ကရင်ပြည်နယ်၊ ဖာပွန်မြို့နယ်က ကရင်အာဇာနည်နေ့အခမ်းအနားကျင်းပမယ့် KNU တပ်မဟာ ၅နယ်မြေ အတွင်းကို အစိုးရတပ်မတော်က စစ်ကြောင်းတွေ ဝင်ရောက်လာတဲ့အတွက် KNU ဘက်က အရှေ့တောင်တိုင်း စစ်ဌာနချုပ်တိုင်းမှုးနဲ့ ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ JMC ကို ကန့်ကွက်စာပေးပို့ထားပါတယ်။ နှစ်ဖက်တပ်တွေအကြးာ ပဋိပက္ခဖြစ်ပြီး ငြိမ်းချမ်းရေးလုပ်ငန်းစဉ် မထိခိုက်စေဖို့ မြန်မာအစိုးရဖက်က တပ်တွေ ပြန်ရုပ်ဖို့ကိုလည်း KNU က တောင်းဆိုထားပါတယ်။ ဒီသတင်းကို ဗွီအိုအေ မြန်မာပိုင်းရဲ့ သတင်းထောက် ကိုမိုးဇော်က တင်ပြထားပါတယ်။
ဟုတ်ကဲ့။ ဒီလ ၁၂ရက်နေ့မှာ ကျရောက်မယ့် ကရင်အမျိုးသားအာဇာနည်နေ့ကို ကရင်အမျိုးသားအစည်းအရုံး KNU ရဲ့ တပ်ရင်း၊ တပ်ဖွဲ့အသီးသီးအခြေစိုက်ရာနေရာတွေမှာ ကျင်းပဖို့ ပြင်ဆင်ထားကြတာဖြစ်သလို KNU တပ်မဟာ ၅ အခြေစိုက်ရာ ဖာပွန်ခရိုင်အတွင်းမှာ ကျင်းပဖို့ ပြင်ဆင်နေတာ ဖြစ်ပါတယ်။
ကရင်အမျိုးသားခေါင်းဆောင်စောဘဦးကြီး ကျဆုံးတဲ့နေ့ကိုသတ်မှတ်ခဲ့တဲ့ အာဇာနည်နေ့မှာ စစ်ဘက်ဆိုင်ရာအခမ်းအနားတွေ ထည့်သွင်းကျင်းပတာကြောင့် အမြင်မမှားစေဖို့ တပ်မတော်ဖက်ကိုလည်း အရင်ရက်တွေတည်းက အကြောင်းကြားစာပေးပို့ထားကြောင်း KNU ရဲ့ အထွေထွေအတွင်းရေးမှုး ပဒိုစောတာဒိုမူးက ပြောပါတယ်။
“ ကျနော်တို့ ဒီအာဇာနည်နေ့မှာ စစ်ဘက်ဆိုင်ရာအခမ်းအနားပုံစံမျိုး ဒီဝမ်းနည်းခြင်းအထိမ်းအမှတ်နဲ့ လုပ်တဲ့ဟာမျိုးလုပ်တဲ့ အလေ့အထရှိတာကိုး။ အဲဒါကို စစ်အခမ်းအနားနဲ့ ဖြစ်တဲ့အတွက်ကြောင့်လည်း စစ်တပ်ဖက်က အမြင်မှားတာလေးများ ရှိမလားဆို ကျနော်တို့ အဲလိုမဖြစ်အောင်လည်းအကြောင်းကြားတဲ့စာပို့ထားပါတယ်။ ”
အခမ်းအနားကျင်းပဖို့ ပြင်ဆင်နေချိန်KNU တပ်မဟာ ၅ အခြေပြုရာ ဖာပွန်ခရိုင် ကတိုင်တိ ကျေးရွာအုပ်စုအတွင်းကို အစိုးရတပ်မတော်ဘက်က အင်အားဖြည့်ဝင်ရောက်လာတဲ့အတွက်KNU တပ်မဟာ ၅ တပ်မဟာမှုးကအရှေ့တောင်တိုင်း စစ်ဌာနချုပ်တိုင်းမှုးဆီကို တပ်တွေ ပြန်ရုတ်သိမ်းဖို့ နဲ့ အကြောင်းကြားစာ ပေးပို့ခဲ့ပါတယ်။
