ကရင်အမျိုးသားအစည်းအရုံး၊ မြိတ်-ထားဝယ်ခရိုင် တပ်မဟာ (၄) ထိန်းချုပ်နယ်မြေထဲကိုစစ်ကောင်စီရဲ့ ခလရ−၁၀၃ တပ်ရင်းကတပ်ရင်းမှူး ဒုဗိုလ်မှူးကြီး အောင်ဟိန်းအပါအဝင် စစ်ကောင်စီတပ်ဖွဲ့ဝင် (၄၈)ဦး လက်နက်ချအညံ့ခံခဲ့ပြီး လက်နက်ခဲယမ်းတွေလည်းသိမ်းဆည်းရမိတယ်လို့ ကေအန်ယူက ထုတ်ပြန်ခဲ့ပါတယ်။ ဒီသတင်းကိုဗွီအိုအေသတင်းထောက် မအေးအေးမာကသတင်းပေးပို့ထားပါတယ်။
ကရင်အမျိုးသားအစည်းအရုံး၊ မြိတ်−ထားဝယ်ခရိုင် တပ်မဟာ (၄) ထိန်းချုပ်နယ်မြေထဲမှာဧပြီလ (၁၅) ရက်နေ့က မောထာဒေသနဲ့ ထီးထာကြားမှာ စစ်ကောင်စီတပ်သားတွေ တပ်စခန်းဆုတ်ခွါပြီး ထီးထာ့ဗျူဟာနဲ့ပေါင်းစည်းဖို့လုပ်ဖို့လာတုန်း ကရင်အမျိုးသားလွတ်မြောက်ရေးတပ်တွေက ကြားဖြတ်တိုက်ခိုက်မူတွေလုပ်ခဲ့တာပါ။ ဒီအတွက် ခလရ−၁၀၃ တပ်ရင်းမှ တပ်ရင်းမှူး ဒုဗိုလ်မှူးကြီး အောင်ဟိန်းအပါအဝင် စစ်ကောင်စီတပ်ဖွဲ့ဝင် (၄၈)ဦး လက်နက်ချအညံ့ခံခဲ့တယ်လို့ ကေအန်ယူက သတင်းထုတ်ပြန်ခဲ့ပါတယ်။
ဒီအကြောင်းနဲ့ပတ်သက်လို့ ကေအန်ယူ သတင်းနဲ့ပြန်ကြားရေးဌာနကတာဝန်ရှိသူတဦးကိုမေးတဲ့အခါမှာတော့အခုလိုပြောပါတယ်။
စစ်ကောင်စီတပ်ဖွဲ့ဝင် (၄၈)ဦး လက်နက်ချအညံ့ခံခဲ့ကြောင်း KNU ထုတ်ပြန် (ဧပြီ ၁၆၊ ၂၀၂၄)
"အဲဒါတော့မှန်ကန်တယ် ကျနော်ပြောနိုင်တာကတော့ လူ ၅၀ကျော်လက်နက်ချအညံ့တယ် လက်နက်ကတော့လက်နက်ကြီးငယ် ပေါင်း ၆၀ကျော် ရရှိတာမှန်ကန်တယ် ကျနော်တို့ဘက်ကထုတ်ပြန်တာကတော့ ၄၈ဦးဖြစ်တယ်၊ မိသားစုဝင်တွေလည်းပါတယ်ဆိုတော့ အားလုံး ၅၀ကျော်လို့ပြောလို့ရပါတယ်။"
ဒီသတင်းနဲ့ပတ်သက်လို့တော့စစ်ကောင်စီဘက်က သတင်းထုတ်ပြန်တာမရှိသေးပါဘူး။ တပ်မဟာ ၄ ဘက်မှာတော့ စစ်ကောင်စီကိုတိုက်ခိုက်တဲ့ စစ်ကြောင်းတွေကတော့ KNLA တပ်ရင်း ၁၀၊ တပ်ရင်း ၂၇၊ တပ်ရင်း ၂၀၃ နဲ့ PDF ပူးပေါင်းတပ်ဖွဲ့တို့ ကပူးပေါင်းတိုက်ခိုက်ခြင်းဖြစ်ပြီး ပွိုင့်ဖိုက်၊ (စက်လတ်)နဲ့ လက်နက်ကြီး RPG အပါအဝင် စုစုပေါင်း လက်နက် ၆၈ လက် သိမ်းဆည်းရမိတယ်လို့ကရင်အမျိုးသားအစည်းအရုံးကသတင်းထုတ်ပြန်ခဲ့ပါတယ်။
Your browser doesn’t support HTML5
စစ်ကောင်စီ တပ်ဖွဲ့ဝင် ၅၀ နီးပါး လက်နက်ချကြောင်း KNU သတင်းထုတ်ပြန်