သြစတြေးလျနဲ့ နယူးဇီလန်နိုင်ငံတွေမှာ ကျင်းပနေတဲ့ ၂၀၂၃ အမျိုးသမီး ကမ္ဘာ့ဖလားဘောလုံးပွဲ ဒီကနေ့ အုပ်စု (D) က အသင်း ၄ သင်း ကစားကြတာမှာ ပထမပွဲစဉ်ဖြစ်တဲ့ အင်္ဂလန်နဲ့ ဒိန်းမတ်ပွဲမှာ အင်္ဂလန်အသင်းက ၁ ဂိုး ဂိုးမရှိနဲ့ အနိုင်ရသွားပါတယ်။ အုပ်စု (D) ဒုတိယပွဲစဉ်ဖြစ်တဲ့တရုတ်နဲ့ ဟေတီတို့ ကစားကြတာမှာတော့ တရုတ်အသင်းက ၇၄ မိနစ်မှာ ပင်နယ်တီကန်ခွင့်ရပြီး ၁ ဂိုး၊ ဂိုးမရှိနဲ့ အနိုင်ရသွားပါတယ်။
အုပ်စု (D) မှာ အင်္ဂလန်အသင်းက ကစားပြီးသမျှ ၂ ပွဲစလုံးကို အနိုင်ရထားတဲ့အတွက် ၆ မှတ်နဲ့ ရှေ့က ဦးဆောင်နေပြီး ဒုတိယအဆင့် ရှုံးထွက်ပွဲစဉ်တွေကို တက်ရဖို့ သေချာသလောက် ရှိနေပါတယ်။ ဒိန်းမတ်နဲ့ တရုတ်အသင်းတို့ကတော့ ၂ ပွဲ ကစားပြီးတာမှာ တပွဲနိုင်၊ တပွဲရှုံးနဲ့ ၃ မှတ်စီ ရထားကြပါတယ်။ ဟေတီအသင်းဟာ ၂ ပွဲ ရှုံးထားပြီးဖြစ်တာကြောင့် နောက်ဆုံးကစားမယ့်ပွဲစဉ်မှာ နိုင်နိုင် ရှုံးရှုံး ထွက်ရတော့မှာ ဖြစ်ပါတယ်။
လက်ရှိချန်ပီယံ အမေရိကန်အမျိုးသမီး ဘောလုံးအသင်းဟာ ဒီနှစ်မှာလည်း အနိုင်ရလိမ့်မယ်လို့ တစ်ပေးခံထားရပေမယ့် လောလောဆယ်မှာ တပွဲနိုင်၊ တပွဲသရေနဲ့ ၄ မှတ်ရထားပါတယ်။ ၂၀၁၁ ခုနှစ်က ချန်ပီယံဆုရထားတဲ့ ဂျပန်အသင်းဟာ ကစားပြီးသမျှ ၂ ပွဲစလုံးမှာ အနိုင်ရထားပြီး ၆ မှတ်ရထားပြီး အုပ်စု (C) မှာ ပထမနေရာအတွက် စပိန်အသင်းနဲ့ အမှတ်တူနေပါတယ်။
ဒီနှစ်အတွက် ပူးတွဲအိမ်ရှင်အဖြစ် လက်ခံကျင်းပနေတဲ့ သြစတြေးလျနဲ့ နယူးဇီလန်အသင်းတွေကတော့ တပွဲနိုင်၊ တပွဲရှုံးနဲ့ ၃ မှတ်စီ အသီးသီး ရထားကြပါတယ်။
