မြန်မာနိုင်ငံ ပဋိပက္ခတွေအတွင်းက အရပ်သားပြည်သူတွေအတွက် လူသားချင်းစာနာကူညီမှု လိုအပ်ချက်တွေကြီးမားနေပြီး ရံပုံငွေကြေးလိုအပ်ချက်ကြောင့် ကူညီရေးလုပ်ငန်းတွေကို ထိခိုက်စေတယ်လို့ ကုလသမဂ္ဂက ပြောပါတယ်။
မြန်မာနိုင်ငံတွင်း ပဋိပက္ခအရှိန်တိုးမြင့်လာတဲ့အတွက် ၆ လအတွင်း အိုးအိမ်စွန့်ခွာထွက်ပြေးရသူ ၅၀ ရာခိုင်နှုန်း တိုးလာပြီး အခုဆိုရင် တနိုင်ငံလုံးမှာ အရပ်သား သုံးသန်းကျော် အိုးအိမ်မဲ့ဖြစ်နေကြရပါတယ်လို့ ကုလ အတွင်ရေးမှုးချုပ်ရုံး ပြောခွင့်ရသူ Stephane Dujarric က ပြောသွားတာပါ။ ဒါကြောင့် လိုအပ်နေသူတွေအတွက် အရေးတကြီးအကူအညီတွေကို မြန်မာနိုင်ငံတွင်း လူသားချင်းစာနာမှုအသိုက်အဝန်းက အကူအညီတွေပေးနေရာမှာ ရံပုံငွေ မလုံလောက်မှုကြောင့် ကူညီရေးလုပ်ငန်းတွေ အလွန်အမင်း ထိခိုက်ရတယ်လို့ ကုလ ပြောခွင့်ရသူက ဆိုပါတယ်။
မြန်မာနိုင်ငံအတွက် လူသားချင်းစာနာကူညီမှု ရံပုံငွေ ၉၉၃ သန်း ပန်ကြားထားရာမှာ အခုအချိန်အထိဆိုရင် ၆၃ သန်း/ ရာခိုင်နှုန်းအားဖြင့် ၆ ရာခိုင်နှုန်းကိုပဲ လက်ခံရရှိတယ်လို့ ကုလ ပြောခွင့်ရသူက ပြောပါတယ်။ လာမယ့်ကာလတွေမှာ မုန်တိုင်းရာသီရောက်လာပြီမို့ ကူညီကာကွယ်ရေးတွေ ပိုပြီး လိုအပ်လာမယ်လို့လည်း ပြောပါတယ်။
ချင်း၊ မကွေးနဲ့ စစ်ကိုင်းတိုင်းအတွင်းမှာ နေရပ်စွန့်ခွာထွက်ပြေးရသူ တသိန်းခွဲနီးပါးရှိပြီး နိုင်ငံ အရှေ့တောင်ဘက်ခြမ်းမှာ အိုးအိမ်မဲ့ဒုက္ခသည် ၉ သိန်းကျော်ရှိနေတယ်လို့ ကုလ မှတ်တမ်းတွေမှာ ဖော်ပြပါတယ်။ ရခိုင်မှာတော့ အိုးအိမ်မဲ့ဒုက္ခသည် သုံးသိန်းခွဲကျော်ရှိတယ်လို့ ဆိုပါတယ်။ ဒီလို ပြည်တွင်းဒုက္ခသည်တွေဆီ သွားရောက်နိုင်ဖို့ အရေးတကြီးအခြေအနေဖြစ်တယ်လို့လည်း ကုလသမဂ္ဂထုတ်ပြန်ချက်မှာဖော်ပြထားပါတယ်။
Forum