မြန်မာနိုင်ငံနဲ့ ရိုဟင်ဂျာပြဿနာတွေကို ကမ္ဘာနဲ့ အထူးသဖြင့် အာဆီယံတိုင်းပြည်တွေက ခိုင်ခိုင်မာမာ အရေးယူဆောင်ရွက်ကြရပါမယ်လို့ အင်ဒိုနီးရှားလွှတ်တော် ၂ ရပ်ကြား ပူးပေါင်းဆောင်ရွက်ရေးဌာန ဒုတိယဌာနမှူးက ပြောလိုက်ပါတယ်။
“ကမ္ဘာ့ဆွေးနွေးပွဲတွေ တက်ခွင့်မပေးတာ၊ လက်နက်နဲ့ စီးပွါးရေး ပိတ်ဆို့အရေးယူတာ၊ သူတို့ရဲ့ နိုင်ငံကူးလက်မှတ်တွေနဲ့ ပြည်ဝင်ခွင့်ဗီဇာတွေကို ပိတ်ပင်တာနဲ့ လူမျိုးသုဥ်းသတ်ဖြတ်မှု ကျူးလွန်သူတွေကို နိုင်ငံတကာ တရားစီရင်ရေးရုံး ICJ ကို ပို့တာတွေ ဆောင်ရွက်နိုင်ပါတယ်” လို့ စနေနေ့က အင်တာနက်ပေါ်တင်လိုက်တဲ့ထုတ်ပြန်ချက်မှာ မစ္စတာ အာ့ချ်မက် ဟာဇစ် တိုဟား (Achmad Hafisz Thohir) က ပြောလိုက်ကြောင်း အင်ဒိုနီးရှား နိုင်ငံတော်ပိုင် အင်တာရာ သတင်းဌာန က ဖော်ပြခဲ့တာပါ။
ရိုဟင်ဂျာပြည်သူတွေကို လက်ရှိ အာဏာရစစ်ကောင်စီက မစောင့်ရှောက်တော့တဲ့အပြင် အစုလိုက် အပြုံလိုက် သတ်ဖြတ်ဖို့လည်း လက်တုံ့မနေတော့ဘူးလို့ ကျေညာချက်က ဆိုပါတယ်။ စစ်ကောင်စီ အာဏာပိုင်တွေက တာဝန်ယူစိတ်လည်းမရှိသလို အခြေခံ လူ့အခွင့်အရေးတွေကိုလည်း မဖြည့်ဆည်းတော့ဘူးလို့ မစ္စတာတိုဟားက ပြောပါတယ်။ ဘင်္ဂလားဒေ့ရှ်နိုင်ငံက ရိုဟင်ဂျာ ဒုက္ခသည်တွေဟာ အင်ဒိုနီးရှားနိုင်ငံကို လှေတွေနဲ့ ရောက်လာကြတဲ့ပြဿနာကို အင်ဒိုနီးရှားက ရင်ဆိုင်နေရတာပါ။