အစိုးရတပ်မတော်ဘက်က တပ်တွေ ဝင်ရောက်ချထားလာတဲ့အပေါ် KNU ဗဟိုက ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ JMC ထံကို ကန့်ကွက်စာပေးပိုထားတယ်လို့ ပဒိုစောတာဒိုမူးက ဆက်ပြောပါတယ်။
“ ကျနော်တို့ထင်တာကတော့ နားလည်မှုလွဲမှားတဲ့ပုံစံပဲလို့တော့ ထင်ရတာပေါ့နော်။ အဲတော့ JMC ကိုလည်း ကျနော်တို့ ကန့်ကွက်စာပေးထားတာပေါ့နော်။ ဘာကြောင့်လဲဆိုတော့ ဒီဟာက နားလည်မှုလွဲမှားတဲ့ အပိုင်းဆိုလည်း အောက်ခြေမှာ တွေ့ဆုံပြီးဖြေရှင်းလိုက်လည်း ပြီးသွားတဲ့ကိစ္စပဲလေ။ ဒါပေမဲ့ အခုဟာက အောက်ခြေက သတင်းတွေအရ စခန်းပါ စွဲထားတဲ့ပုံစံမျိုး ယာယီဖြစ်မလား ဘယ်လိုဖြစ်မလဲတော့မသိဘူး။ ဘာပဲဖြစ်ဖြစ် ဒါကတော့ နားလည်မှုလွဲမှားနိုင်တဲ့အတွက်ကြောင့် JMC ကိုတော့ စာပို့ထားပါတယ်။ ”
ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ JMCရဲ့ အတွင်းရေးမှုး ၂ ဗိုလ်မှုးကြီး ဝဏ္ဏအောင်ကတော့ စာလက်ခံမရသေးကြောင်း ပြောပါတယ်။
“ကျနော်တို့ JMC ကိုတော့ အဲဒီစာ ရောက်မလာသေးပါဘူးဗျ။ မသိသေးပါဘူးဗျ။”
ကရင်ပြည်နယ် လုံခြုံရေး နဲ့ နယ်စပ်ရေးရာဝန်ကြီးကတော့ တနိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် NCA အရ စစ်ရေးပြအခမ်းအနားတွေကို သက်ဆိုင်ရာအဖွဲ့ဌာနချုပ်မှ အပ အခြားနေရာတွေမှာ မလုပ်ဆောင်ဖို့ ကန့်ကွက်ထားတယ်လို့လည်း သတင်းတွေ ထွက်ပေါ်နေပါတယ်။
ပြီးခဲ့တဲ့လတွေအတွင်းကလည်း ဖာပွန်ခရိုင် လွယ်မူပလောဒေသဖက်မှာ တပ်မတော်က ကားလမ်းဖောက်တဲ့ကိစ္စနဲ့ပတ်သက်ပြီး KNUနဲ့ တိုက်ပွဲငယ်တွေဖြစ်ပွားခဲ့သလို ဒေသခံ ပြည်သူ ၂ထောင်လောက်က နေရပ်စွန့်ခွာထွက်ပြေးရတာတွေ ရှိပါတယ်။ ဒီလိုစစ်ရေးပဋိပက္ခတွေဖြစ်ပွားချိန်မှာ JMC က နှစ်အကြား ညှိနှိုင်းဆောင်ရွက်ခဲ့သလို နောက်ဆုံးမှာ တပ်မတော်ကာကွယ်ရေးဦးစီးချုပ်နဲ့ KNU ဥက္ကဌတို့တွေ့ဆုံပြီး ကားလမ်းဖောက်တဲ့အစီအစဉ်တွေကို ယာယီရပ်ဆိုင်းခဲ့တာကြောင့် နှစ်ဘက် ပြေလည်မှုရခဲ့ပါတယ်။
Your browser doesn’t support HTML5
ဖားပွန်ခရိုင်တွင်းဝင်လာတဲ့ မြန်မာတပ်တွေ ရုပ်သိမ်းဖို့ KNU တောင်းဆို