ညှိနှိုင်းမှုမရသေးတဲ့ ပုံနှိပ်ထုတ်ဝေရေး ဥပဒေ

ဦးသန်းလွင်ထွန်း ။ ။ မြန်မာနိုင်ငံ ပြည်သူလွှတ်တော်မှာ မကြာသေးခင်က အတည်ပြုပေးလိုက်တဲ့ ပုံနှိပ်ခြင်းနဲ့ ထုတ်ဝေခြင်း ဥပဒေဟာ မကျေနပ်မှုတွေ ရှိနေတဲ့အတွက် ဒီကိစ္စကို လွှတ်တော်ထဲမှာ ပြန်လည်ဆွေးနွေးဖို့ ဖြစ်နိုင်သေးတယ်လို့ ပြည်သူ့လွှတ်တော်ဥက္ကဋ္ဌ သူရဦးရွှေမန်း က ပြောကြားခဲ့ပါတယ်။ ဒီ ဥပဒေမူကြမ်းဟာ မြန်မာပြန်ကြားရေးဝန်ကြီးဌာနအနေနဲ့ မြန်မာစာနယ်ဇင်းကောင်စီနဲ့ ညှိနှိုင်းမှုမရှိဘဲ တဖတ်သတ် ရေးဆွဲတင်ပြခဲ့တဲ့ ဥပဒေကြမ်းဖြစ်တယ်လို့ မြန်မာစာနယ်ဇင်းကောင်စီနဲ့ သတင်းမီဒီယာကွန်ရက်အဖွဲ့ဝင် ဦးမြင့်ကျော် က ပြောဆိုပါတယ်။

ဦးမြင့်ကျော် ။ ။ ကျနော်တို့က မနှစ်က စက်တင်ဘာလမှာ ဝန်ကြီးဦးအောင်ကြည်နဲ့ တွေ့ခဲ့တယ်။ ပြီးတော့ ယာယီစာနယ်ဇင်းကောင်စီ ဖွဲ့စည်းခဲ့တယ်။ အဲဒီအချိန်က သူတို့မှာ ပုံနှိပ်ခြင်းနဲ့ ထုတ်ဝေခြင်း ဥပဒေ - ဆိုပါတော့ ၁၉၆၂ Printer and Publisher Registration Law ခေါ်တဲ့ ပုံနှိပ်သူများနဲ့ ထုတ်ဝေသူ မှတ်ပုံတင်ခြင်း ဥပဒေ။ အဲဒီလိုဟာမျိုးကို အစားထိုးမယ်လို့ ကျနော်တို့က အဲဒီအချိန်က လုံးဝမမျှော်လင့်ထားဘူး။ ကျနော်တို့က နားမလည်းတာ။ ပြန်ကြားရေးဝန်ကြီးဌာန နဲ့ စာနယ်ဇင်းကောင်စီ ကြားထဲမှာ အဲဒီလို ဥပဒေမျိုး ပြန်လုပ်လိမ့်မယ်လို့ မမျှော်လင့်ထားဘူး။ နောက်တခုက ကျနော်တို့ရဲ့ သတင်းမီဒီယာ ဥပဒေ Press Law လို့ခေါ်တဲ့ သတင်းမီဒီယာ ရေးဆွဲခွင့်ပေးတဲ့ အချိန်မှာ ကျနော်တို့က ပုံနှိပ်ထုတ်ဝေတဲ့ အပိုင်းကိုလည်း အဲဒီအထဲမှာပဲ အကျုံးဝင်စေမယ်။ ထည့်သွင်းမယ်။ ဒါပေမဲ့ ယေဘုယျအားဖြင့် အယူအဆကတော့ ပုံနှိပ်စက်တွေကို မှတ်ပုံတင်ခိုင်းတဲ့ဟာကို ကျနော်တို့က မလိုချင်တော့ဘူး။ ဒီဟာက ၆၂ ခုနှစ်ကတည်းက တောက်လျှောက် ပုံနှိပ်စက်တွေ မှတ်ပုံတင်။ တခါတလေ အဆုံးစွန်ပြောရရင် ကော်ပီရာ၊ မှတ်တူကူးစက်တောင် မှတ်ပုံတင်ရတဲ့ခေတ်တွေ ရှိခဲ့တော့။ ပုံနှိပ်စက်က သူ့ဘာသာသူ business လုပ်တာ ဘာမှ မှတ်ပုံတင်စရာ မလိုဘူးဆိုတဲ့ အဲဒီလိုမျိုး အယူအဆမျိုးကို အခြေခံထားတာတော့။ ပုံနှိပ်သူတွေ ၆၂ ဥပဒေက သတင်းမီဒီယာဥပဒေ ထွက်လာရင်။ ၆၂ ဥပဒေကို ဖျက်သိမ်းမယ်ဆိုတဲ့ စာပိုဒ်ကို နောက်ဆုံးမှာ ထည့်မယ်လို့ အဲဒီအချိန်ကတည်းက နားလည်းထားတာ။ ဒီ ဥပဒေ သီးခြားတခု။ ပုံနှိပ်ခြင်း နဲ့ ထုတ်ဝေခြင်း ဥပဒေ လို့ခေါ်တဲ့ ဥပဒေမျိုး ထပ်ထွက်လာလိမ့်မယ်လို့ အဲဒီအချိန်က မမျှော်လင့်ထားဘူး။

