မြန်မာနိုင်ငံ ငြိမ်းချမ်းရေးလုပ်ငန်းစဉ် ဆက်လက် အကောင်အထည်ဖော်ရေး နဲ့ မြန်မာနိုင်ငံနှင့် ကုလသမဂ္ဂ ပူးပေါင်းဆောင်ရွက်ရေး တို့အတွက် နိုင်ငံခြားရေးဝန်ကြီးဌာန ပြည်ထောင်စု ဝန်ကြီး ဒေါ်အောင်ဆန်းစုကြည် နဲ့ ကုလသမဂ္ဂအတွင်းရေးမှူးချုပ်မြန်မာနိုင်ငံဆိုင်ရာ အထူးအကြံပေးပုဂ္ဂိုလ် Mr. Vijay Nambiarတို့ ဒီကနေ့ နေပြည်တော် မှာ တွေ့ဆုံ ဆွေးနွေးခဲ့ပါတယ်။ Mr. Vijay Nambiar အနေနဲ့ မြန်မာနိုင်ငံ ငြိမ်းချမ်းရေးလုပ်ငန်းစဉ်မှာ ဆက်လက်ပါဝင်မယ် ဆိုရင် အိမ်နီးချင်း နိုင်ငံတွေနဲ့သာမက တိုင်းရင်းသားလက်နက်ကိုင်အဖွဲ့တွေ နဲ့ ဆွေးနွေးရာမှာပါ ကြားဝင် ဆောင်ရွက်နိုင်မှာ ဖြစ်ကြောင်း သုံးသပ်တာတွေ ရှိနေပါတယ်။ ဒီသတင်းကို ဗီအိုအေမြန်မာပိုင်းရဲ့ သတင်းထောက် ကိုမိုးဇော်က တင်ပြထားပါတယ်။
နိုင်ငံခြားရေးဝန်ကြီးဌာန ပြည်ထောင်စု ဝန်ကြီး ဒေါ်အောင်ဆန်းစုကြည်နဲ့ ကုလသမဂ္ဂအတွင်းရေးမှူးချုပ် မြန်မာနိုင်ငံဆိုင်ရာ အထူးအကြံပေးပုဂ္ဂိုလ် Mr. Vijay Nambiar တို့ဟာ နိုင်ငံခြားရေးဝန်ကြီးဌာန ပြည်ထောင်စုဝန်ကြီးဧည့်ခန်းမ မှာ ဒီကနေ့မနက် ၉နာရီခွဲကနေ ၁၀နာရီခွဲ အထိ ၁နာရီလောက်ဆွေးနွေး ခဲ့တာဖြစ်ပါတယ်။
အဓိက ဆွေးနွေးတဲ့အချက်တွေကိုတော့ နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ဒုညွှန်ကြားရေးမှုးချုပ် ဒေါ်အေးအေးစိုးက အခုလို ပြောပါတယ်။
“အဓိကတော့ သူကလာတာ ကုလသမဂ္ဂ နဲ့ မြန်မာနိုင်ငံတို့ကြားမှာ ရှေ့ဆက် အနာဂတ်မှာပေါ့ ဘယ်လိုပူးပေါင်းပြီးတော့ သူပြောတာတော့ cooperation modality ပေါ့၊ ဘယ်လိုနည်းလမ်းတွေနဲ့ ဆက်လက်ပူးပေါင်းဆောင်ရွက်မယ် ဆိုတာရယ် နောက်ပြီးအခု လုပ်နေတဲ့ peace process နဲ့ပတ်သက်ပြီး သူတို့ဘာတွေဆက်ပြီး ကူညီနိုင်သလဲ ၊ ဘယ်အခန်းကဏ္ဍ ကနေပြီးတော့ ဆက်ပြီး ပါဝင်နိုင်သလဲဆိုတာကို အဓိကထားဆွေးနွေးတာပါ အဲဒီ ၂ ချက်ပါ။
ပြည်ထောင်စုဝန်ကြီးဘက်က တုံပြန်ဆွေးနွေးတဲ့အချက်တွေကိုတော့ အခုလို ဆက်ပြောပါတယ်။
“ဝန်ကြီးဘက်ကလည်း ဒါအများကြီးရှေ့ဆက်ပြီးတော့ ပူးပေါင်းလုပ်ဆောင်ဖို့ ရှိတယ်ဆိုတာ ပြောတာပေါ့။ အဓိကတော့ peace process က ဘယ်လောက်အရေးကြီးတယ်ဆိုတာရယ် ဘယ်လိုအခန်းကဏ္ဍကနေ ပါဝင်နိုင်တယ်ဆိုတာရယ်ကို ပြောတာပါရှင့်။”
