တရုတ်သမ္မတ Xi Jinping နဲ့ ကြာသပတေးနေ့ ဘေဂျင်းမြို့မှာတွေ့ဆုံပြောဆိုခဲ့ပြီးနောက် EU နဲ့ တရုတ်နိုင်ငံကြား ဟန်ချက်ညီတဲ့ကုန်သွယ်မှုဆက်ဆံရေး ထားရှိသွားဖို့ သဘောတူခဲ့တယ်လို့ EU ဥရောပသမဂ္ဂအဖွဲ့ ဥက္ကဋ္ဌ Ursula Von der Leyen က ပြောပါတယ်။
EU အဖွဲ့ကိုယ်စား Von der Leyen နဲ့ Charles Michel တို့ဟာ ၂ ရက်ကြာခရီးစဥ်အဖြစ် တရုတ်နိုင်ငံကိုသွားရောက်ပြီး သမ္မတ Xi နဲ့ တွေ့ဆုံကာ ကုန်သွယ်ရေးနဲ့ ထောက်ပံ့မှုတွေမှာ အငြင်းပွားနေတဲ့ကိစ္စ၊ ယူကရိန်းစစ်မှာ အကြီးအကျယ်အမြင်ကွဲပြားနေတဲ့ကိစ္စတွေကို ဆွေးနွေးခဲ့တာပါ။ ဆွေးနွေးမှုအကြောင်း အကျဥ်းရုံးပြောဆိုရာမှာတော့ − မမျှတတဲ့ ယှဥ်ပြိုင်မှုမျိုးကို EU ခေါင်းဆောင်တွေအနေနဲ့ ဘယ်လိုမှလက်မခံနိုင်ကြောင်း Von der Leyen က ထပ်လောင်းပြောဆိုသွားပါတယ်။ တရုတ်နဲ့ EU ကြား ကုန်သွယ်ရာမှာ နှစ်စဥ်ဆိုသလို ဒေါ်လာ ဘီလျံ ၂၀၀ လောက် မမျှမတနဲ့ ကွာဟမှုရှိနေတာကြောင့် တရုတ်ဈေးကွက်ထဲဝင်ခွင့်ရအောင် တိုးချဲ့လုပ်ဆောင်ပေးဖို့ EU ဘက်က တိုက်တွန်းလိုက်ပါတယ်။
ဥရောပဈေးကွက်ထဲတင်ပို့မယ့် တရုတ်ရဲ့လျှပ်စစ်ကားတွေကို အခွန်သက်ညှာခွင့်ပေးသင့် မပေးသင့်ဆိုတာနဲ့ တရုတ်နည်းပညာပစ္စည်းတင်ပို့မှုပေါ် တားမြစ်ထားတဲ့ကိစ္စမှာ EU က ပြန်သုံးသပ်ဖို့ စုံစမ်းစစ်ဆေးနေတာကိုလည်း တရုတ်က မကြိုက်ဘဲဖြစ်နေပါတယ်။
