နယ်မြေဒေသမအေးချမ်းသေးတဲ့ ကချင်ပြည်နယ်က စစ်ရှောင်စခန်းတချို့မှာ ဒီနှစ်ကျရောက်တဲ့ ခရစ္စမတ်ဝတ်ပြုဆုတောင်းပွဲတွေကို စတင်ကျင်းပနေကြပြီး တချို့စခန်းတွေမှာတော့ ကျင်းပဖို့ ပြင်ဆင်နေကြဆဲရှိနေပါတယ်။ဝိုင်းမော်မြို့နယ်က စစ်ရှောင်စခန်းတချို့ကတော့ စုပေါင်းကျင်းပကြသလို လူမှုကူညီရေးအသင်းအဖွဲ့တွေကလည်း စစ်ရှောင်စခန်းက ပြည်သူတွေအတွက် ကူညီလှုဒါန်းတာတွေ ရှိနေပါတယ်။ ဒီသတင်းကိုတော့ ဗွီအိုအေမြန်မာပိုင်းရဲ့သတင်းထောက် ကိုမိုးဇော်က တင်ပြထားပါတယ်။
မကြာခင်ကျရောက်တော့မယ့် ခရစ္စမတ်ပွဲတော်ကို ကမ္ဘာအဝှမ်းက ခရစ်ယာန်ဘာသာဝင်တွေက ပျော်ပျော်ရွှင်ရွှင် ကျင်းပဖို့ ပြင်ဆင်နေကြချိန်မှာစစ်ပွဲတွေကြောင့် မငြိမ်းချမ်းသေးတဲ့ ကချင်ပြည်နယ်အတွင်းက စစ်ရှောင်စခန်းတွေမှာလည်း ဝတ်ပြုဆုတောင်းပွဲတွေ ကျင်းပဖို့ ပြင်ဆင်နေကြသလို အခမ်းအနားတွေ စတင်ကျင်းပနေတာတွေလည်းရှိနေပါတယ်။
ဝိုင်းမော်မြို့နယ်က စစ်ရှောင်စခန်းတွေကတော့ စုပေါင်းကျင်းပနေကြကြောင်း မိုင်းနားစခန်းက တာဝန်ခံ ဦးဇော်လွန်းက ပြောပါတယ်။
“ ကျနော်တို့ စခန်းက အောင်မြေသစ်မှာလေ အဲဒီမှာ စုပေါင်းခရစ္စမတ်လုပ်ကြတာလေ။ ၂၂ရက်ကနေ ၂၅ရက်နေ့အထိ အဲဒီမှာ အားလုံးလိုလိုသွားကြတာလေ။ နယ်တနယ်လုံးက စုပေါင်းခရစ္စမတ်ပဲ အဲဒီမှာ ရွာပေါင်း ၂၃ရွာ၊ ၂၅ရွာလောက်ရှိတယ်။ အင်ဂျန်ဒုံတို့၊ တပ်ကုန်းတို့၊ ကျွန်းပင်သာတို့ အဲဒီမှာ ကျနော်တို့ နယ်ဖက်က စစ်ရှောင်တွေ အားလုံးသွားတယ်။ နယ်စပ်က အဖွဲ့တွေကတော့ မလာနိုင်တော့ဘူးတဲ့။”
ခရစ္စမတ်ဆုတောင်းပွဲကို အခက်အခဲတွေကြားက စုပေါင်းကျင်းပတာဖြစ်ကြောင်းလည်း ပြောပါတယ်။
“ အခက်အခဲကတော့ ငွေရေးကြေးရေးတော့ ခက်ခဲကြပါတယ်။ အဆင်မပြေကြဘူး။ လုပ်မယ်ဆိုလို့သာ စစ်ရှောင်အချင်းချင်းတွေ ပေါင်းပြီးမှ လုပ်ကြတာပေါ့။”
မန်စီမြို့နယ် တရုတ်မြန်မာနယ်စပ်က မိုင်ဂျာယန်စခန်းမှာတော့ ဒီလ ၂၈ရက်နေ့မှာ ကျင်းပမှာဖြစ်ကြောင်း မိုင်ဂျာယန်စခန်းက ဒေါ်ရွယ်ဂျီးက ပြောပါတယ်။
“ ကျမတို့ ၂၈ရက်နေ့ နှစ်ခြင်းအသင်းတော်က ၂၈ရက်နေ့လုပ်မှာပါ။ မိုင်ဂျာယန်ဘုရားကျောင်းမှာပဲ။ လိုင်ဇာဖက်ကတော့ အခုလောလောဆည်က လိုင်ဇာဖက်က သူတို့ အနီးတဝိုက်မှာ အခြေအနေက သိပ်မကောင်းသလိုပဲ။ ဒါပေမဲ့ သူတို့ ပွဲက လုပ်မှာပါ။ ခရစ္စမတ်ပွဲတွေက လုပ်မှာပါ။ ”
