၂၀၂၄ ခုနှစ် တနှစ်လုံး ဂါဇာစစ်ပွဲက ဆက်နေဦးမယ်လို့ အစ္စရေးက သတိပေးလိုက်သလို ဂါဇာမှာ သေဆုံးသွားတဲ့ ပါလက်စတိုင်းဦးရေက ၂,၂၀၀၀ နားနီးသွားပြီလို့ ဟာမတ်စ်က တနင်္လာနေ့က ပြောလိုက်ပါတယ်။
ရေရှည်တိုက်ပွဲကိုပြင်ဆင်ဖို့ အရံတပ်အင်အား သုံးသိန်းထဲက တချို့ အနားရကြလိမ့်မယ်လို့ အစ္စရေး စစ်တပ် ပြောရေးဆိုခွင့်ရှိသူ ဒင်န်နီယယ် ဟဂရီ (Daniel Hagari) က ပြောပါတယ်။ အစ္စရေး စစ်သား ထောင်ပေါင်းများစွာကို ဂါဇာကနေ ပြန်ရုပ်သိမ်းလိုက်တယ်လို့လည်း စစ်တပ်က ဆိုပါတယ်။ ဟာမတ်စ်တွေ အုပ်ချုပ်နေတဲ့ ဂါဇာကို အစ္စရေးက လေကြောင်းကရော၊ လက်နက်ကြီးတွေနဲ့ပါ ဆက်လက် တိုက်ခိုက်နေပြီး ၂၄ ယောက် သေဆုံးခဲ့တယ်လို့ ဟာမတ်စ်ရဲ့ကျန်းမာရေးဌာနက ဆိုပါတယ်။
ဟာမတ်စ်က အစ္စရေးကို အောက်တိုဘာ ၇ ရက်မှာ တိုက်ခဲ့ရာက ဖြစ်ပေါ် လာခဲ့တဲ့စစ်ပွဲမှာ ပါလက်စတိုင်း အနည်းဆုံး ၂၁,၉၇၈ ယောက် သေဆုံးခဲ့ပြီလို့ ဟာမတ်စ်ရဲ့ ကျန်းမာရေးဌာနက တနင်္လာနေ့က ပြောပါတယ်။ ဂါဇာလူဦးရေရဲ့ ၈၅ ရာနှုန်းကလည်း အိုးအိမ်စွန့်ခွါ ရွှေ့ပြောင်းနေထိုင်နေကြရတယ်လို့ ကုလသမဂ္ဂ က ဆိုပါတယ်။
သောကြာနေ့တုန်းကတော့ ကာတာမှာရှိနေတဲ့ ဟာမတ်စ် ကိုယ်စားလှယ်အဖွဲ့ဟာ အီဂျစ်က အဆိုပြုထားတဲ့ အဆင့် ၃ ဆင့်ပါ အပစ်ရပ်စဲရေး အဆိုပြုချက်ကို ဆွေးနွေးဖို့အတွက် အီဂျစ်နိုင်ငံ ကိုင်ရိုမြို့ကို သောကြာနေ့က သွားရောက်ခဲ့ကြတယ်လို့ ဟာမတ်စ်နဲ့ နီးစပ်တဲ့ သတင်းအရင်းအမြစ်တွေက အေအက်ဖ်ပီ သတင်းဌာနကို ပြောပါတယ်။
Your browser doesn’t support HTML5
၂၀၂၄ တနှစ်လုံး ဂါဇာစစ်ရှိနေဦးမယ်လို့ အစ္စရေးစစ်တပ်သတိပေး