ဖွဲ့စည်းပုံပြင်ရေး ပူးပေါင်းကော်မတီ လွှတ်တော်အစီရင်ခံစာတင်

၂၀၀၈ ဖွဲ့စည်းပုံအခြေခံဥပဒေပြင်ဆင်ရေး လွှတ်တော်ပူးပေါင်းကော်မတီရဲ့ အစီရင်ခံစာကို ပြည်ထောင်စုလွှတ်တော်မှာ တင်သွင်းခဲ့ပြီး၊ အစီရင်ခံစာပါ အကြံပြုချက်တွေကို အခုဇူလှိုင်လအကုန်ပိုင်း လွှတ်တော်မှာ အချေအတင်ဆွေးနွေးမယ်လို့ မျှော်လင့်ရပါတယ်။ ပူးပေါင်းကော်မတီမှာပါဝင်တဲ့ တပ်မတော်သားလွှတ်တော်ကိုယ်စားလှယ်တွေကတော့ လက်ရှိဆောင်ရွက်နေတဲ့ဖွဲ့စည်းပုံပြင်ဆင်ရေးလုပ်ငန်းစဉ်အပေါ် သဘောမတူကြောင်း သီးခြားမှတ်ချက်ပေးထားပါတယ်။ ။ ဒီသတင်းကိုတော့ ဗွီအိုအေမြန်မာပိုင်းရဲ့ သတင်းထောက် ကိုမိုးဇော်က တင်ပြထားပါတယ်။

နိုင်ငံရေးပါတီအသီးသီးနဲ့ တပ်မတော်သားလွှတ်တော်ကိုယ်စားလှယ်အစုအဖွဲ့က ပြည်ထောင်စု လွှတ်တော်ကိုယ်စားလှယ် ၄၅ဦးပါဝင်တဲ့ ပြည်ထောင်စုသမ္မတ မြန်မာနိုင်ငံတော် ဖွဲ့စည်းပုံအခြေခံဥပဒေ (၂၀၀၈ခုနှစ်)ပြင်ဆင်ရေး ပူးပေါင်းကော်မတီက ၄လကျော်ကြာကာအတွင်း အစည်းအဝေး ၂၅ကြိမ်ထက်မနည်း ကျင်းပပြီးတဲ့နောက်မှာ ပြည်ထောင်စုလွှတ်တော်ကို ဒီကနေ့ အစီရင်ခံစာတင်သွင်းခဲ့တာဖြစ်ပါတယ်။

ပူးပေါင်းကော်မတီက ၂၀၀၈ဖွဲ့စည်းပုံအခြေခံ ဥပဒေပါ အခန်း ၁၅ခန်းနဲ့ နောက်ဆက်တွဲဇယား ၅ခုကို စီစစ်လေ့လာသုံးသပ်ပြီးတဲ့နောက် အကြံပြုချက် ၃၇၀၀ကျော် တင်ပြထားကြောင်း ပူးပေါင်းကော်မတီရဲ့ အတွင်းရေးမှူး ဒေါက်တာမြတ်ဉာဏစိုးက ပြည်ထောင်စုလွှတ်တော်မှာ အစီရင်ခံတင်ပြပါတယ်။

“ အကြံပြုတင်ပြစုစည်းချက်များကတော့ ကျနော် ရှေးဦးစွာ တင်ပြခဲ့သလိုပါပဲ၊ လေးမျိုး လေးစားဖြစ်ပါတယ်။ ပြင်ဆင်ဖို့၊ ဖြည့်စွက်ဖို့၊ ပယ်ဖျက်ဖု့ိ ဒါတွေက အကြံပြုတင်ပြတာပါ။ အကြံပြုတင်ပြခဲ့ခြင်းမရှိတဲ့ ပုဒ်မ၊ ပုဒ်မခွဲတွေ ကိုတော့ ကျနော်တို့က မူလအတိုင်း ထားရှိရန်ဆိုပြီးတော့ စုစည်းထားရှိခဲ့တာဖြစ်ပါတယ်။ ပြင်ဆင်၊ ဖြည့်စွက်၊ ပယ်ဖျက်ဖို့ ဖွဲ့စည်းပုံအခြေခံ ဥပဒေတစ်ရပ်လုံးအပေါ်မှာ တင်ပြချက်များ စုစုပေါင်း ၃၇၆၅ချက် ရှိပါတယ်။ ”

