ကမ္ဘာ့စီးပွားရေးအင်အားကြီး ၇ နိုင်ငံရဲ့ G7 ထိပ်သီးစည်းဝေးပွဲတက်ရောက်ဖို့ အမေရိကန်သမ္မတ Joe Biden ဟာ ဂျပန်နိုင်ငံမှာ ရောက်ရှိနေပါတယ်။ G7 ထိပ်သီးစည်းဝေးပွဲကျင်းပမယ့် Hiroshima မြို့မှာ ဂျပန်ဝန်ကြီးချုပ် Fumio Kishida နဲ့ ဒီနေ့ တွေ့ဆုံပြီး ၂ နိုင်ငံကိစ္စရပ်တွေ ဆွေးနွေးခဲ့ကြပါတယ်။
ယူကရိန်းနိုင်ငံအပေါ် ထောက်ခံရေး၊ ရုရှားရဲ့ စစ်ရေးရန်လိုမှုအတွက် တာဝန်ခံနိုင်ရေးတို့လို ဘုံတန်ဖိုးထားတဲ့ ကိစ္စတွေမှာ အမေရိကန်နဲ့ ဂျပန် အတူရပ်တည်နေတယ်လို့ သမ္မတ Biden က ဝန်ကြီးချုပ် Kishida ကိုပြောကြားသွားပါတယ်။ Nuclear လက်နက် မပြန့်ပွားရေး၊ အင်ဒိုပိစိဖိတ်ဒေသ လွတ်လပ်မျှတရေးအတွက် ကတိပြုထားတာကိုလည်း သမ္မတ Biden ကပြောကြားပါတယ်။
နိုင်ငံတကာမှာ စည်းမျဉ်း ဥပဒေတွေအပေါ် အခြေခံပြီး လွတ်လပ် မျှတမှုရှိရေး ဂျပန်နဲ့ အမေရိကန်တို့က ဆောင်ရွက်နေတယ်ဆိုတာ G7 ထိပ်သီးဆွေးနွေးပွဲမှာ ပြသမှာဖြစ်တယ်လို့ ဂျပန်ဝန်ကြီးချုပ် Kishida ကပြောကြားခဲ့ပါတယ်။ ဒီ ၂ နိုင်ငံအပြင် ကနေဒါ၊ ပြင်သစ်၊ ဂျာမနီ၊ အီတလီ၊ ဗြိတိန်နဲ့ EU ဥရောပသမဂ္ဂတို့ပါဝင်တဲ့ G7 ထိပ်သီးဆွေးနွေးပွဲကျရင် ယူကရိန်းကို ရုရှားကျူးကျော်တိုက်နေတဲ့ စစ်ပွဲကိစ္စအပြင် တရုတ်က ကုန်သွယ်ရေးနဲ့ ရင်းနှီးမြှပ်နှံမှုဆိုင်ရာ ကန့်သတ်ချက်လုပ်နေတာတွေ၊ ဒဏ်ခတ် ပိတ်ဆို့မှုတွေအကြောင်းကိုလည်း အဓိကထား ဆွေးနွေးကြမှာဖြစ်ပါတယ်။ G7 အဖွဲ့ဝင်နိုင်ငံတွေက တရုတ်ကို ကျွမ်းကျင်နည်းပညာတင်ပို့မှုနဲ့ ရင်းနှီးမြှပ်နှံမှု ကန့်သတ်ချက်တွေလုပ်ပြီး အရေးယူဖို့ အလားအလာလည်း ရှိနေပါတယ်။
