တရုတ်-မြန်မာနယ်စပ်ဒေသ နမ့်ခမ်းမြို့နယ်ရှိ ရှမ်းပြည်တပ်မတော် SSA မြောက်ပိုင်းတပ်တွေကို တအန်းအမျိုးသားလွတ်မြောက်ရေးတပ်မတော် TNLA က နေရာပြောင်းရွှေ့တဲ့ ကိစ္စဟာ နှစ်ဘက်ဆွေးနွေးမှု ရှိမထားကြောင်း SSA မြောက်ပိုင်းဘက်က ပြောဆိုပါတယ်။ လတ်တလောမှာတော့ TNLA က သိမ်းယူထားတဲ့ နမ့်ခမ်းမြို့အုပ်ချုပ်ရေးနဲ့ပတ်သက်ပြီး နှစ်ဘက် သဘောတူညီချက် မရသေးကြောင်း ပြောပါတယ်။ ရှမ်းပြည်နယ်မြောက်ပိုင်းက တိုင်းရင်းသား လက်နက်ကိုင်အဖွဲ့တွေအကြား အုပ်ချုပ်ရေးပိုင်းနဲ့ပတ်သက်ပြီး မပြေမလည်ဖြစ်နေတဲ့အခြေအနေကို ကိုရန်နိုင်က တင်ပြထားပါတယ်။
၂၀၂၃ ခုနှစ်နှောင်းပိုင်းမှာ စတင်ခဲ့တဲ့ ၁၀၂၇ စစ်ဆင်ရေးအတွင်းမှာ TNLA တအန်း(ပလောင်) ၊ MNDAA ကိုးကန့်၊ AA ရက္ခိုင်တို့ပါဝင်တဲ့ ညီနောင်မဟာမိတ်တပ်ပေါင်းစုဟာ ရှမ်းမြောက်ဒေသမှာ အနည်းဆုံး မြို့ ၁၃ မြို့လောက်ကို သိမ်းယူခဲ့တာပါ။
လောလောဆယ် ၂၀၂၃ ခု ဒီဇင်ဘာက TNLA က သိမ်းယူလိုက်တဲ့ နမ့်ခမ်းမြို့ အုပ်ချုပ်ရေးနဲ့ပတ်သက်ပြီး TNLA နဲ့ ရှမ်းပြည်တိုးတက်ရေးပါတီ SSPP/SSA မြောက်ပိုင်းတပ်တွေ အကြားမှာ မပြေလည်မှုတွေ ရှိလာနေပါတယ်။
ပြီးခဲ့တဲ့ မေလ ၂၇ ရက်နေ့က နမ့်ခမ်းမြို့နယ်ရှိ SSPP/SSA မြောက်ပိုင်းတပ်တွေကို TNLA က မူဆယ်ဘက်ကို ပြောင်းရွှေ့စေခဲ့ပါတယ်။
ဒီလိုပြောင်းရွှေ့တာနဲ့ ပတ်သက်ပြီး နှစ်ဘက် ဆွေးနွေးညှိနှိုင်းပြီးမှ ပြောင်းရွှေ့တာဖြစ်တယ်လို့ TNLA ဘက်က သတင်းထုတ်ပြန်တဲ့အပေါ် SSPP / SSA မြောက်ပိုင်းကတော့ မဟုတ်မှန်ကြောင်း အဖွဲ့ရဲ့ ပြောရေးဆိုခွင့်ရှိသူ ဗိုလ်မှူး စိုင်းဖုန်းဟန်က VOA ကို ပြောပါတယ်။
“ ဒီပြီးခဲ့တဲ့ ၂၇ ရက်ပေါ့ဗျာ။ မေလ ၂၇ ရက်ပေါ့။ အဲဒါ TNLA က ကျနော်တို့ နမ့်ခမ်းမြို့နယ်ထဲမှာရှိတဲ့ ကျနော်တို့ SSPP အုပ်ချုပ်ရေးပိုင်းတွေကို အခွန်ဌာနတွေကို သူတို့က မူဆယ်ဘက် သူတို့က ကားနဲ့ သယ်ဆောင်ပြောင်းရွှေ့ထားတာပေါ့ဗျာ။ အဲဒီကိစ္စနဲ့ပတ်သက်ပြီးတော့ TNLA ပြန်ကြားရေးက သူတို့ ညှိနှိုင်းပြီးမှ သဘောတူညီချက်နဲ့ လုပ်တယ်ဆိုတာ အဲဒါမမှန်ဘူးဆိုတာ ကျနော်တို့ လူထုတွေသိအောင် ပြောပြချင်တာပါ။ ”