ဒီပြင်ဆင်မယ့် အကြံပြုချက်တွေကို ပြည်ထောင်စုလွှတ်တော်ကိုယ်စားလှယ်တွေဆီက ဖြန့်ဝေထားပေမဲ့ အစီရင်ခံစာဖတ်ကြားရာမှာ ဘယ်ပုဒ်မတွေကို ဘယ်လိုပြင်ဆင်မယ်ဆိုတာကိုတော့ ထည့်သွင်းထားတာ မရှိပါဘူး။

လွှတ်တော်ပူးပေါင်းကော်မတီရဲ့ ဒီအစီရင်ခံစာကို ကော်မတီမှာ ပါဝင်သူ အားလုံးလက်မှတ်ရေးထိုးပြီး၊ သဘောကွဲလွဲချက်တွေကို အစီရင်ခံစာမှာ ပူးတွဲဖော်ပြဖို့ ကော်မတီလုပ်ထုံးလုပ်နည်းလမ်းညွှန်မှာ ပါရှိပါတယ်။

ဒါကြောင့် ပူးပေါင်းကော်မတီမှာ ပါဝင်တဲ့ တပ်မတော်သားလွှတ်တော်ကိုယ်စားလှယ်တွေက သီးခြားသဘောထား မှတ်ချက် ၃ချက် တင်ပြထားကြောင်း ဒေါက်တာ မြတ်ဉာဏစိုးက ပြည်ထောင်စုလွှတ်တော်ကို အခုလို ဆက်တင်ပြခဲ့ပါတယ်။

“ ဖွဲ့စည်းပုံအခြေခံဥပဒေ(၂၀၀၈ခုနှစ်) ပြင်ဆင်ရေးကော်မတီ ဖွဲ့စည်းဆောင်ရွက်ခြင်းသည် ဖွဲ့စည်းပုံအခြေခံဥပဒေ အခန်း ၁၂နှင့် ကိုက်ညီခြင်း မရှိသောကြောင့် တပ်မတော်သားလွှတ်တော် ကိုယ်စားလှယ်များက ကော်မတီဖွဲ့စည်းရန် အဆိုတင်သွင်းစဉ်ကပင် ကန့်ကွက်ခဲ့ပြီးဖြစ်ပါသည်။ အချက် ၂အနေနဲ့ကတော့ သို့ရာတွင် ပြည်ထောင်စုလွှတ်တော်တွင် မဲခွဲ ဆုံးဖြတ်ပြီး အဆိုပါ ကော်မတီကို ဖွဲ့စည်းခဲ့ခြင်းဖြစ်၍ ပြင်ဆင်ရေးပူးပေါင်းကော်မတီတွင် တပ်မတော်သားလွှတ်တော် ကိုယ်စားလှယ်များက ပြည်ထောင်စုလွှတ်တော်၏ ဆုံးဖြတ်ချက်ကို လေးစားလိုက်နာသောအားဖြင့် ပါဝင် တက်ရောက်ခဲ့ပါသည်။ နံပတ် ၃အချက် ထိုသို့ တက်ရောက်ခဲ့ရာမှာလည်း တပ်မတော်သားလွှတ်တော်ကိုယ်စားလှယ်များမှ ပြင်ဆင်ရန် အဆိုပြုချက်များ တင်သွင်းခြင်း၊ သဘောထားမှတ်ချက်ပြုခြင်းတို့ကို ဆောင်ရွက်ခဲ့ခြင်းမရှိပါ။ ယခု ပူးပေါင်းကော်မတီ၏ အစီရင်ခံစာဆိုင်ရာ လုပ်ငန်းစဉ်များသည် ဖွဲ့စည်းပုံအခြေခံဥပဒေ အခန်း၁၂ပါ ဖွဲ့စည်းပုံအခြေခံ ဥပဒေပြင်ဆင်ခြင်းဆိုင်ရာ ပြဌာန်းချက်များနှင့် ကိုက်ညီမှုမရှိပါကြောင်း သဘောထား မှတ်ချက်ပြုပါသည် ဆိုပြီးတော့ သီးခြား သဘောထားမှတ်ချက် ပြုထားတာကိုလည်း ကျနော်တို့ အနေနဲ့ ပူးတွဲတင်ပြအပ်ပါတယ်ခင်ဗျာ။ ”

ဖွဲ့စည်းပုံပြင်ဆင်ရေးလုပ်ငန်းစဉ်နဲ့ပတ်သက်ပြီးနိုင်ငံရေးလေ့လာသုံးသပ်သူ ဒေါက်တာ ရန်မျိုးသိမ်းကသူ့အမြင်ကို အခုလို ပြောဆိုထားပါတယ်။

