ဂါဇာဒေသတွင်း လူသားချင်းစာနာမှုအကျပ်အတည်းတွေဆိုးဝါးလာတာကြောင့် တိုက်ခိုက်မှုတွေကို ယာယီဆိုင်းထားဖို့ သံတမန်ရေးကြိုးပမ်းနေတဲ့ကြားမှာပဲ အစ္စရေးက ဂါဇာကို မြေပြင်ထိုးစစ်တွေ တွန်းလုပ်နေပါတယ်။
အစ္စရေးနဲ့ ဟာမတ်စစ်သွေးကြွတွေကြား လူသားချင်းစာနာမှုအခြေအနေအရ ယာယီစစ်ရပ်ဆိုင်းဖို့ အမေရိကန်သမ္မတ Joe Biden က တိုက်တွန်းနေတာပါ။ ယာယီရပ်နားဖို့ဆိုတဲ့သဘောကတော့ အကျဉ်းသားတွေလွတ်လာရေး အချိန်ယူဖို့ဆိုတဲ့သဘောပါပဲလို့ သမ္မတဘိုင်ဒန်က ပြောခဲ့ပါတယ်။ လူပေါင်း ၁,၄၀၀ သေဆုံးခဲ့ရတဲ့ အောက်တိုဘာလ ၇ ရက်နေ့ တိုက်ခိုက်မှုအတွင်း ဟားမတ်စ်အစွန်းရောက်တွေက လူပေါင်း ၂၄၀ ကျော်ကို ဖမ်းဆီးပြန်ပေးဆွဲထားတာပါ။
အဲဒီ တိုက်ခိုက်ခံရမှုကြောင့် အစ္စရေးဘက်ကလည်း ဟားမတ်စ်တို့ကို စစ်ကြေညာပြီး ဂါဇာဒေသကို ဗုံးကြဲတိုက်ခိုက်ခဲ့တဲ့အတွက် ပါလက်စတိုင်းထောင်ချီ သေဆုံးခဲ့ရပြန်ပါတယ်။ သေဆုံးသူဟာ ၉ ထောင်အထိ ရှိတယ်လို့ ဟားမတ်စ်အဖွဲ့ရဲ့ ပါလက်စတိုင်းကျန်းမာရေးဌာနက ပြောထားပါတယ်။ ဗုဒ္ဓဟူးနေ့ကတော့ ဂါဇာမှာ ပိတ်မိနေတဲ့ နိုင်ငံခြားသားတွေထဲက ပထမဆုံးအသုတ်ဟာ နယ်စပ်ဖြတ်ပြီး အီဂျစ်နိုင်ငံထဲ ဝင်ရောက်ခွင့်ရလိုက်ကြပါတယ်။ အခု ကြာသာပတေးနေမှာလည်း ဂါဇာထဲက နိုင်ငံခြားသားတချို့ ဆက်ပြီး ထွက်ခွင့်ရပါတယ်။
နှစ်နိုင်ငံသားခံယူထားတဲ့ အမေရိကန်နိုင်ငံသား ၇၄ ဦး ဂါဇာကနေ ပြန်ထွက်နိုင်ခဲ့ပြီလို့ သမ္မတ Biden က ကြာသပတေးနေ့က ပြောပါတယ်။ ဂါဇာထဲမှာ နှစ်နိုင်ငံသားခံယူထားတဲ့ အမေရိကန်နိုင်ငံသားတွေ၊ အမေရိကန်နိုင်ငံတွင်းအမြဲတမ်းနေထိုင်ခွင့်ရထားသူတွေနဲ့ သူတို့မိသားစုဝင်တွေ စုစုပေါင်း တထောင်နဲ့ တထောင့်နှစ်ရာကြား ရှိမယ်လို့ အမေရိကန် အမျိုးသားလုံခြုံရေးကောင်စီ ပြောခွင့်ရသူ John Kirby က ပြောထားပါတယ်။
Your browser doesn’t support HTML5
ယာယီအပစ်ရပ်ဖို့ဖိအားတွေကြား အစ္စရေးမြေပြင်တပ်များ ဂါဇာကိုထိုးစစ်ဆင်ဆဲ