၈၈ မျိုးဆက် ခေါင်းဆောင်တွေအနေနဲ့ တဦးချင်းဆုံးဖြတ်ချက်အရ နိုင်ငံရေး လုပ်ဆောင်ကြတာဖြစ်ပြီး ပုံသဏ္ဍာန် ကွဲပြီးတော့ ဦးတည်ချက်တခုတည်းကို သွားကြတာဖြစ်တယ်လို့ ပြည်သူ့ပါတီဥက္ကဋ္ဌ ဦးကိုကိုကြီးက ဗွီအိုအေကိုပြောပါတယ်။ ၂၀၁၅ ရွေးကောက်ပွဲမှာ ဝင်ရောက်ယှဉ်ပြိုင်ဖို့ စီစဉ်တာကနေ မဖြစ်ခဲ့တာကရော ပြည်သူ့ပါတီ ပေါ်ပေါက်လာဖို့ အကြောင်းအချက် တခုဖြစ်စေခဲ့ပါသလား … ပါတီသစ်တခုအနေနဲ့ အဓိကရင်ဆိုင်ရမယ့် အခြေအနေတွေနဲ့ အခက်အခဲတွေ ဘာတွေပါလဲ … စတာတွေနဲ့ပတ်သက်ပြီး ရန်ကုန်မြို့၊ ဗဟန်းအရပ်က ပြည်သူ့ပါတီဌာနချုပ်မှာ ဝိုင်းတော်သား ကိုကျော်ကျော်သိန်းက ဦးကိုကိုကြီးကို တွေ့ဆုံ မေးမြန်းထားပါတယ်။
ကိုကျော်ကျော်သိန်း။ ။ အခုလို voa ကတွေ့ဆုံခွင့်ပြုတာ ကျေးဇူးတင်ပါတယ်။ ပထမဦးဆုံးမေးခွန်းက ဦးကိုကိုကြီးတို့သည် ၈၈ မျိုးဆက် ခေါင်းဆောင်တွေအနေနဲ့သိထားတယ် တိုင်းပြည်က ၊ ၈၈ အရေးတော်ပုံကနေ လုပ်လာခဲ့တယ်။ ဒီ ၈၈ မျိုးဆက်ကျော်ငးသား ခေါင်းဆောင်တွေမှာ တခြားခေါင်းဆောင်တွေလည်းရှိတယ်။ ပါတီထောင်တဲ့အခါမှာ အတူတူပါမလာတဲ့ခေါင်းဆောင်တွေရှိတယ် ဥပမာ ကိုမင်းကိုနိုင်လိုမျိုးပေါ့နော်။ ဒီခေါင်းဆောင်တွေကြားထဲမှာ ဦးကိုကိုကြီးတို့ ပါတီကိစ္စနဲ့ ပတ်သက်ပြီးတော့ သဘောထားကွဲပြားပြီးတော့ အရပ်စကားနဲ့ပြောရင်တော့ ခွာပြဲသွားကြတာလား။
ဦးကိုကိုကြီး။ ။ တကယ်တော့ နိုင်ငံရေးလုပ်တယ်ဆိုတာက တဦးချင်းရဲ့ ဆုံးဖြတ်ချက်၊ ရပ်တည်ချက်တွေနဲ့ လုပ်ကြရတာပါ။ ဆိုတော့ မင်းကိုနိုင်ပေါ့ သူဆိုရင် ကျနော်နဲ့ နှစ်ပေါင်းများစွာ ရင်းနှီးခဲ့တဲ့ ညီအကိုလိုလည်း နေခဲ့တဲ့ ရဲဘော်ရဲဘက်လည်းဖြစ်ပါတယ်။ သူကိုယ်တိုင်က သူ့ရွေးချယ်မှုပေါ့နော်။ ဆိုတော့ သူ့အနေနဲ့ ပါတီ နိုင်ငံရေးလုပ်ဖို့ ရည်ရွယ်ချက်မရှိဘူး။ သူက ပန်းချီအနှပညာအစရှိသဖြင့် သူအားသန်တဲ့ အကြောင်းကိုလည်း ကျနော့်ကို