အမေရိကန်လူမျိုးတွေနဲ့ တခြားနိုင်ငံသားတွေ မြန်မာ့ယဉ်ကျေးမှုနဲ့ မြန်မာနိုင်ငံအကြောင်း ပိုမို သိရှိစေရေးအတွက် ရည်ရွယ်ပြီး အာရှနွယ်ဖွား အမေရိကန်လူမျိုးတွေရဲ့ ယဉ်ကျေးမှုအခမ်းအနားမှာ မြန်မာတွေလည်း ပထမဆုံးအကြိမ်အဖြစ် ပါဝင်ဆင်နွဲခဲ့ကြပါတယ်။ ဒီအကြောင်း Virginia ပြည်နယ်မြို့တော် Richmond မှာ မေလ ၁၉ ရက်၊ စနေနေ့က ကျင်းပတဲ့အခမ်းအနားမှာ ကိုယ်တိုင် သတင်းသွားယူခဲ့တဲ့ ကိုဇော်ဝင်းလှိုင်က တင်ပြပေးပါမယ်။
နှစ်စဉ် မေလဟာ အမေရိကန်ပြည်ထောင်စုမှာရှိနေကြတဲ့ အာရှ၊ ပစိဖိတ် ကျွန်းနိုင်ငံသားတွေအတွက် သီးခြား သတ်မှတ်ပေးထားတဲ့ လဖြစ်တာနဲ့အညီ Virginia ပြည်နယ်ရဲ့မြို့တော် Richmond နဲ့ အနီးဝန်းကျင်မှာရှိတဲ့ အာရှနွယ်ဖွားတွေစုပြီး အာရှ၊ ပစိဖိတ်နိုင်ငံများရဲ့ ယဉ်ကျေးမှုပွဲတော်ကို ကျင်းပခဲ့ကြပါတယ်။
(၂၁) ကြိမ်မြောက် ကျင်းပတဲ့ ဒီနှစ်မှာတော့ Richmond ဒေသမှာရှိနေတဲ့ မြန်မာမိသားစုတွေ စုပြီး ဒီအာရှယဉ်ကျေးမှုပွဲတော်မှာ ပထမဆုံးအကြိမ်အဖြစ် ပါဝင် ဆင်နွဲကြပါတယ်။ တခြား အာရှ၊ ပစိဖိတ်နိုင်ငံတွေနည်းတူ မြန်မာတွေကလည်း ကိုယ့်ယဉ်ကျေးမှုနဲ့ဆိုင်တဲ့ ပစ္စည်းတွေကို ပြသတာ၊ အုန်းနို့ခေါက်ဆွဲနဲ့ လဘက်စတဲ့ မြန်မာအစားတွေကို ချက်ပြုတ် ရောင်းချခဲ့ကြတာတွေအပြင် မြန်မာနဲ့ တိုင်းရင်းသားရိုးရာ အကတွေကိုလည်း ကပြ ဖျော်ဖြေခဲ့ကြပါတယ်။
ဒီ အာရှယဉ်ကျေးမှုပွဲတော်မှာ မြန်မာနိုင်ငံအနေနဲ့ ပထမဆုံးအကြိမ် စတင်ပါဝင်နိုင်ရေးအတွက် ဦးဆောင် ကြိုးပမ်းခဲ့သူကတော့ ဒေါက်တာ ခင်ကျော်ကျော်သိန်း ဖြစ်ပါတယ်။ သူက ဒီပွဲမှာ ပါနိုင်အောင် ကြိုးစား လုပ်ဆောင်ခဲ့ရပုံနဲ့ ပတ်သက်လို့ အခုလို ရှင်းပြပါတယ်။
"ဒီတခါကတော့ မြန်မာပြည်ပထမဦးဆုံးပါတဲ့ပွဲပါ။ ကိုယ့်နိုင်ငံမပါဘူးဆိုတော့ စိတ်ထဲမှာမကောင်းဘူးပေါ့နော် ။ ဒီနှစ်တော့ ရအောင်လုပ်မယ်ဆိုပြီးတော့ အဲလိုပဲ အသိတွေနဲ့ ဟိုမေးဒီမေးနဲ့ ဒီ Association ကိုရအောင်ဝင်အောင်လို့ ကြိုးပမ်းခဲ့ရတယ်ပေါ့နော်။ ကြိုးပမ်းလို့ရလာတဲ့အခါကျတော့ အများကြီးတော့ ကြိုးစားပြီးတော့ ဒီနေ့ဒီလို Culture ပွဲကို အားလုံးစုပေါင်းပြီးတော့ လှလှပပလေးဖြစ်အောင်ပြနိုင်တယ်။ အစားအသောက်မှာလည်း မြန်မာအစားအသောက်ကို အခုအရမ်းရောင်းလို့ကောင်းတယ်။ ဒီကလူတွေလည်းအရမ်းကြိုက်တယ်ဆိုတော့အရမ်းပျော်တယ်။ နောက် Activity ဆိုရင်လည်း သနပ်ခါးလိမ်းပေးထားတယ် အကုန်လုံးကလည်း သဘောကျကြတယ်။ ကျမဆိုရင်အရမ်းပျော်ပါတယ်။ ကလေးတွေ နောင်လာနောက်သားတွေအတွက်ပေါ့နော် ကိုယ့်အတွက်မဟုတ်ပါဘူး။ ကမ္ဘာကနေပြီး မြန်မာဆိုတာလေးကို သိသွားစေချင်တဲ့စေတနာလေးနဲ့ အရင်းခံပြီးတော့ လုပ်ခဲ့တာပါ။"