ဦးသန်းလွင်ထွန်း ။ ။ ပြီးခဲ့တဲ့ သတင်းပတ်တုန်းက မြန်မာ့အလင်းသတင်းစာမှာ ဖော်ပြထားတဲ့ ပြန်ကြားရေးဝန်ကြီးနဲ့ စာနယ်ဇင်းကောင်စီတို့ တွေ့ဆုံပွဲမှတ်တမ်း။ အဲဒီဟာကို ဖတ်ပြီးတော့ ကျနော် နားလည်းလိုက်တာကတော့ ပြန်ကြားရေးဝန်ကြီးဌာနအနေနဲ့ သတင်းစာနယ်ဇင်း ကောင်စီကို တာဝန်ပေးတာကတော့ သတင်းစာနယ်ဇင်းမီဒီယာ ရေးပါ။ သူတို့ဘက်ကတော့ ပုံနှိပ်ထုတ်ဝေရေး ဥပဒေကို ရေးဆွဲပါမယ်ဆိုတဲ့ဟာမျိုးကို နှစ်ဖက်အပြန်အလှန် နားလည်းမှုယူထားတယ်ဆိုတဲ့ ကျေကျေလည်လည် သဘောပေါက်တယ်လို့ ဖော်ပြထားတယ် မဟုတ်ဘူးလား။