“ ဒီဖွဲ့စည်းပုံအခြေခံဥပဒေအကျပ်အတည်းကို ကျော်လွှားနိုင်ဖို့ ဆိုရင် အစိုးရပိုင်း၊ လွှတ်တော်ပိုင်း အရပ်ဘက်ခေါင်းဆောင်တွေ၊ တိုင်းရင်းသားခေါင်းဆောင်တွေနဲ့ တပ်မတော်ခေါင်းဆောင်တွေကြားမှာ ဟန်ချက်ညီညီပူးပေါင်းဆောင်ရွက်နိုင်ဖို့ဟာ အင်မတန်မှ အရေးကြီးတယ်လို့ ကျနော်က မြင်ပါတယ်။ လာမယ့် ဥပဒေကြမ်းရေးဆွဲတဲ့အပိုင်း၊ ဥပဒေကြမ်း ဆွေးနွေးတဲ့အပိုင်း၊ ဥပဒေကြမ်းကို ပြည်ထောင်စု လွှတ်တော်မှာ အတည်ပြုချက် ရယူတဲ့ အပိုင်းတွေမှာ အရပ်ဘက်ခေါင်းဆောင်တွေ၊ စစ်ဘက်ခေါင်းဆောင်တွေနဲ့ရွေးကောက်ခံလွှတ်တော်ကိုယ်စားလှယ်တွေနဲ့ တပ်မတော်သား လွှတ်တော်ကိုယ်စားလှယ်တွေ ကြားမှာ နိုင်ငံတော်နဲ့ နိုင်ငံသားတွေရဲ့ အကျိုးကို ရှေ့ရှုပြီးတော့ ထိထိရောက်ရောက် ကျယ်ကျယ်ပြန့်ပြန့် ပူူးပေါင်းဆောင်ရွက်နိုင်ဖို့ အရေးကြီးတယ်လို့ မြင်ပါတယ်။ ”

လွှတ်တော်ကိုယ်စားလှယ်တွေထံကို ဖြန့်ဝေထားတဲ့ အကြံပြုချက် ၃၇၀၀ကျော် ကိုဆွေးနွေးဖို့အတွက်လာမယ့် ဇူလိုင်လ ၂၂ရက်နေ့မှာ နောက်ဆုံးထားပြီး အမည်စာရင်း ပေးပို့ကြဖို့ကို လွှတ်တော်ဥက္ကဋ္ဌက ကြေညာထားပါတယ်။

လွှတ်တော်အတွင်းမှာ ဒီအကြံပြုချက်တွေကိုဆွေးနွေး၊ ဆုံးဖြတ်အတည်ပြု ပြီးနောက်မှာအခြေခံဥပဒေ ပြင်ဆင်တဲ့ ဥပဒေမူကြမ်းကို နယ်ပယ်အသီးသီးက လူပုဂ္ဂိုလ်၊ဌာန၊ အဖွဲ့အစည်း အကြံဉာဏ်ရယူပြီး ဆက်လက် ပြုစုသွားမှာဖြစ်ပါတယ်။

ပူးပေါင်းကော်မတီက လွှတ်တော်ကို တင်သွင်းတဲ့ ဖွဲ့စည်းပုံ ပြင်ဆင်ချက်အဆိုတွေထဲမှာတော့ အများက စိတ်ဝင်စားတဲ့ သမ္မတအရည်အချင်းကို ကန့်သတ်ထားတဲ့ ပုဒ်မ ၅၉(စ)လို ပုဒ်မ ၂၃၂ ပါ တပ်မတော်က ပြည်ထောင်စုဝန်ကြီးအချို့ကို ခန့်အပ်ထားနိုင်မှု ကိစ္စတွေလည်း ပါဝင်ပါတယ်။ လက်ရှိ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကို သမ္မတမဖြစ်နိုင်အောင် ကန့်သတ်ထားတဲ့ ပုဒ်မ ၅၉(စ)ကို ပယ်ဖျက်ဖို့ အမျိုးသားဒီမိုကရေစီအဖွဲ့ချုပ်ဖက်က အဆိုပြုထားတယ်လို့သိရပြီး၊ အချို့ နိုင်ငံရေးပါတီတွေ ဖက်ကတော့ ပြင်ဆင်ချက်သဘောသာ အဆိုပြုထားတယ်လို့ ဗွီအိုအေက သတင်းရရှိပါတယ်။

ဖွဲ့စည်းပုံပြင်ရေးပူးပေါင်းကော်မတီ လွှတ်တော်အစီရင်ခံစာတင်