၂၀၁၇ ခုနှစ် ဥရောပချံပီယံလိဂ် ဖလား နောက်ဆုံး ဗိုလ်လုပွဲကို စနေနေ့ညက စပိန်နိုင်ငံက Real Madrid အသင်းနဲ့ အီတလီနိုင်ငံက Juventus အသင်းတို့ ယှဉ်ပြိုင် ကစားကြတာမှာ Real Madrid အသင်းက ၄ ဂိုး - ၁ ဂိုးနဲ့ အပြတ်အသတ် အနိုင်ရပြီး ချံပီယံ ဖလားကို ဆွတ်ခူးသွားပါတယ်။
ဗြိတိန်နိုင်ငံ၊ ဝေလနယ်က Cardiff မြို့မှာ ကျင်းပတဲ့ ချံပီယံလိဂ်ပွဲမှာ Real Madrid က တိုက်စစ်မှူး Cristiano Ronaldo က ၂ ဂိုး သွင်းပေးခဲ့တာ ဖြစ်ပါတယ်။ Ronaldo က ပထမပိုင်း မိနစ် ၂၀ မှာတဂိုးနဲ့ ဒုတိယပိုင်း ၆၄ မိနစ်မှာ တဂိုး အသီးသီး သွင်းပေးခဲ့တာပါ။ Real Madrid အတွက် ကျန် ၂ ဂိုးကိုတော့ Carlos Casemiro က ဒုတိယပိုင်း ၆၁ မိနစ်မှာနဲ့ Marco Asencio က ဒုတိယပိုင်း မိစ် ၉၀ တို့မှာ အသီးသီး သွင်းခဲ့ကြတာပါ။
Juventus အတွက် တလုံးထဲသော ချေပဂိုးကိုတော့ Mario Mandzukic က ပထမပိုင်း ၂၇ မိနစ်မှာ သွင်းပေးခဲ့တာပါ။
မနှစ်က ချံပီယံ ဖြစ်ထားထဲ့ Real Madrid အသင်း အခုလို အနိုင်ရလိုက်တာကြောင့် ဥရောပဖလားကို ချံပီယံလိဂ် အဖြစ် ပြောင်းလဲ ကျင်းပပြီးတဲ့နောက် ချံပီယံဆုကို ပထမ ဆုံးအကြိမ် ၂ နှစ်ဆက်တိုက် အနိုင်ရပြီး ခုခံ ကာကွယ်နိုင်တဲ့အသင်း ဖြစ်လာခဲ့ ပါတယ်။ အရင် ဥရောပဖလားအဖြစ်နဲ့ ကစားကြတဲ့ ကာလတုန်းကတော့ A.C. Milan အသင်းက ၁၉၈၉ ခုနှစ်နဲ့ ၁၉၉၀ ခုနှစ်တွေမှာ ၂ နှစ်ဆက်တိုက် ဗိုလ်စွဲခဲ့ဘူးပါတယ်။
ဒါ့အပြင် ဒါဟာ Real Madrid အသင်းအနေနဲ့ ၁၂ ကြိမ်မြောက် ချံပီယံဖလားကို ဆွတ်ခူးနိုင်တာဖြစ်ပြီး ၄ နှစ်အတွင်းမှာ ၃ ကြိမ်မြောက် အနိုင်ရတာလည်း ဖြစ်ပါတယ်။