ဦးမြင့်ကျော် ။ ။ အဲဒီနေရာမှာ တဆင့် လိုနေတာက ကြားမှာအဖြစ်အပျက်တခု ရှိတယ်။ ဘာလဲဆိုတော့ ပြီးခဲ့တဲ့နှစ် ၂၀၁၂ စက်တင်ဘာလ သဘောတူညီချိန်မှာ အဲဒီလိုမျိုး သူတို့ဘက်က ပုံနှိပ်သူ၊ ထုတ်ဝေသူ ဥပဒေမျိုး ထွက်လာလိမ့်မယ်ဆိုတဲ့ ဟာမျိုးက သူတို့ဘက်ကလည်း ကျနော်တို့ကို အသိမပေးခဲ့ဘူး။ ကျနော်တို့ကတော့ သတင်းမီဒီယာ ဥပဒေဟာ မီဒီယာနဲ့ ပတ်သက်လို့ အားလုံးကို လွှမ်းခြုံမယ်။ ဆိုပါတော့ broadcasting ကတော့ သီးခြားသွားရင် သွားလိမ့်မယ်။ ဒါပေမဲ့ ကျန်တဲ့ print media, online media တွေ အားလုံးကို လွှမ်းခြုံမယ်လို့ ကျနော်တို့က အဲဒီအချိန်တုန်းက နားလည်းထားတယ်။ သူတို့က ကျနော်တို့က ပုံနှိပ်သူနဲ့ ထုတ်ဝေသူတွေ ဥပဒေလိုမျိုး enterprise law, industrial law အဲဒီလိုမျိုး လုပ်ငန်းဥပဒေမျိုး လာလိမ့်မယ်လို့ အဲဒီအချိန်က မပြောထားဘူး။ ဒါပေမဲ့ ဖေဖေါ်ဝါရီလ ၂၈ ရက်မှာ သူတို့ သတင်းစာမှာ စပြီးတော့ ဥပဒေမူကြမ်း စကြေညာလိုက်တဲ့အချိန်မှာ စာနယ်ဇင်းကောင်စီနဲ့ မီဒီယာနယ်ပယ်မှာ ဘယ်လိုခေါ်မလဲ ... အံ့သြသွားတယ်။ "ဒီဟာက ၁၉၆၂ ဥပဒေကို ပြန်အသက်သွင်းမလား။ ဒီဟာမျိုးကို ကျနော်တို့က မလိုအပ်တော့ဘူးလို့ ယူဆထားတဲ့ဟာက ဘာဖြစ်လို့ ဝင်လာသလဲဆိုတဲ့ အဲဒီမှာ မတ်လထဲမှာ စာနယ်ဇင်းကောင်စီ က စာပို့တာတွေ။ ဒီ ဥပဒေမျိုး လက်မခံဘူးဆိုတဲ့ဟာတွေ မတ်လထဲမှာ ဖြစ်ပျက်ခဲ့တယ်။ မီဒီယာအဖွဲ့အစည်းတွေ၊ ဂျာနယ်လစ် သတင်းစာအဖွဲ့အစည်း၊သတင်းသမား အဖွဲ့အစည်းတွေက ဒါတွေကို ကန့်ကွက်ခဲ့တယ်။ ဒါပေမဲ့ အဲဒါပြီးတော့ သင်္ကြန်ပြီးတဲ့နောက်ပိုင်းမှာ ဧပြီလကုန် မေလပိုင်းမှာ ပြန်ကြားရေးဝန်ကြီးဌာနက စာနယ်ဇင်းကောင်စီကို လာပြီးတော့ ဆွေးနွေးတယ်။ ညွှန်ကြားရေးမှူးချုပ် ဦးတင့်ဆွေကို ဦးဆောင်ပြီးတော့ လာဆွေးနွေးတယ်။ ဆိုလိုတာက သူတို့ရဲ့ ပုံနှိပ်ခြင်းနဲ့ ထုတ်ဝေခြင်း လုပ်ငန်းဥပဒေနဲ့ ကျနော်တို့ရဲ့ သတင်းမီဒီယာဥပဒေနဲ့ ဘယ်လိုမှ ပဋိပက္ခမဖြစ်ပါဘူး။ အဲဒီနှစ်ခုက ဆန့်ကျင်ဘက် မဖြစ်ပါဘူး။ သူတို့ဆီကဟာကိုလည်း မလိုလားတဲ့အပိုင်းတွေ၊ သဘောမတူတဲ့အပိုင်းတွေကို ပြောပါ၊ ထောက်ပြပါ၊ ဝေဖန်ပါ၊ ဆွေးနွေးပါ။ နောက် ကျနော်တို့ရဲ့ သတင်းမီဒီယာဥပဒေကိုလည်း တချို့အပိုင်းတွေကို သူတို့ ဝေဖန်မယ်ပေါ့။ အဲဒီလိုမျိုး အစည်းအဝေး (၃) ကြိမ် လုပ်ခဲ့တော့။ အဲဒီ (၃) ကြိမ် လုပ်ပြီးတဲ့နောက်မှာ ကျနော်တို့ဘက်က ထောက်ပြချင်တဲ့အပိုင်းတွေ အချက်အလက်တွေနဲ့ ပြန်ကြားရေးဝန်ကြီးဌာနကို ပေးလိုက်တယ်။ အဲဒီဟာတွေသာ သူတို့ တကယ်သဘောထားမှန်မှန်နဲ့ တင်ပြခဲ့လို့ အဲဒီဟာတွေကို လွှတ်တော်က သူတို့တင်ပြတဲ့အတိုင်း လက်ခံတယ်ပေါ့။ အခုက သူတို့ တင်ပြတယ်လို့ပြောတယ်။ သို့ပေမယ့် ဘယ်လိုပုံစံနဲ့ တင်ပြတယ်ဆိုတာကို ကျနော်တို့ အခုအချိန်မှာ မသိနိုင်သေးဘူး။