ခရစ္စမတ်ပွဲတော်ကျင်းပဖို့ အခက်အခဲရှိနေတဲ့ စစ်ရှောင်ဒုက္ခသည်တွေအတွက် ကချင်လူမှုအဖွဲ့အစည်းတွေက Concern, Care and Contribute to IDPs NOW ဆိုတဲ့အမည်နဲ့ စုပေါင်းပြီး အလှုငွေ ကောက်ခံ လှုဒါန်းတာတွေ ရှိနေပါတယ်။ ဒီအဖွဲ့က စစ်ရှောင်ပြည်သူတဦးအတွက် ခရစ္စမတ် တနပ်စာ ကျပ်ငွေတထောင်နှုန်းထည့်ဝင်ဖို့ လှုံဆော်ထားပေမဲ့ ရရှိတဲ့ အလှုငွေက မလုံလောက်တာကြောင့် ဝေးလံပြီးခက်ခဲတဲ့ စခန်းတွေကို အဓိက ထောက်ပံ့ပေးနေကြောင်း အဖွဲ့ရဲ့ စေတနာဝန်ထမ်းတဦးဖြစ်တဲ့ မသျှဒန်ဆိုင်းရော်က ပြောပါတယ်။
“ IDP တယောက်အတွက် ခရစ္စမတ်မှာပေါ့ ထမင်း တနပ်ကျွေးချင်တယ်ဆိုရင် ၁ထောင်နှုန်း လူတိုင်းလည်း ပါဝင်လို့ ရအောင် အမတို့က အဲလိုမျိုးသတ်မှတ်တယ်။ တကယ်တမ်းကောက်ခံလာတဲ့အခါမှာကျတော့ IDP ၁သိန်း ၂သောင်းကျော်ရှိတယ်။ အဲလောက်ထိ ပိုက်ဆံက မရဘူး။ လိုအပ်တာနဲ့ ရှာပြီးတော့ ပေးနိုင်တဲ့ အရာက တအားကို ကွာဟနေတယ်ပေါ့။ အဲဒါကြောင့်မို့ ဘယ် camp တွေက အလိုအပ်ဆုံးလဲ၊ ဘယ် camp တွေက ဒုက္ခအရောက်ဆုံးလဲ။ ကျမတို့ ရလာတဲ့ အလှုငွေနည်းနည်းကို ဘယ် camp ကို ပေးရင် အထိရောက်ဆုံးလဲပေါ့။ အဲလိုမျိုးမေးမြန်းပြီး ပေးပို့နေတာဖြစ်ပါတယ်။ ပိုပြီးတဲ့ ဝေးတဲ့နေရာတွေ၊ အလွယ်တကူ အလှုရှင်တွေ မရောက်နိုင်တဲ့နေရာတွေမှာ ဦးစားပေးပြီး ရောက်သွားဖို့က များပါတယ်။
ကချင်လူမှုအဖွဲ့အစည်းတွေစုပေါင်းပြီး ခရစ္စမတ်အတွက် အလှုငွေကောက်ခံလှုဒါန်းတာဟာ ဒုတိယအကြိမ်ဖြစ်ပြီး ဒီတကြိမ်မှာ အလှုငွေ သိန်း ၂၀၀လောက် ရရှိထားပါတယ်။ ဒါဟာ ၂၀၁၅ခုနှစ်နဲ့ နှိုင်းစာရင် တဝက်မရှိကြောင်းလည်း ပြောပါတယ်။
ဒီလ ၂၃ရက်နေ့မှာတော့ ရန်ကုန်မြို့တော်မှာ ခရစ္စမတ်ပွဲတော်ကို ပထမဆုံးအကြိမ်အဖြစ် နေရာ ၃နေရာခွဲပြီး ၃ရက်တိုင်ကျင်းပဖို့ ရှိနေပါတယ်။ ပွဲတော်ကျင်းပမယ့် စုပေါင်းဓမ္မတေးသီဆိုတာ၊ တေးသရုပ်ဖော်တင်ဆက်တာ၊ ခရစ္စမတ်အကြောင်း သိကောင်းစရာတွေ ဝေမျှတာတွေ ပါဝင်မှာဖြစ်သလို လာရောက်သူတွေကို အစားအသောက်နဲ့ ဧည့်ခံတာ၊ လက်ဆောင်ပစ္စည်းပေးဝေတာတွေပါ ထည့်သွင်းမှာဖြစ်ပါတယ်။
Your browser doesn’t support HTML5
ကချင်စစ်ရှောင်စခန်းတချို့ ခရစ္စမတ်အတွက် အကြိုပြင်ဆင်