မြန်မာနိုင်ငံရဲ့ ငြိမ်းချမ်းရေးလုပ်ငန်းစဉ်မှာ အရင်အစိုးရ လက်ထက် ကတည်းကပါဝင်ဆောင်ရွက်ခဲ့ပြီး လက်ရှိ ၂၁ရာစုပင်လုံ ညီလာခံ ပြင်ဆင်ရေးကော်မတီရဲ့ အဖွဲ့ဝင်တဦးဖြစ်တဲ့ ဦးလှမောင်ရွှေကတော့ Mr. Vijay Nambiarအနေနဲ့ မြန်မာနိုင်ငံ ငြိမ်းချမ်းရေးလုပ်ငန်းစဉ်မှာ ဆက်လက်ပါဝင်မယ်ဆိုရင် ဆွေးနွေးညှိနှိုင်းရာမှာ အဖွဲ့အစည်း တခုခုဖက်က ဘက်မလိုက်ဘဲ ကြားဝင် ဆောင်ရွက်နိုင်မှာ ဖြစ်ကြောင်း ပြောပါတယ်။
“အထူးသဖြင့်တော့ ကျနော်တို့ နိုင်ငံရဲ့ Geopolitic အနေအထားအရ အိမ်နီးနားချင်းနိုင်ငံတွေ အကုန်လုံးက ဒီကုလသမဂ္ဂမှာပါတော့ ကျနော်တို့ ငြိမ်းချမ်းရေးမှာလည်း သူတို့အနေနဲ့ပေါ့ ကြားကနေပါဝိုင်းပြီးကူလုပ်ပေးနိုင်တဲ့ အနေအထားမျိုးရှိတာပေါ့ဗျာ။ နောက်တခုကတော့ ကချင်လွတ်လပ်ရေးအဖွဲ့ အဖွဲ့ပေါ့နော် KIO နဲ့ဆွေးနွေးဖို့ ကိစ္စလိုမျိုးဟာတွေမှာလည်း သူတို့အနေနဲ့လည်း ကြားထဲကနေဝင်ပြီးတော့ ဆွေးနွေးပွဲရောက်အောင်ပေါ့လေ သူတို့ကူညီခဲ့တာမျိုးတွေလည်းရှိတယ်။ ယုံကြည်မှုတည်ဆောက်တဲ့အချိန်မှာ ယုံကြည်မှုရအောင်လုပ်ပေးနိုင်တာတွေမှာလည်း ပါခဲ့တာတွေရှိပါတယ်။”
ကုလသမဂ္ဂအတွင်းရေးမှူးချုပ်မြန်မာနိုင်ငံဆိုင်ရာ အထူးအကြံပေးပုဂ္ဂိုလ် Mr. Vijay Nambiar ဟာ အစိုးရနဲ့ တိုင်းရင်းသား လက်နက်ကိုင်အဖွဲ့တွေရဲ့ ငြိမ်းချမ်းရေးနဲ့ တစ်နိုင်ငံလုံး အပစ်အခတ်ရပ်စဲရေး ဆိုင်ရာဆွေးနွေးပွဲတွေမှာ ကုလသမဂ္ဂရဲ့ လေ့လာသူ ကိုယ်စားလှယ်အဖြစ် အစဉ်တစိုက်ပါဝင် တက်ရောက်ခဲ့သူဖြစ်ပြီး ၂၀၁၅ခုနှစ် အောက်တိုဘာလ ၁၅ရက်နေ့က အစိုးရနဲ့ တိုင်းရင်းသား လက်နက်ကိုင်အဖွဲ့ ၈ဖွဲ့ ပါဝင်လက်မှတ်ရေးထိုးခဲ့တဲ့ တနိုင်ငံလုံးပစ်ခတ် တိုက်ခိုက်မှုရပ်စဲရေး သဘောတူစာချုပ်ကိုလည်း နိုင်ငံတကာအသိသက်သေအဖြစ် ပါဝင်လက်မှတ်ရေးထိုးခဲ့ပါတယ်။
နိုင်ငံခြားရေးဝန်ကြီးဌာန ပြည်ထောင်စု ဝန်ကြီးနဲ့ နိုင်ငံတော်ရဲ့ အတိုင်ပင်ခံ ပုဂ္ဂိုလ်ဒေါ်အောင်ဆန်းစုကြည် ကတော့ မြန်မာနိုင်ငံမှာ ထာဝရ ငြိမ်းချမ်းရေးအတွက် ၂၁ ရာစု ပင်လုံညီလာခံကို တစ်လ နှစ်လအတွင်းကျင်းပဖို့ ဧပြီလ ၂၇ ရက်နေ့က ပြောဆိုထားပြီး ၂၁ ရာစု ပင်လုံညီလာခံ ပြင်ဆင်ရေးကော်မတီကတော့ လာမယ့် ဇူလိုင်လမှာ ကျင်းပဖို့ ပြင်ဆင်နေပါတယ်။
