အိန္ဒိယ ဒီဝါလီမီးထွန်းပွဲ ဆီမီးအများဆုံး ဂင်းနစ်စံချိန်တင်
အိန္ဒိယနိုင်ငံမှာ ဟိန္ဒူဘာသာဝင်တွေ အတွက် အထွဋ်အမြတ် ဘာသာရေးပွဲတော် ဒီဝါလီ မီးထွန်းပွဲ ဒီကနေ့က စပြီး ကျင်းပနေကြသလို၊ ပွဲတော်အကြိုည စနေနေ့တုန်းကတော့ Uttar Pradesh ပြည်နယ်၊ အယုဒ္ဒယမြို့မှာရှိတဲ့ ဟိန္ဒူ ဘုရားကျောင်းကြီးမှာ ဆီမီး ၂ သန်းကျော် ထွန်းညှိပြီး ဆီမီးအများဆုံး ကမ္ဘာ့ ဂင်းနစ်စံချိန် မှတ်တမ်း ဝင်သွားပါတယ်။
တနှစ်ထက်တနှစ် အရေအတွက် ပိုများအောင် လုပ်ပြီး ကမ္ဘာ့ စံချိန်ချိုးနိုင်ဖို့အတွက် လူမှု အလွှာပေါင်းစုံက လူတန်းစား ပေါင်းစုံ စေတနာ့ဝန်ထမ်းများစွာ ပါဝင်ခဲ့ကြပြီး ဆီမီးပေါင်း ၂ သန်း ၂ သိန်း ၂ သောင်း ၃ ထောင် ထွန်းညှိခဲ့ကြတာပါ။ ပြီးခဲ့တဲ့ ၂၀၂၂ ခုနှစ်တုန်းကတော့ ဆီမီးပေါင်း ၁ သန်းခွဲကျော် ထွန်းပြီး အဲ့ဒီအချိန်က အများဆုံး စံချိန် တင်ခဲ့ပါတယ်။
ဟိန္ဒူ ဘာသာဝင်တွေ အတွက် မြင့်မြတ်တဲ့ အထင်ကရမြို့ Uttar Pradesh မှာရှိတဲ့ ရာမ နတ်ဘုရားကျောင်းတော်ကြီးနဲ့ Sarayu မြစ်ကမ်းတလျှောက် ၃ ကီလိုမီတာရှည်လျားတဲ့ ဆီမီးတန်းကြီး ဖြစ်အောင် ထွန်းညှိ ပူဇော်ခဲ့ကြတာပါ။
အိန္ဒိယနိုင်ငံမှာ နှစ်စဥ်နှစ်တိုင်း ခုလို ဆောင်းဦးဝင်ချိန် ကျင်းပတဲ့ ဒီပါလီ မီးထွန်းပွဲ တော်ဟာ ဟိန္ဒူဘာသာရေး ပွဲတော်တွေထဲမှာတော့ အထင်ရှားဆုံး ပွဲတော်တခုဖြစ်ပါတယ်။
Your browser doesn’t support HTML5
အိန္ဒိယ ဒီဝါလီမီးထွန်းပွဲ ဆီမီးအများဆုံး ဂင်းနစ်စံချိန်တင်