ရုရှားကို ထပ်တိုး အရေးယူဒဏ်ခတ်ဖို့ ကန်သမ္မတ စဉ်းစားနေ

ရုရှားအတိုက်အခံခေါင်းဆောင် Alexey Navalny အကျဥ်းထောင်ထဲမှာ သေဆုံးသွားခဲ့ပြီးတဲ့နောက် ရုရှားအပေါ် အရေးယူဒဏ်ခတ်မှုတွေထပ်မံချမှတ်ဖို့ စဥ်းစားနေတယ်လို့ အမေရိကန်သမ္မတ ဂျိုးဘိုင်ဒန်က တနင်္လာနေ့မှာ ပြောပါတယ်။

ကနဦး ဒဏ်ခတ်ပိတ်ဆို့ထားမှုတွေရှိထားပေမယ့် ပိတ်ဆို့ ဒဏ်ခတ်မှုတွေထပ်မံချမှတ်ဖို့ စဥ်းစားနေပါတယ်လို့ သမ္မတဘိုင်ဒန်က အိမ်ဖြူတော်မှာ သတင်းထောက်တွေကို ပြောခဲ့တာဖြစ်ပါတယ်။​ Navalny သေဆုံးမှုအတွက် ရုရှားသမ္မတ ဗလာဒီမီယာပူတင်မှာ တာဝန်ရှိတယ်လို့ သမ္မတဘိုင်ဒန်က ပြောဆိုထားတာပါ။ နိုင်ငံတကာလုံခြုံရေးအကူအညီအဖြစ် ယူကရိန်း၊ တိုင်ဝမ်နဲ့ အစ္စရေးလ်တို့ကို ဒေါ်လာ ၉၅ ဘီလီယံ ထောက်ပံ့ကူညီနိုင်ရေး သမ္မတဘိုင်ဒန် ကြိုးပမ်းမှုတွေကို ရီပတ်ဘလစ်ကန်အမတ်အတော်များများ ဆန့်ကျင်ကန့်ကွက်ထားနေကြချိန်မှာပဲ Navalny သေဆုံးခဲ့ရတာပါ။

ပါတီနှစ်ရပ်စလုံးရဲ့ထောက်ခံမှုအရ ဒီမိုကရက်တို့ ထိန်းချုပ်ထားတဲ့ အထက်လွှတ်တော်မှာ အတည်ပြုနိုင်ခဲ့ကြပေမယ့်လည်း အောက်လွှတ်တော်လူနည်းစုခေါင်းဆောင် Mike Johnson က အသုံးစရိတ်မူကြမ်းကို အောက်လွှတ်တော်မှာ မဲပေးအတည်ပြုနိုင်ရေး ဆောင်ရွက်တာမျိုးမရှိတဲ့အတွက် နှောင့်နှေးကြန့်ကြာနေတာဖြစ်ပါတယ်။

သမ္မတဟောင်း Donald Trump က ခုလို အကူအညီထပ်ပြီးပေးမှာကို ဆန့်ကျင်ကန့်ကွက်ထားတာလည်း အကြောင်းရင်းတခုဖြစ်ပါတယ်။

ရုရှားကို ထပ်တိုး အရေးယူဒဏ်ခတ်ဖို့ ကန်သမ္မတ စဉ်းစားနေ