ဘောလုံးကွင်းမှာကစားနေကြတဲ့ ဆယ်ကျော်သက်နဲ့ကလေး ၁၂ ယောက် ဂိုလန်ကုန်းမြင့်မှာ သေဆုံးအောင် တိုက်ခိုက်မှုအတွက် တာဝန်ရှိတဲ့ ဟက်ဇ်ဘိုလာတပ်မှူးကိုပစ်မှတ်ထားပြီး ဘေရွတ်ကိုတိုက်ခိုက်ခဲ့တယ်လို့ အစ္စရေးစစ်တပ်က အင်္ဂါနေ့ ညနေပိုင်းမှာ ပြောပါတယ်။
အီရန်က ထောက်ပံ့ထားပြီး ဟက်ဇ်ဘိုလာစစ်သွေးကြွတွေအားကောင်းတဲ့ ဘေရွတ်မြို့တောင်ပိုင်းမှာ ပေါက်ကွဲသံကြားရပြီး မီးခိုးလုံးတွေတက်လာတာကို တွေ့ကြရပါတယ်။ အဆောက်အဦ အတော်များများ ပျက်စီးသွားတယ်လို့ ဟက်ဇ်ဘိုလာအရာရှိတွေကပြောကြပြီး လူ ၂ ဦးသေဆုံးသွားတယ်လို့ အာဏာပိုင်တွေက ပြောပါတယ်။
ဟက်ဇ်ဘိုလာတပ်မှူးဟာ Fuad Shukr ဖြစ်တယ်လို့ အရှေ့အလယ်ပိုင်း မီဒီယာတွေကပြောကြပြီး သူ့ကံကြမ္မာကိုတော့ မသိရသေးပါဘူး။ ဆော်ဒီသတင်း Al-Hadath ကတော့ Shukr အသက်ရှင်ကျန်ခဲ့တယ်လို့ ဆိုပေမဲ့ အဲဒီအဆောက်အဦထဲမှာ ဟက်ဇ်ဘိုလာတပ်မှူးရှိနေခဲ့ရင် သူ မရှိနိုင်တော့ဘူးလို့ အစ္စရေးသတင်း ynet က ဆိုပါတယ်။
Shukr ဟာ ဟက်ဇ်ဘိုလာခေါင်းဆောင် Hassan Nasrallah ရဲ့ စစ်ရေးအကြံပေးလည်း ဖြစ်ပါတယ်။ သူဟာ ဟက်ဇ်ဘိုလာ စစ်ဆင်ရေးဌာန ခေါင်းဆောင်လည်းဖြစ်ပါတယ်။ ဂိုလန်ကုန်းမြင့်ဒေသက Druze ကျေးရွာကို စနေနေ့က တိုက်ခိုက်မှုအတွက် ဟာ့ဇ်ဘိုလာအဖွဲ့ကို အမေရိကန်နဲ့အစ္စရေးတို့က အပြစ်ဖို့ကြပေမဲ့ ဟာ့ဇ်ဘိုလာကတော့ ငြင်းပါတယ်။
Your browser doesn’t support HTML5
ဟက်ဇ်ဘိုလာတပ်မှူးကိုပစ်မှတ်ထား အစ္စရေးတိုက်ခိုက်