တရားဝင်ပြောပါတယ်။ နောက်တခုကလည်း သူ ကျနော့်ကိုအားပေးပါတယ်။ ငါက မင်းလိုမျိုး နိုင်ငံရေးလုပ်ဖို့ တစိုက်မတ်မတ်ပြင်ဆင်ထားတာမဟုတ်ဘူး။ အဲဒီတော့ လူငယ်တယောက်အဖြစ်နဲ့ သူ့ခေတ် သူ့အခါမှာ မတရားတာကို ဆန့်ကျန်တဲ့ တရားမျှတမှုအတွက် ရပ်တည်တဲ့ တာဝန်ကို သူယူခဲ့တာပေါ့လေ။ သူ့ရွေးချယ်မှုကလည်း ကျနော်တို့ဒါ ပြောပြီးသားဖြစ်တော့ ပါတီထဲပါမလာခြင်းဖြစ်တော့ နဂိုကတည်းက သူ့ရပ်တည်ချက်ပဲဖြစ်တယ်လို့ ပြောပါရစေ။ ဘာဖြစ်လို့လဲဆိုတော့ ကျနော်တို့ ပါတီထောင်ဖို့ ဖြစ်ကတည်းက မကြာခဏလည်း သတင်းမီဒီယာမှာပြောဖူးပါတယ်။ ကျနော်တို့ ထီးရိပ်တခုအောက်မှာ ၈၈ မျိုးဆက်တွေထဲက ပါတီလုပ်သူကလုပ်မယ်၊ အရပ်ဖက်အဖွဲ့အစည်းလုပ်သူကလုပ်မယ်၊ အစရှိသဖြင့် ပုံသဏ္ဍာန်ကွဲပြီးတော့ ဦးတည်ချက်တခုတည်းကို သွားကြတာဖြစ်တယ်ဆိုတာကို သူကိုယ်တိုင်လည်း အထပ်ထပ်အခါခါပြောပြီးသားဖြစ်ပါတယ်။
ကိုကျော်ကျော်သိန်း။ ။ နောက်တခုက ၂၀၁၅ ရွေးကောက်ပွဲမတိုင်ခင် ဦးကိုကိုကြီးတို့ ၈၈ မျိုးဆက် ခေါင်းဆောင်တွေထဲက NLD ပါတီဝင်ကြတယ်။ နောက်ဆုံးအမတ်လောင်းအထိ ဖြစ်ဖို့ဆိုပြီးတော့ ပြင်ဆင်ခဲ့တယ် နောက်ဆုံးဖြစ်မလာဘူးပေါ့နော်။ အဲဒီလိုဖြစ်မလာခဲ့တဲ့ အခြေအနေကနေ အခုလို ပြည်သူ့ပါတီဆိုပြီးတော့ နိုင်ငံရေးပါတီအသစ်တခု ပေါ်ပေါက်လာဖို့အတွက် အကြောင်းအချက်တခု ဖြစ်စေခဲ့လား။
ဦးကိုကိုကြီး။ ။ အရင်ဆုံးပြောရရင်တော့ ကျနေ်ာတို့က အထူးသဖြင့်ကျနော်ပေါ့နော် ၈လေးလုံးအရေးတော်ပုံကြီးမှာ ပါလာကတည်းက နိုင်ငံရေးကို ရူးသွပ်စွာလုပ်ခဲ့တာ ဆိုတော့ ထဲထဲဝင်ဝင် နိုင်ငံရေးလုပ်တော့မယ်ဆိုရင် နိုင်ငံရေးပါတီ တရပ်အနေနဲ့ လုပ်ရမယ်ဆိုတာ ကျနော်က ပိုင်းဖြတ်ပြီးသား ခံယူပြီးသား ။ ၂၀၁၅ဟာ အချိုးအကွေ့တခုဖြစ်သွားတာတော့ အမှန်ပဲ ဆိုတော့ ဒီနိုင်ငံရေးပါတီ တရပ်အဖြစ်နဲ့ လုပ်ဖို့ဆိုတာတော့ နဂိုကတည်းက ကျနော်တို့ စိတ်ကူး