ဦးသန်းလွင်ထွန်း ။ ။ ဒီနေရာမှာ သတင်းစာထဲမှာ ဖော်ပြထားတဲ့ အစည်းအဝေး မှတ်တမ်းအရဆိုလို့ရှိရင် ဝန်ကြီးဦးအောင်ကြည်ဘက်က စာနယ်ဇင်းကောင်စီကို စာ (၈) ကြိမ်ရေးတယ်။ ရေးပြီးတဲ့အခါမှာ တုန့်ပြန်ချက်မရဘူး။ ပြီးတော့ လိုအပ်ချက်အရ ပုံနှိပ်ဥပဒေကို သူတို့ အခု လွှတ်တော်ကို တင်လိုက်ရတဲ့အခါကြတော့ သူတို့အနေနဲ့ လွှတ်တော်ကို တင်ရုံပဲတင်နိုင်တယ်။ လွှတ်တော်ကနေ ဒီကိစ္စကို အတည်ပြုတယ်၊ မပြုတယ်ဆိုတာ လွှတ်တော်ကိစ္စ။ ဒါပေမဲ့ လွှတ်တော်က အတည်ပြုလိုက်ပြီးဆိုတော့ လွှတ်တော်ထဲမှာ အခု အံ့သြစရာကောင်းတဲ့ကိစ္စက ဒီကိစ္စကို လွှတ်တော်တင်လိုက်တယ်။ လွှတ်တော်အမတ်တွေက ဒီကိစ္စကို အတည်ပြုလိုက်တယ်ဆိုတဲ့နေရာမှာ တခဲနက်အတည်ပြုလိုက်တဲ့သဘောကို ကျနော်တို့ တွေ့ရတယ်။ အခုနောက်ပိုင်းမှာတောင် ဒေါ်အောင်ဆန်းစုကြည်ရဲ့ ပြောစကားအရဆိုလို့ရှိရင် သူတို့အနေနဲ့ ဒီကိစ္စက နှစ်ဖက်ကျေကျေလည်လည် ဆွေးနွေးထားပြီးတဲ့ကိစ္စလို့ ယူဆထားတဲ့အတွက်ကြောင့် အတည်ပြုပေးလိုက်ရပါတယ်ဆိုတဲ့ သဘောမျိုးဖြစ်နေတယ်။ အဲဒီတော့ လွှတ်တော်ထဲမှာလည်း ဒီကိစ္စကို အတည်ပြုပေးပါတယ်ဆိုတဲ့ လွှတ်တော်အမတ်တွေက ဒီကိစ္စကို ကျကျနန မလေ့လာပါနဲ့ မျက်စိစုံမှိတ်ပြီးတော့ ယူဆချက်တခုနဲ့ အတည်ပြုပေးလိုက်တယ်ဆိုတဲ့ သဘောရောက်မနေဘူးလား။