မြောက်ကယ်ရိုလိုင်းနား ပြည်နယ်ကနေ လာပြီး ဒီပွဲမှာ ကရင်တိုင်းရင်းသားအကနဲ့ ပါဝင် ကူညီ ဖျော်ဖြေပေးခဲ့တဲ့ အဖွဲ့ခေါင်းဆောင် ကိုကျော်မင်းဦးကလည်း မြန်မာနိုင်ငံက တိုင်းရင်းသား ဓလေ့ ထုံးတန်းတွေကို ပြသချင်တဲ့အတွက် ရောက်လာခြင်း ဖြစ်ကြောင်း ရှင်းပြပါတယ်။
"နိုင်ငံတကာရဲ့ ဓလေ့ရိုးရာတွေပြတဲ့ပွဲဆိုတော့ ကိုယ့်မြန်မာရဲ့ကျေးလက်ရိုးရာတွေကို ပြတာတွေ ကရင်တိုင်းရင်းသားတွေလည်း သူတို့ရိုးရာယဉ်ကျေးမှုတွေကို ပြစေချင်တယ် အဲဒီအတွက်လာပြီးတော့ လုပ်တာပါ။"
မြန်မာအဖွဲ့အနေနဲ့ မင်းသမီးအက ၂ မျိုး၊ ကရင်ရိုးရာ ကျေးလက် စကောအကနဲ့ ခေတ်ပေါ် တေးသီးချင်းတပုဒ်ဖြစ်တဲ့ အဆိုတော် မနောရဲ့ သနပ်ခါးလေးနဲ့ မောင့်ချစ်သူ သီချင်းနဲ့ မြောက်ကယ်ရိုလိုင်းနားပြည်နယ်က ကရင် လှပျိုဖြူတွေကလည်း ကပြ ဖျော်ဖြေခဲ့ကြပါတယ်။
ဒီ အာရှ၊ ပစိဖိတ် ယဉ်ကျေးမှုပွဲတော်မှာ နိုင်ငံအလိုက် သူတို့ရဲ့ သက်ဆိုင်ရာ ရိုးရာပစ္စည်းတွေကို ပြသထားကြသလို အစားအသောက် တွေကိုလည်း ခမ်းမအတွင်းမှာဘဲ ချက်ခြင်း ချက်ပြုတ် ရောင်းချကြပါတယ်။ မြန်မာနိုင်ငံအတွက် ပြသထားတဲ့ ခန်းမအရှေ့မှာ ရုပ်သေး အကကိုပါ တပါတည်း ကပြ ဖျော်ဖြေပေးနေခဲ့တာကြောင့် လူအများရဲ့ စိတ်ဝင်စားမှုလည်း ရရှိခဲ့ပါတယ်။
ဒါ့အပြင် မြန်မာ့ရိုးရာ သနပ်ခါးသွေးနည်း၊ လိမ်းနည်းတွေကို ကျောက်ပြင်၊ သနပ်ခါးတုံး အစစ်တွေနဲ့လည်း မြန်မာလူငယ်တွေက သရုပ်ပြခဲ့ကြပြီး ရောက်လာတဲ့ ပရိတ်သတ်ထဲက စိတ်ဝင်စားသူ လူကြီး၊ လူငယ်မရွေးကို သနပ်ခါး လိမ်းပေးခဲ့ပါတယ်။
စင်မြင့်ပေါ်မှာတော့ ပါဝင်ကြတဲ့ နိုင်ငံအသီးသီးက သူတို့ သန်ရာ သန်ရာ အကနဲ့ တခြား ဖျော်ဖြေရေး အစီအစဉ်တွေကို အလှည့်ကျ တင်ဆက် ဖျော်ဖြေခဲ့ကြပါတယ်။ ဒီအာရှ၊ ပစိဖိတ် ယဉ်ကျေးမှုပွဲတော်ကို အာရှနိုင်ငံသားတွေအပြင် စိတ်ဝင်စားကြတဲ့ ဒေသခံ အမေရိကန်တွေလည်း အများအပြား တက်ရောက် အားပေးပြီး အစားအသောက်တွေကို ဝယ်စားခဲ့ကြတာကို တွေ့ရပါတယ်။
မြန်မာအဖွဲ့ကတော့ အခုနှစ်ထက်သာအောင် လာမယ့်နှစ်တွေမှာ ပါဝင် ဆင်နွဲသွားကြဖို့ အခုကတည်းက အားတင်းထားကြပြီ ဖြစ်ပါတယ်။
