ဘော်လခဲက စစ်ကောင်စီတပ်စခန်းကို ကရင်နီပူးပေါင်းတပ်ဖွဲ့တွေ သိမ်းပိုက်

ကယားပြည်နယ်၊ ဒေသအခေါ် ကရင်နီနယ်ထဲက စစ်တပ် စခန်းတခုကို ကရင်နီပြည် ပြည်သူ့လွတ်မြောက်ရေးတပ်မတော် (KPLA) က သိမ်းပိုက်လိုက်တယ်လို့ KPLA နဲ့ ကရင်နီပြည် လူမျိုးပေါင်းစုံ ပြည်သူ့လွတ်မြောက်ရေးတပ်ဦး (ကလလတ) တို့က သတင်းထုတ်ပြန်ပါတယ်။ ဘောလခဲမြို့နယ်ထဲက ခမရ - ၁၁၂ တပ်စွဲထားတဲ့ ၁၂ မိုင်ကုန်းစခန်းကို သိမ်းပိုက်နိုင်ခဲ့ပြီး လက်နက် ခဲယမ်းမျိုးစုံနဲ့ စစ်သုံး ပစ္စည်းတွေ သိမ်းပိုက်နိုင်ခဲ့တယ်လို့ ဓါတ်ပုံတွေနဲ့ ထုတ်ပြန်ထားတာဖြစ်ပါတယ်။

ရခိုင်ပြည်နယ်ထဲမှာလည်း ရက္ခိုင့်တပ်တော် AA နဲ့ စစ်ကောင်စီတပ်တွေ ဆက်လက်တိုက်ပွဲဖြစ်နေတာမှာ မြောက်ဦးမြို့နယ်ထဲက စစ်တပ်ဘက်က နောက်ဆုံးကျန်တဲ့ ရဲတပ်ရင်း ၃၁ ကို ဖေဖော်ဝါရီ ၈ ရက်နေ့က တိုက်ခိုက် သိမ်းပိုက်လိုက်နိုင်ပြီလို့ AA က သတင်းထုတ်ပြန်ပါတယ်။ တိုက်ခိုက်ရေး စစ်သင်္ဘော ၃ စီးကိုလည်း နစ်မြုပ်အောင် တိုက်ခိုက်နိုင်ခဲ့သလို နောက်စစ်သင်္ဘောတစီးကိုလည်း ပျက်စီးအောင် ဖျက်ဆီး တိုက်ခိုက်နိုင်ခဲ့တယ်လို့ AA က သတင်းထုတ်ပြန်ပါတယ်။

စစ်ကိုင်းတိုင်း၊ ကောလင်းမြို့မှာလည်း စစ်ကောင်စီဘက်က မြို့ထဲကို ထိုးစစ်ဆင်တိုက်ခိုက်ခဲ့ပြီး တိုက်ပွဲတွေ ဆက်လက် ပြင်းထန်နေစဲ ဖြစ်ပါတယ်။ ကချင်တိုင်းရင်းသား လက်နက်ကိုင် KIA တပ်တွေနဲ့ ပြည်သူ့ကာကွယ်ရေး PDF တပ်တွေက နိုဝင်ဘာလတုန်းက ကောလင်းမြို့ကို တိုက်ခိုက် သိမ်းပိုက်ထားတာဖြစ်ပါတယ်။

ဘော်လခဲက စစ်ကောင်စီတပ်စခန်းကို ကရင်နီပူးပေါင်းတပ်ဖွဲ့တွေ သိမ်းပိုက်