ဦးမြင့်ကျော် ။ ။ လွှတ်တော်အမတ်တွေအပိုင်းမှာလည်း မီဒီယာမှာ ဘာတွေဖြစ်နေတယ်ဆိုတဲ့ တချို့အပိုင်းတွေကို သူတို့လစ်ဟမှုအပိုင်းတွေလည်း ရှိတယ်လို့ ကျနော်ထင်တယ်။ မီဒီယာမှာ ရေးသားနေကြတဲ့ဟာတွေ၊ နောက်တော့ မီဒီယာသမားတွေက ဘာတွေလိုတယ်၊ လိုလားတယ်။ ပုံနှိပ်ထုတ်ဝေခြင်း ဥပဒေမှာ ဘာတွေ ဘယ်အချက်အလက်တွေကို အဓိကဝေဖန်ထားတယ်ဆိုတာမျိုးတွေကို သူတို့ လစ်ဟသွားတယ်။ ဒီကိစ္စတွေကို အာရုံမစိုက်နိုင်ဘူး။ မျက်စိလျှံသွားတယ်။ သူတို့ မဖတ်မိဘူးလို့ထင်တယ်။ ဘာဖြစ်လို့လဲဆိုတော့ ကျနော်တို့ ထောက်ပြတဲ့ အဓိကအကျဆုံး အချက်အလက်တခုကတော့ ပုံနှိပ်သူနဲ့ ထုတ်ဝေသူတွေကို လိုင်စင်သဘောမျိုး။ မှတ်ပုံတင်လို့တော့ ယေဘုယျအားဖြင့်ခေါ်တယ်။ လိုင်စင်သဘောမျိုး။ လိုင်စင်ရှိမှ လိုင်စင်ကို သိမ်းလိုက်ရင် လုပ်လို့မရဘူးဆိုတဲ့ အဲဒီအချက်ကို ကျနော်တို့ စာနယ်ဇင်းကောင်စီ နဲ့ တခြား မီဒီယာသမားတွေက ထောက်ပြကြတာပါ။ စာနယ်ဇင်းကောင်စီ ပြင်ဆင်ဖို့ ပေးတဲ့အချက်ထဲမှာ အဲဒါကလည်း အဓိကပါတယ်။ အခု ပြည်သူ့လွှတ်တော်မှာ အတည်ပြုလိုက်တဲ့အခါမှာ အဲဒီအချက်အလက်တွေ ကျနော်တို့ ပြောထားတဲ့ ပြင်ဆင်ဖို့ အချက်အလက်တွေ ဘာမှမပြင်ဘဲနဲ့ ဒီအတိုင်းပါလာတော့ အဲဒီမှာ ကျနော်တို့က သဘောတူညီချက်ကို ချိုးဖောက်ခံရတယ်လို့ ခံစားရတာ အဲဒီအချက်ပါ။

ဦးသန်းလွင်ထွန်း ။ ။ ဟုတ်တယ်လေ။ ဒါပေမဲ့ ဒီလို ဦးမြင့်ကျော်တို့ ပြောပြနေတဲ့ ကန့်ကွက်တယ်၊ ထောက်ပြတယ်ဆိုတဲ့ အချက်တွေက အခုမှ အတည်ပြုပြီးမှ ထောက်ပြတာမှမဟုတ်တာ။ အစောပိုင်းတုန်းကလည်း မီဒီယာအင်တာဗျူးတွေမှာ လူသိရှင်ကြား ထောက်ပြနေတာပဲ။ ဒါပေမဲ့ လွှတ်တော်တွင်းမှာ အတည်ပြုပေးပါတယ်ဆိုတဲ့ လွှတ်တော်အမတ်တွေက ဒီကိစ္စကို သတိမပြုဘဲနဲ့ အတည်ပြုပေးလိုက်တယ် ဆိုတာကတော့ နောက်ပိုင်းမှာ နောက်ကြောင်းပြန်လို့ရတဲ့ ကိစ္စကော ဖြစ်နိုင်မှာတော့မလား။ ဦးရွှေမန်းကတော့ ဒီကိစ္စက ပြန်ပြီးတော့ စဉ်းစားနိုင်ပါတယ်ဆိုပြီးတော့ ပြောပေမယ့်လည်း ဒါမျိုးက ဖြစ်သင့်တယ်ကိစ္စလို့ ယူဆသလား။

