေပြီး အားလုံးပါဝင်တက်ရောက်ရေးကိုတော့ မကြာခင် အတည်ပြုနိုင်မယ်လို့ တာဝန်ရှိသူတဦးက ပြောပါတယ်။ ၂၁ရာစုပင်လုံတတိယအစည်းအဝေးမှာ NCA လက်မှတ်မထိုးသေးတဲ့အဖွဲ့တွေ ပါဝင်တက်ရောက်မယ့် အခြေအနေကို ဗွီအိုအေမြန်မာပိုင်းရဲ့သတင်းထောက် ကိုမိုးဇော်က တင်ပြထားပါတယ်။

ဟုတ်ကဲ့။ ဒီလ ၁၁ရက်ကနေ ၁၆ရက်နေ့အထိ နေပြည်တော်မှာ ကျင်းပမယ့် ပြည်ထောင်စုငြိမ်းချမ်းရေးညီလာခံ - ၂၁ရာစုပင်လုံတတိယအစည်းအဝေးကို တနိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် NCA ကို ပါဝင် လက်မှတ်မရေးထိုးသေးတဲ့ လက်နက်ကိုင်အဖွဲ့တွေ အားလုံးနီးပါးကို ဖိတ်ကြားသွားဖို့ ရှိနေတာ ဖြစ်ပါတယ်။

ဒီလို ဖိတ်ကြားမယ့် အစီအစဉ်နဲ့ပတ်သက်ပြီး UPDJC ခေါ် ပြည်ထောင်စု ငြိမ်းချမ်းရေးဆွေးနွေးမှု ပူးတွဲကော်မတီရဲ့ အတွင်းရေးမှုးအဖွဲ့ဝင်- နိုင်ငံတော်အတိုင်ပင်ခံရုံးဝန်ကြီးဌာနရဲ့ ညွှန်ကြားရေးမှုးချုပ်ဖြစ်တဲ့ ဦးဇော်ဌေးက အခုလို ပြောပါတယ်။

“ NCA လက်မှတ် မထိုးတဲ့အဖွဲ့ ၈ဖွဲ့ အားလုံးပေါင်း ၈ဖွဲ့ရှိတယ်။ KNPP ကို ကျနော်တို့ ဖိတ်လိုက်တယ်။ 4 plus 4 ဖွင့်ပွဲနဲ့ ညစာစားပွဲကို 4 plus 4 ဖိတ်တယ်။ ညီလာခံကိုတော့ ၁၀ယောက်ဖိတ်တယ်။ နောက် မြောက်ပိုင်းက ရှိနေတဲ့အဖွဲ့ ၇ဖွဲ့ကို တစ်ဖွဲ့ချင်းစီဖိတ်တယ်။ 4 plus 4 နဲ့ ညီလာခံအတွက် ၁၀ဦး အဲဒါဖိတ်ထားတယ်။ ဖိတ်ထား တော့ KNPP ကတော့ ကျနော်တို့ အကြောင်းပြန်တယ်။ သူတို့ တက်မယ်ဆိုတဲ့အကြောင်း မနေ့ကပဲ ပြန်တယ်။ မြောက်ပိုင်း ၇ဖွဲ့ကတော့ သူတို့ဆီလည်း ဆက်သွယ်တဲ့ ကျနော်တို့ ဆက်သွယ်တဲ့ contact point တွေက ကျနော်တို့ ပို့သလို၊ တရုတ်သံရုံးကလည်း တဆင့်ပို့ထားတယ်။ အားလုံးရောက်သွားပြီလို့ ပြောပါတယ်။ ”

မြောက်ပိုင်း၇ဖွဲ့ဖြစ်တဲ့ UWSA ဝ၊ NDAA မိုင်းလား၊ KIOကချင်၊ SSPP/SSA ရှမ်းမြောက်၊ PSLF/TNLA တအာင်း-ပလောင်၊ MNDAA ကိုးကန့်နဲ့AA ခေါ် ရခိုင်တပ်ဖွဲ့တွေ တက်ရောက်မှာဖြစ်ကြောင်းနဲ့ NSCN-K နာဂအဖွဲ့ကိုလည်း ဖိတ်ကြားဖို့ ရှိကြောင်း ဦးဇော်ဌေးက ဆက်ပြောပါတယ်။

“ မြောက်ပိုင်း ၇ဖွဲ့တက်ပါမယ်။ တက်တဲ့အခါမှာ သူတို့ ကြိုလာမယ်ပေါ့နော်။ ကြိုလာတဲ့အခါမှာလည်း တွေ့ဖို့ ဆုံဖို့ အဲဒါတွေလည်း ကျနော်တို့ စီစဉ်နေပါတယ်။ အဲတော့ NSCN- K ရှိတယ်။ NSCN-K ကျတော့ ကျနော်တို့ သူတို့ရဲ့ သဘောထားဆန္ဒအရ ညီလာခံကို လေ့လာသူအဖြစ် တက်ရောက်လိုတယ်ဆိုရင်တော့ ကျနော်တို့ လေ့လာသူတွေ ပုံစံအတိုင်းပေါ့ ကျနော်တို့အားလုံး သဘောတူခွင့်ပြုပေးမယ်လို့ ပြောထားတယ်။ ”