ရည်ရွယ်ချက်လည်းဖြစ်ပါတယ်။ သို့သော် ၂၀၁၅ မှာက ပြည်သူတွေလည်းမျှော်လင့်တယ်။ ၈၈ ခေါင်းဆောင်တွေနဲ့ NLD နဲ့ တသားတည်းဖြစ်ရင်ကောင်းမှာပဲ ဆိုတာ မျှော်လည်းမျှော်လင့်တယ်။မျှော်လင့်တာတင်မကဘူး NLD ကနေပြီးတော့ ကိုယ်စားလှယ်လောင်အဖြစ်နဲ့ တင်လိုက်တယ်ဆိုရော ဝမ်းသာ အားရဖြစ်တဲ့ ပြည်သူတွေကိုလည်း ကျေျနာ်တို့ ကြည့်ပြီးတော့ ကျနော်တို့ စိတ်ထဲမှာ တော်တော် ကြည်လည်းကြည်နူးတယ်။ တော်တော်လည်း တာဝန်ကြီးတယ်လို့ အဲဒီအချိန်က ခံစားခဲ့ရပါတယ်။ သို့သေည် အကြောင်းကြောင်းကြောင့် အဲဒီတုန်းက ကြိုးပမ်းချက်က မဖြစ်လာတာကလည်း ပါတီထောင်ဖို့အတွက် အကြောင်းတရားတခုပေါ့ တခုတည်းသော အကြောင်းတရားကတော့ မဟုတ်ပါဘူး။ အကြောင်းတရားတခုဖြစ်ခဲ့တယ်လို့ ပြောရမှာပါ။
ကိုကျော်ကျော်သိန်း။ ။ နိုင်ငံရေးပါတီသစ်တခု အနေနဲ့ ဒီကနေ့ မြန်မာ့နိုင်ငံရေးအခင်းအကျင်း၊ တခြားနိုင်ငံရေးပါတီအနေအထား လက်ရှိရင်ဆိုင်နေရတဲ့ နိုင်ငံရေးအကျပ်အတည်းတွေပေါ့။ ဒီလိုနိုင်ငံရေးပါတီသစ်တခု အတွက်က ရင်ဆိုင်နေရတဲ့အခြေအနေ အခက်အခဲတွေ အများကြီးရှိမှာပါ။ အဲဒီအထဲကမှ အဓိက ကျတဲ့ အချက် ၂ ချက် ၃ ချက်လောက်ဆိုရင် ဘာကိုများပြောချင်သလဲ။
ဦးကိုကိုကြီး။ ။ အခုကတော့ နိုင်ငံရေးပါတီဆိုတာက နိုင်ငံရေးအရ ရပ်တည်ချက် ဦးတည်ချက် တူတဲ့ သူတွေ စုစည်းထားတာ။ တချို့ကတော့ ရပ်တည်ချက် ဦးတည်ချက် တူတဲ့နေရာတွေရှိသလို ကွဲတဲ့နေရာတွေလည်းရှိတယ်။ ဒါကြောင့် တစုတစည်းထဲ ပါတီအနေနဲ့ မရပ်တည်နိုင်ဘူးဆိုတဲ့ လူတွေလည်းရှိတယ်။ အဲဒီအထဲကမှ ပါတီတခုအဖြစ်နဲ့ ရပ်တည်မယ်ဆိုရင် လူအများနဲ့ စုစည်းတည်ဆောက်ရတာဖြစ်တဲ့အတွက် အချင်းချင်းကြားထဲမှာ ညှိနှိုင်းဆွေးနွေးရတာ ၊ ငြင်းခုံရတာကတော့ နိုင်ငံရေးရဲ့ ဖြစ်ရိုးဖြစ်စဉ်ပါပဲ။ ဆိုတော့ ပါတီတည်ဆောက်ရေးမှာ ကိုယ့်အချင်းချင်း လုပ်ဖော်ကိုင်ဖက်တွေကြားမှာ အသင်းအဖွဲ့ပုံစံရအောင် လုပ်ရတာလည်း ကျနော်တို့ ဖြတ်သန်းရတဲ့ သဘာ၀ တခုဖြစ်တယ်။ နောက်တခုကတော့ ပြည်သူတွေနဲ့ ဆက်ဆံရေး။ ပြည်သူတွေကြားထဲမှာ ပါတီအသစ်တခုပေါ်လာတယ် ဘာတွေထူးခြားမလဲ တို့အတွက် ဘာတွေ သူတို့ လုပ်ပေးနိုင်မှာလဲ ဆိုတာကို ဖြည့်ဆည်းပေးနိုင်ဖို့ဆိုတာလည်း လက်တွေ့ကျတဲ့ စိန်ခေါ်မှုလို့မြင်ပါတယ်။ အဲဒီတော့ ၂ ပိုင်းတော့ရှိတာပေါ့။ တပိုင်းက တချို့ကိစ္စတွေက လုပ်ပိုင်ခွင့် အခွင့်အာဏာရမှ ဆောင်ရွက်လို့ ရတဲ့အပိုင်းတွေရှိတယ်။ တပိုင်းကတော့ ရွေးကောက်ပွဲ နိုင်သည်ဖြစ်စေ ရှုံးသည်ဖြစ်စေ ပါတီ တခုအနေနဲ့ ပြည်သူ့အသံကို ဖော်ထုတ်ပေးဖို့ ပြည်သူတွေရဲ့ နစ်နာမှုတွေကို အတက်နိုင်ဆုံးအကာအကွယ်ပေးဖို့ အကျိုးဆောင်ပေးဖို့ဆိုတာက ပါတီတခုက မဖြစ်မနေ လုပ်ရမယ့်ကိစ္စဖြစ်ပါတယ်။ ပြည်သူတွေကို စည်းရုံးတယ်ဆိုတာကလည်း ပါတီဝင်ကြပါ၊ မဲပေးကြပါ လို့ စည်းရုံးလို့မရဘူး။ တကယ့်တကယ်က ဘယ်လောက်ကျနော်တို့ ပြည်သူတွေအတွက် ကိုယ်စားပြုနိုင်သလဲ အကာအကွယ်ပေးနိုင်သလဲ၊ အကျိုးဆောင်နိုင်သလဲ ဆိုတဲ့အပေါ်မှာ မူတည်ပြီးတော့ ပြည်သူရဲ့ ထောက်ခံမှု အတက်အကျဆိုတာရှိတယ် အဲဒီတော့ ဒါတွေကတော့ မဖြစ်မနေ ဖြတ်သန်းရမယ့် ဆောင်ရွက်ရမယ့် ကိစ္စလို့ မြင်တယ်။ နောက်တခုကတော့ ဘဏ္ဍာရေးအခက်အခဲပေါ့။ လက်ရှိရှိပြီးသား ပါတီကြီးများဆိုတာက ဘာပဲပြောပြော သူတို့မှာ ဘဏ္ဍာငွေအတောင့်အတင်းနဲ့ လုပ်ကိုင်နေတဲ့အချိန်မှာ ကျနော်တို့ကျတော့ လုပ်ဖော်ကိုင်ဖက်တွေအချင်းချင်းကြား၊ အားပေးကူညီသူတွေကြား ထဲမှာ အခု ပါတီ ရုံးခန်းဖွင့်နိုင်အောင်အတွက်တောင်မှ တော်တော်လေး ကြိုးစားရတဲ့ အခြေအနေမျိုးရှိပါတယ်။ ဒါနဲ့ ကျနော်တို့ ရင်ဆိုင်ရတဲ့ အခက်အခဲတခုလို့ ပြောလို့ရပါတယ်။"
ရန်ကုန်မြို့၊ ဗဟန်းအရပ်က ပြည်သူ့ပါတီဌာနချုပ်မှာ ဝိုင်းတော်သား ကိုကျော်ကျော်သိန်းက ဦးကိုကိုကြီးကို တွေ့ဆုံ မေးမြန်းခဲ့တာပါ။
