အီရန်ရဲ့ နိုင်ငံတကာနဲ့ ရေနံကုန်သွယ်ရေး ပျက်သွားအောင် အမေရိကန်ဘက်က လုပ်နေတာဟာဆိုရင် အီရန် အစိုးရကို ဖြုတ်ချပြီး အီရန်ဘက်က အညံ့ခံ ဒူးထောက်လာအောင် ကြိုးပမ်းမှု ဖြစ်တယ်လို့ အီရန် နိုင်ငံခြားရေး ဝန်ကြီး Mohammad Javad Zarif က စွပ်စွဲလိုက်ပါတယ်။
အမေရိကန် ရုပ်သံ Fox News Sunday အစီအစဉ်နဲ့ တွေ့ဆုံမေးမြန်းခန်းမှာ အီရန် နိုင်ငံခြားရေး ဝန်ကြီး Zarif က အစ္စရေးလ် ဝန်ကြီးချုပ် Benjamin Netanyahu၊ အမေရိကန် အမျိုးသားလုံခြုံရေး အကြံပေး John Bolton ၊ နောက် ဆော်ဒီအာရေးဗျနဲ့ အာရပ်စော်ဘွားများ ပြည်ထောင်စုက ခေါင်းဆောင်တွေ ပါတဲ့ B အဖွဲ့က သမ္မတ Donald Trump မလုပ်လိုတဲ့ ထိပ်တိုက်တွေ့ရေးဆီကို တွန်းပို့ဖို့ ကြိုးစားနေတာလို့ ပြောဆိုခဲ့ပါတယ်။
အမေရိကန်ကို စစ်ပွဲတွင်း ရောက်လာအောင် သူတို့က ကြိုးစားနေကြတာလို့ နိုင်ငံခြားရေး ဝန်ကြီး Zarif က ပြောပါတယ်။ ရည်မှန်းချက်ကတော့ အနည်းဆုံး အီရန် အစိုးရ အပြောင်းအလဲ အတွက် ရည်မှန်းတာ လို့လည်းသူက ပြောဆိုခဲ့ပါတယ်။
အလားတူ Fox News အစီအစဉ်မှာဘဲ အမေရိကန် အမျိုးသား လုံခြုံရေး အကြံပေး John Bolton က ပြောဆိုတာမှာတော့ အမေရိကန်ရဲ့ ရည်မှန်းချက်က အစိုးရ ပြောင်းလဲဖို့ မဟုတ်ဘူး၊ ဒါပေမယ့် ပြုမူလုပ်ဆောင်မှု ပြောင်းလဲရေး ဖြစ်တယ် အထူးသဖြင့်တော့ အီရန်ရဲ့ နျူးကလီးယား လက်နက် အစီအစဉ်တွေနဲ့ ပဲ့ထိန်းဒုံး စမ်းသပ်မှုတွေကို အဆုံးသတ်ရမှာ ဖြစ်တယ်လို့ ပြောဆိုသွားပါတယ်။ အီရန် ပြည်သူတွေ အနေနဲ့ ပိုပြီး ကောင်းမွန်တဲ့ အစိုးရနဲ့ ထိုက်တန်ပါတယ်လို့လည်း Bolton က ပြောပါတယ်။