NCA လက်မှတ် မထိုးတဲ့အဖွဲ့တွေ ဖိတ်ကြားရေးကို UPDJC ခေါ် ပြည်ထောင်စု ငြိမ်းချမ်းရေးဆွေးနွေးမှု ပူးတွဲကော်မတီအတွင်းမှာ ဆွေးနွေးဆုံးဖြတ်ပြီး ဖိတ်ကြားတာဖြစ်ပါတယ်။

NDAA ခေါ် မိုင်းလားအဖွဲ့ရဲ့ အထွေထွေအတွင်းရေးမှုး ဦးကြည်မြင့်က မြောက်ပိုင်းအဖွဲ့တွေ တက်ရောက်မယ့် အခြေအနေကို အခုလို ပြောကြားပါတယ်။

“ ကျနော်တို့ လူရွေးနေတယ်။ တက်တော့တက်မယ်။ ပန်ဆန်းမှာ အစည်းအဝေး အထူးဒေသ၂နဲ့ ကျနော်တို့ ပေါင်းပြီးမှ ဒီမှာ ဆွေးနွေးပြီးမှ အားလုံးဘယ်လိုတက်မလဲ၊ ဘယ်လို သွားမလဲဆိုတာ အဲဒါနဲ့ လာမှာ။ တက်တော့ တက်မယ်။ အခုလောလောဆည် ဝနဲ့ မိုင်းလားနဲ့ KIO နဲ့ SSPP က တက်ဖို့တော့ တိတိကျကျရပြီ အဲဒီ ၃ဖွဲ့က တက်မတက်၊ တက်ရင်ဘယ်လိုလဲဆိုတာ အဲဒါနဲ့ မပေါ်လာသေးဘူး။ ဒါပေမဲ့ မနက်ဖန်လောက် သူတို့ သဘောထားပေါ်လာမှာပါ။ ”

ဖွင့်ပွဲအခမ်းအနားနဲ့ ညစာစားပွဲအတွက် ဖိတ်စာတစ်စောင်၊ အစည်းအဝေးတက်ရောက်ဖို့ ဖိတ်စာတစ်စောင် စုစုပေါင်း၂စောင်ရရှိကြောင်းပြောပါတယ်။

NSCN-K ခေါ် နာဂအဖွဲ့ပါဝင်တက်ရောက်မယ့်သဘောထားကိုတော့ အဖွဲ့ရဲ့ ပြောရေးဆိုခွင့်ရှိသူ ဦးကျော်ဝမ်းစိန်က အခုလို ပြောပါတယ်။

“ မနှစ်တည်းက တက်ဖို့ရာအတွက်တော့ ညှိထားတာတော့ ရှိတယ်။ အခုလည်း တက်ရောက်ဖို့တော့ အစီအစဉ်တော့ ဆွဲနေတယ်ခင်ဗျ။ အစိုးရဘက်က ဖုန်းနဲ့ အကြောင်းကြားထားတာ ရှိတယ်ခင်ဗျ။”

ညီလာခံမှာ တင်ပြလိုတဲ့ သူတို့ သဘောထားတွေကိုတော့ ဗဟိုဌာချုပ်မှာ ပြန်လည်ညှိနှိုင်းဖို့ ရှိနေကြောင်း ပြောပါတယ်။

ထိုင်းမြန်မာနယ်စပ်မှာ အခြေစိုက်တဲ့ ANCခေါ် ရခိုင်အမျိုးသားကောင်စီကိုတော့ ဖိတ်ကြားဖို့ မရှိကြောင်း ဦးဇော်ဌေးက ပြောပါတယ်။ ပြီးခဲ့တဲ့ ဖေဖော်ဝါရီလက မွန်ပြည်သစ်ပါတီ NMSP နဲ့ လားဟူ ဒီမိုကရက်တစ်အစည်းအရုံး LDU တို့ NCA လက်မှတ်ရေးထိုးစဉ်မှာ ANC နဲ့ အပြီးအပြတ် ဆွေးနွေးထားပြီးဖြစ်ကြောင်းလည်း ပြောပါတယ်။

NCA လက်မှတ်ရေးထိုးမထားတဲ့ တိုင်းရင်းသားလက်နက်ကိုင်အဖွဲ့တွေအနေနဲ့ ပြည်ထောင်စုငြိမ်းချမ်းရေးညီလာခံမှာ ပါဝင်ဆွေးနွေးခွင့်နဲ့ ဆုံးဖြတ်ခွင့်တွေ ရရှိမှာ မဟုတ်ပေမဲ့ သူတို့ရဲ့ အမြင်သဘောထားတွေကိုတော့ အစိုးရအဖွဲ့ ခေါင်းဆောင်တွေ ဒါမှမဟုတ် ညီလာခံတာဝန်ရှိသူတွေနဲ့ သီးခြားတွေ့ဆုံဆွေးနွေးမယ့် အခြေအနေ ရှိနေပါတယ်။

ပင်လုံညီလာခံတက်ဖို့ မြောက်ပိုင်းအဖွဲ့တွေကို ဖိတ်ကြား