TNLA က နမ့်ခမ်းမြို့ကို ၂ လနီးပါးကြာတိုက်ခိုက်ပြီး ၂၀၂၃ ဒီဇင်ဘာ ၁၈ ရက်နေ့မှာ သိမ်းယူခဲ့တာပါ။ ဒီလို သိမ်းယူပြီးနောက် နမ့်ခမ်းမြို့အုပ်ချုပ်ရေးနဲ့ပတ်သက်ပြီး TNLA နဲ့ SSPP အကြား ဆွေးနွေးမှုတွေ ရှိခဲ့ပေမဲ့ နှစ်ဘက် သဘောတူညီချက် မရသေးကြောင်းလည်း ဗိုလ်မှူး စိုင်းဖုန်းဟန်က ဆက်ပြောပါတယ်။
“နမ့်ခမ်းကိစ္စက ၁၀၂၇ အော်ပရေးရှင်းနောက်ပိုင်းမှာ TNLA က ကျနော်တို့ကို သူတို့ TNLA ပဲ အုပ်ချုပ်သွားမယ်ပေါ့လေ။ အုပ်ချုပ်ရေးပိုင်း ချထားမယ်ပေါ့။ ဂိတ်တွေကို နောင်တောင်းဂိတ်ပေ့ါ။ နောင်တောင်းဂိတ်လည်း ရွှေ့ပေးဖို့ သူတို့ Request လုပ်တာပေါ့။ ဒါပေမဲ့ ကျနော်တို့က ဒီနမ့်ခမ်းမြို့နယ်ထဲမှာ SSPP/SSA တည်ထောင်လာကတည်းက စဉ်ဆက်မပြတ်နေလာတဲ့ ဒေသတွေဖြစ်တယ်။ ဆိုလာတာ ဒါက မဖြစ်နိုင်ဘူးပေါ့ဗျာ။ ညှိနှိုင်းတယ် ကျနော်တို့က မဖြစ်နိုင်ဘူးဆိုတဲ့အကြောင်း ပြန်ကြားချက်က တရားဝင်စာနဲ့ ပို့ထားပြီးသားဖြစ်တယ်။ ဒါပေမဲ့ ဒီအကြောင်းပြန်ပြီးနောက်ပိုင်းမှာ သူတို့က ဒီမပြောမဆိုနဲ့ အဓမ္မပြောင်းရွှေ့မှုတွေက ဖြစ်လာတာပေါ့။”
Your browser doesn’t support HTML5
ရှမ်းလက်နက်ကိုင်နှစ်ဖွဲ့ အနာဂတ်
TNLA တအာန်းနဲ့ SSPP ရှမ်းတပ်ဖွဲ့တွေဟာ တရုတ်မြန်မာနယ်စပ်အခြေစိုက် UWSA ၀ တပ်ဖွဲ့ဦးဆောင်တဲ့ FPNCC ခေါ် ပြည်ထောင်စုနိုင်ငံရေးဆွေးနွေးညှိနှိုင်းရေးကော်မတီမှာ ပါဝင်ထားကြတာပါ။ လက်ရှိ ဖြစ်ပေါ်နေတဲ့ မပြေလည်မှုတွေကို ညှိနှိုင်းဆွေးနွေး အဖြေရှာသွားမှာဖြစ်တယ်လို့လည်း ဗိုလ်မှူး စိုင်းဖုန်းဟန်က ပြောပါတယ်။
“ ပလောင်နဲ့ ရှမ်းက နှစ်ပေါင်းများစွာ ဒီ ရှမ်းပြည်ထဲမှာ အတူတကွနေထိုင်လာတဲ့ လူမျိုးတွေဖြစ်တယ်။ တပ်ကလည်း ဒါ တော်လှန်ရေးအဖွဲ့အစည်း မဟာမိတ်တွေလည်း ဖြစ်တယ်။ ဆိုတော့ ကျနော်တို့ SSPP အနေနဲ့ ပြောနိုင်တာကတော့ ငြိမ်းချမ်းစွာ အတူတကွ ယှဉ်တွဲနေထိုင်ရေးမူကို ကျင့်သုံးပြီးမှ ညှိနှိုင်းရင်းနဲ့ ဒီကလာအတွင်းမှာ ဘယ်လို ပူးပေါင်းဆောင်ရွက်ပြီးတော့မှ ရပ်တည်နေထိုင်သွားကြမလဲဆိုတဲ့ဟာကို အဓိကအနေနဲ့ ကျနော်တို့ လုပ်ချင်တယ်ပေါ့ဗျာ။ ”
နမ့်ခမ်းဒေသ အဖြစ်အပျက်နဲ့ပတ်သက်ပြီး မေးမြန်းနိုင်ဖို့ တအန်းအမျိုးသားလွတ်မြောက်ရေးတပ်မတော် TNLA က ပြောရေးဆိုခွင့်ရှိသူကို ဆက်သွယ်ခဲ့ပေမယ့် ဖုန်းပိတ်ထားလို့ ဆက်သွယ်လို့ မရခဲ့ပါဘူး။