ဦးမြင့်ကျော် ။ ။ ဒါမျိုးကတော့ လွှတ်တော်အမတ်တွေ၊ လွှတ်တော်ကိုယ်စားလှယ်တွေပိုင်းရဲ့ အောက်ခြေမှာ ဘာတွေဖြစ်နေတယ်။ လူတွေကြားထဲမှာ ဘာဖြစ်နေလဲ။ သူ့နယ်ပယ်ထဲမှာ ဘာတွေဖြစ်နေသလဲဆိုတာကို လုံလုံလောက်လောက် နားထောင်ဖို့ နည်းနည်းလေး အားနည်းခဲ့တယ်လို့ ကျနော်တော့ ထင်ပါတယ်။ ဥပမာဆိုပါစို့ လွှတ်တော်အမတ်အားလုံးကတော့ မီဒီယာအကြောင်း သိချင်မှသိမယ်။ လွှတ်တော်အမတ်အားလုံးက လယ်ယာမြေဥပဒေအကြောင်း သိချင်မှသိမယ်။ သို့ပေမယ့် မီဒီယာနဲ့ ပတ်သက်လို့ ပါတီတခုမှာ သူ့ဘာသာ တာဝန်ခွဲဝေမှုရှိပြီးတော့၊ စောင့်ကြည့်ပြီးတော့ လေ့လာနေဖို့တော့ လိုမယ်ထင်ပါတယ်။ အခု ဒီကိစ္စမှာ ဒီလိုတွေ မှတ်ပုံတင်ခြင်းပေါ့။ လိုင်စင်ကိစ္စမျိုးကို ပြောထားတယ်ဆိုတဲ့ဟာမျိုးကို အဲဒီဟာတွေလည်း မီဒီယာတွေမှာ ပါခဲ့တာတွေရှိတယ်။ နောက်တော့ အဲဒီဟာမျိုးကို ပြန်ကြားရေးကို စာပို့ထားတာတွေရှိတယ်။ မီဒီယာမှာ ပြောတာတွေရှိတယ်။ အဲဒါမျိုးကို လွှတ်တော်မှာ ဆွေးနွေးဖို့ ဝေတဲ့အခါမျိုးမှာ ဒီအချက်ကို ဆွေးနွေးတဲ့လူတွေက အဓိက မဆွေးနွေးကြဘူးဆိုတဲ့ဟာက လွှတ်တော်အမတ်ပိုင်းတွေမှာလည်း အားနည်းတယ်။ ဘယ်ပါတီရယ်လို့တော့ မဟုတ်ဘူး။ တခြားဆွေးနွေးတဲ့ တခြားအကြောင်းအရာတွေ ဖြစ်နေကြတယ်။

ဦးသန်းလွင်ထွန်း ။ ။ အဲဒီတော့ စာနယ်ဇင်းမီဒီယာသမားတွေရဲ့ စာနယ်ဇင်းကောင်စီအပိုင်းကရော လုံလောက်တဲ့ သတင်းအချက်အလက်တွေ၊ လိုက်ပြီးတော့ ဖြန့်ဖြူးပေးတာ၊ လှုံဆော်ပေးတာတွေ လုပ်ခဲ့ရဲ့လား။

ဦးမြင့်ကျော် ။ ။ အဲဒီအပိုင်းမှာတော့ ကျနော်တို့က ကော်မတီတွေနဲ့ တွေ့တယ်။ ဘယ်လိုပြောမလဲ လွှတ်တော်အမတ်တိုင်းကိုတော့ အဲဒီအချက်အလက်တွေ ဖြန့်ဝေပေးတာတို့ ဘာတို့တော့ မရှိခဲ့ဘူး။ သို့ပေမယ့် လွှတ်တော်ပြန်မစခင် ရက်ပိုင်းအလိုမှာ အားကစားနဲ့ ပြည်သူ့ဆက်ဆံရေး သူရဦးဝင်းမြင့်တို့ ကော်မတီနဲ့ တွေ့တယ်။ နောက် အဲဒီမှာပဲ ဥပဒေကြမ်း ကော်မတီ အတွင်းရေးမှူးလည်းပါတယ်။ အဲဒီ တွေ့ဆုံတဲ့အပိုင်းမှာ တော်တော်များများတော့ ပြည့်ပြည့်စုံစုံ ကျနော်တို့ လိုချင်တဲ့ အချက်အလက်တွေကို ထောက်ပြပြီး ကျနော်တို့ ပြောခဲ့တယ်။ အဲဒါကတော့ စာနယ်ဇင်းကောင်စီနဲ့ အဲဒီကော်မတီနဲ့ တွေ့တာပဲ။ တခြား ဘယ်သူမှ မပါဘူး။ ဆိုတော့ ကျနော်တို့ စိတ်ထဲမှာတော့ လွှတ်တော်ကော်မတီကလည်း ဒီဘက်က ကျနော်တို့ လိုလားချက်တွေကို တော်တော်လေး နားလည်းသဘောပေါက်ပြီလို့ ကျနော်တို့ ယူဆတယ်။ အမတ်တိုင်း၊ ပါတီတိုင်းကိုတော့ အဲဒီလိုမျိုး အချက်အလက်တွေ ပေးပို့တာတို့ မလုပ်ခဲ့ဘူး။ အဲဒါတော့ မှန်ပါတယ်။

ဦးသန်းလွင်ထွန်း ။ ။ အခု မကြာခင်မှာ ဦးမြင့်ကျော်တို့ရဲ့ စာနယ်ဇင်းကောင်စီကနေ သတင်းမီဒီယာ ဥပဒေမူကြမ်း ရေးဆွဲပြီးတော့ တင်သွင်းတော့မယ်ဆိုရင်ကော အဲဒီအချက်အလက်တွေက ပြန်ကြားရေးဝန်ကြီးဌာနရဲ့ လိုလားချက်တွေနဲ့ ကိုက်ညီပါ့မလား။ ဘယ်လို ညှိနှိုင်းဖို့ ရှိသလဲ။

ဦးမြင့်ကျော် ။ ။ သူတို့က မေလ၊ ဧပြီလထဲမှာ ပြန်ကြားရေးဝန်ကြီးဌာနနဲ့ (၃) ကြိမ် စာနယ်ဇင်းကောင်စီနဲ့ တွေ့တဲ့အချိန်မှာ သူတို့က ပုံနှိပ်ခြင်း နဲ့ ထုတ်ဝေခြင်း ဥပဒေမှာ အဲဒီလို အချက်အလက်တွေ ပြင်ဆင်ပေးဖို့၊ ပြင်ဆင်ပြီး ပြန်တင်ပေးဖို့ သဘောတူထားတယ်ဆိုတော့ ကျနော်တို့က သတင်းမီဒီယာ ဥပဒေထဲက အဲဒီ ပုံနှိပ်နဲ့ထုတ်ဝေအပိုင်းကို အဲဒီအခန်း၊ အပိုဒ်တွေကို ထုတ်ပယ်လိုက်တယ်။ ဒါက နှစ်ဖက်သဘောတူညီပြီးတော့ သူတို့ကလည်း ဒီဟာကို ပြန်ပြီးတော့ တင်မယ်။ ကျနော်တို့လည်း တင်၊ သူတို့လည်း တင်။ လွှတ်တော်က ဒီဥပဒေနှစ်ခုကို ပေါင်းပြီးတော့ပဲ လုပ်မလား စသဖြင့် အဲဒီ ဥပဒေနှစ်ခုထဲကဟာကို ဘယ်ဟာတွေ တခုနဲ့တခု ပဋိပက္ခ ဖြစ်တဲ့ဟာတွေ၊ လွှတ်တော်ကော်မတီတွေ၊ လွှတ်တော်အမတ်တွေ၊ ကိုယ်စားလှယ်တွေက အဲဒီဟာတွေကို ဆွေးနွေးပြီးတော့ လုပ်မလားလို့ အဲဒီလိုမျိုး ကျနော်တို့ ယူဆထားတယ်။ ဆိုတော့ ကျနော်တို့ သတင်းမီဒီယာ ဥပဒေ မူကြမ်း - အဲဒီဟာမှာတော့ ပုံနှိပ်နဲ့ ထုတ်ဝေတဲ့အပိုင်းက ထုတ်ထားပြီးသာဖြစ်သွားပြီ။

