ရုရှားကို တပ်သား ၈,၀၀၀ လောက် စေလွှတ်ထားတဲ့ မြောက်ကိုရီးယားက သူတို့ဟာ ယူကရိန်းစစ်ပွဲအောင်နိုင်ချိန်အထိ ရုရှားကို အထောက်အကူပေးမှာဖြစ်ကြောင်း မော်စကိုကိုရောက်နေတဲ့ မြောက်ကိုရီးယား နိုင်ငံခြားရေးဝန်ကြီး Choe Son Hui က သောကြာနေ့မှာ ပြောပါတယ်။
ဝန်ကြီး Choe နဲ့ ရုရှားနိုင်ငံခြားရေးဝန်ကြီး Sergey Lavrov တို့ ဟာ ရင်းရင်းနှီးနှီး တွေ့ဆုံဆွေးနွေးခဲ့ကြပြီး ဆွေးနွေးပွဲအပြီးမှာ ၂ နိုင်ငံ ဆက်ဆံရေး ပုံစံသစ် ဖြစ်လာတာအတွက် ချီးကျူးပြောဆိုခဲ့ကြတာပါ။
အမေရိကန်နဲ့ တောင်ကိုရီးယားတို့ တပ်အင်အား တိုးမြှင့်လာပြီး စစ်ရေး ရန်စမှုတွေ ရှိလာကြောင်း ဝန်ကြီး Choe က တင်ပြခဲ့ပြီး ရုရှားဟာ အမေရိကန်နဲ့ အနောက်နိုင်ငံတွေရဲ့ သြဇာလွှမ်းမိုးဖို့ ကြိုးစားမှုတွေကို အဆုံးသတ်စေပြီး နိုင်ငံတကာ အခင်းအကျင်းမှာ အပြောင်းအလဲ ဖြစ်လာအောင် ကြိုးပမ်းတာကို ချီးကျူးကြောင်း ပြောကြားခဲ့ပါတယ်။
SEE ALSO: ရုရှား-မြောက်ကိုရီးယား စစ်ရေး ပိုမိုနီးကပ်လာမှုကို ကန်-တရုတ်ဆွေးနွေး
ဒါ့အပြင် ရုရှား အောင်မြင်မှု ရမယ်ဆိုတာကို မြောက်ကိုရီးယားအနေနဲ့ ယုံကြည်မှု အပြည့်ထားပြီး အောင်မြင်မှု ရသည်အထိ ရုရှားနဲ့အတူ ရပ်တည်သွားမှာ ဖြစ်ကြောင်းလည်း ပြောကြားခဲ့တာပါ။
ရုရှားနိုင်ငံခြားရေးဝန်ကြီး Lavrov ကလည်း မိတ်ဆွေမြောက်ကိုရီးယားကို ကျေးဇူးတင်ကြောင်း၊ ၂ နိုင်ငံ စစ်ရေးအရ ရင်းနှီးတဲ့ ဆက်သွယ်မှုလုပ်နိုင်တာအတွက်လည်း ချီးကျူးခဲ့ပါတယ်။ နှစ်နိုင်ငံ နိုင်ငံခြားရေးဝန်ကြီး ၂ ဦးစလုံးက မြောက်ကိုရီးယား တပ်သားတွေ ရုရှားမှာ ရောက်နေတယ်ဆိုတာကို တိုက်ရိုက်ရည်ညွှန်း ပြောဆိုတာ မရှိခဲ့ပါဘူး။ ဒီတပ်သားတွေနဲ့ ပတ်သက်ပြီး ရုရှားက အခုထိလည်း အတည်မပြုသလို ငြင်းလည်း မငြင်းဆိုသေးပါဘူး။
သောကြာနေ့မှာပဲ အမေရိကန် ကာကွယ်ရေးဝန်ကြီး Lloyd Austin က တောင်ကိုရီးယား နိုင်ငံခြားရေးဝန်ကြီးနဲ့ ပူးတွဲ သတင်းစာရှင်းလင်းရာမှာ ဒေသတွင်း တပ်သား ၁ သောင်းထက်မနည်း ချထားမယ်လို့ သူယုံကြည်သလို၊ ရုရှားပိုင်နက် Kursk ဒေသမှာတော့ တပ်သား ၈၀၀၀ လောက် ရောက်နေပြီလို့လည်း ပြောကြားခဲ့တာပါ။
Your browser doesn’t support HTML5
ယူကရိန်းစစ် အောင်နိုင်တဲ့အထိ ရုရှားကိုကူညီမည်