TNLA ပြောရေးဆိုခွင့်ရှိသူ လွေးယေဦးက TNLA က နမ့်ခမ်းကို သိမ်းယူပြီးနောက်မှာ SSPP တပ်က သူတို့ သိမ်းယူထားတဲ့စခန်းတွေမှာ လာရောက်နေရာယူခဲ့ကြောင်း၊ ဒီအတွက် နှစ်ဘက်ဆွေးနွေးပြီးနောက်မှာ SSPP တပ်တွေကို နေရာပြောင်းရွှေ့ခဲ့တာဖြစ်ကြောင်း ဧရာဝတီသတင်းဌာနကို ဖြေကြားထားပါတယ်။
SEE ALSO: လဲချားမှာ စစ်ကောင်စီနဲ့ SSPP တိုက်ပွဲဖြစ်တဆက်တည်းမှာပဲ ဒေသတွင်းရှိ အခြားအဖွဲ့အစည်းတွေနဲ့ ဖြစ်ပေါ်လာတဲ့ မပြေလည်မှုတွေကို ဗဟိုချင်း ချိတ်ဆက်ပြီး နိုင်ငံရေးနည်းအရ ဖြေရှင်းသွားမှာဖြစ်ကြောင်းလည်း ပြောဆိုထားပါတယ်။
ရှမ်းမြောက်ဒေသအတွင်းမှာ KIA ကချင်၊ MNDAA ကိုးကန့်၊ TNLA တအာန်း(ပလောင်)နဲ့ SSPP/SSA မြောက်ပိုင်းတပ်ဖွဲ့တွေ အဓိက လှုပ်ရှားနေတာဖြစ်ပါတယ်။ ၁၀၂၇ စစ်ဆင်ရေးနောက်ပိုင်းမှာတော့ လက်နက်ကိုင်အဖွဲ့တွေအကြားမှာ နယ်မြေထိန်းချုပ်မှုနဲ့ပတ်သက်ပြီး အငြင်းပွားတဲ့ သတင်းတွေလည်း ထွက်ပေါ်လာနေပါတယ်။
ရှမ်းမြောက် ဒေသခံတဦးကတော့ တိုင်းရင်းသားလက်နက်ကိုင်အဖွဲ့တွေအကြား မပြေလည်မှုတွေက ကြာလာရင် လူမျိုးအချင်းချင်းအကြား ယုံကြည်မှု ကျဆင်းလာနိုင်တာကြောင့် အချင်းချင်း ပြေလည်အောင် ညှိနှိုင်းစေလိုကြောင်း ပြောပါတယ်။
“ သူတို့ အချင်းချင်း နားလည်မှုလွဲရင်တော့ ကျနော်တို့ လူထုကတော့ နေဖို့ ခက်တာပေါ့ဗျာ။ ဟို လူမျိုးရေး ပဋိပက္ခမဖြစ်တာတောင် လူထုကြားကတော့ ယုံကြည်မှုတော့ ကြာလာရင်တော့ နည်းနည်းလေးတော့ ထိခိုက်လာမှာပေါ့။ ဖြစ်စေချင်တဲ့ ဆန္ဒကတော့ အချင်းချင်း ညှိနှိုင်းကြပေါ့။ ပြေပြေလည်လည် ဒါပါပဲ။”
လက်ရှိအချိန်မှာတော့ ရှမ်းမြောက်ဒေသက လားရှိုး- မူဆယ် ပြည်ထောင်စုလမ်းမကြီးကို အသုံးမပြုနိုင်ဘဲ တောလမ်းတွေကနေ သွားလာနေရတာနဲ့ စစ်ကောင်စီဘက်က ကုန်ပစ္စည်းတင်သွင်းမှု ကန့်သတ်တာကြောင့် ကုန်စည်စီးဆင်းမှု ခက်ခဲနေသလို လမ်းခရီးမှာလည်း လက်နက်ကိုင်အဖွဲ့အစည်း အမျိုးမျိုးက ဂိတ်ကြေးကောက်ယူတာကြောင့် ကုန်ပစ္စည်းရှားပါးတာနဲ့ ဈေးနှုန်းကြီးမြင့်တာတွေကို ရင်ဆိုင်နေကြရပါတယ်။
Your browser doesn’t support HTML5
TNLA နဲ့ SSPP အကြား အငြင်းပွါးနေတဲ့ နမ့်ခမ်းမြို့အုပ်ချုပ်ရေး