ဦးသန်းလွင်ထွန်း ။ ။ အဲဒီတော့ အခု လွှတ်တော်က အတည်ပြုပြီထား ပုံနှိပ်နဲ့ ထုတ်ဝေရေး ဥပဒေမူကြမ်းကို ပြန်လည်ပြီး ဆွေးနွေးဖို့ အလားအလာ ရှိတယ်လို့ ယူဆသလား။ တကယ်လို့များ ပြန်လည်းဆွေးနွေးဖြစ်မယ်ဆိုလို့ရှိရင် ဘာတွေများ လိုလားချက်တွေ ရှိသလဲ။

ဦးမြင့်ကျော် ။ ။ ပြန်လည်ဆွေးနွေးဖို့ အလားအလာတော့ရှိတယ်လို့ ကျနော် ထင်ပါတယ်။ အမျိုးသားလွှတ်တော်မှာ ဆွေးနွေးလိမ့်မယ်။ အမျိုးသားလွှတ်တော်က ပြည်သူ့လွှတ်တော်ကို ပြန်ချပေးတာမျိုးလည်း ဖြစ်နိုင်တယ်။ ဆိုတော့ ပြန်ဆွေးနွေးမယ်လို့ထင်တယ်။ နောက် သူတို့ဘက်ကလည်း အခု မြန်မာဂျာနယ်လစ်ကွန်ရက်တို့လိုမျိုး၊ စာနယ်ဇင်းကောင်စီလိုမျိုး၊ သတင်းစာဆရာ အဖွဲ့အစည်းတွေကို ဘာတွေလိုလားတယ်ဆိုတာတွေကို လွှတ်တော်ကို ပေးပို့ဖို့လိုတယ်လို့ သူရဦးရွှေမန်းက ပြောထားတယ်ဆိုတော့ ဒီဟာတွေက ဒီအချိန်မှာ အဲဒီအချက်အလက်တွေ ထပ်ပြီးတော့ ထပ်ပေးပါမယ်။ စာနယ်ဇင်းကောင်စီကလည်း ပြီးခဲ့တဲ့ သတင်းတပတ်လောက်ကတည်းက အဲဒီလို ရှင်းပြတဲ့အချက်အလက်၊ စာတွေ အားလုံးကို အစုံလိုက်လုပ်ပြီးတော့ ကော်မတီတွေကို ပေးပို့ထားပြီးပါပြီ။ လွှတ်တော်ဥက္ကဋ္ဌတွေကိုလည်း ပေးပို့ထားပြီးပြီ။

ဦးသန်းလွင်ထွန်း ။ ။ မြန်မာစာနယ်ဇင်းကောင်စီ နဲ့ သတင်းမီဒီယာကွန်ရက် အဖွဲ့ဝင် ဦးမြင့်ကျော် ကို ဆက်သွယ်မေးမြန်းခဲ့တာပါ။