မီဒီယာသူဌေးကြီး မားဒေါ့ အသက် ၉၂ မှာ စေ့စပ်

အမေရိကန် Fox သတင်းဌာန နဲ့ News Corp ကုမ္ပဏီဥက္ကဌဟောင်း Rupert Murdoch ရုပတ်မားဒေါ့ဟာ သူ့ချစ်သူ Elena Zhukova အလိန်းနား ဇက်ကိုဗာနဲ့ စေ့စပ်လိုက်ပါတယ်။ သူ့တို့မင်္ဂလာပွဲကို ကယ်လီဖိုးနီးပြည်နယ်က မားဒေါ့ပိုင် Moraga မရာဂါ စပျစ်ခြံကြီးထဲမှာ ကျင်းပမှာဖြစ်တယ်လို့ မတ်လ ၇ ရက်နေ့ကပဲ ပြောရေးဆိုခွင့်ရှိသူက ကြေညာသွားပါတယ်။

ဒီသတင်းကို ပထမဆုံးတင်ပြတဲ့ နယူးယောက်တိုင်းမ်စ် သတင်းစာမှာတော့ သူ့ရဲ့ သတို့သမီးလောင်းဟာ ရုရှားနိုင်ငံက အသက် ၆၇ နှစ်အရွယ် အငြိမ်းစားသိပ္ပံပညာရှင် ဖြစ်တယ်လို့ ဖော်ပြထားပါတယ်။ သူက မော်လီကျူးဆိုင်ရာ ဇီဝဗေဒပညာရှင် ဖြစ်ပြီး အသက် ၉၂ နှစ်အရွယ် မားဒေါ့နဲ့ မနှစ်က နွေရာသီမှာ စပြီး တွဲခဲ့ကြတာပါ။

အမေရိကန်သတင်းတွေမှာတော့ သူတို့ ၂ ဦး လာမယ့်နွေရာသီ ဇွန်လမှာ မင်္ဂလာဆောင်မယ်လို့ ရေးနေပါတယ်။ သူ‌ဌေးကြီး မားဒေါ့အနေနဲ့ အခုလို ထိမ်းမြားတာ ဒါနဲ့ဆို ၅ ကြိမ်မြောက်ဖြစ်ပြီး၊ စေ့စပ်တာကတော့ ၆ ခါ ရှိပါပြီ။

အလိန်းနား ဇက်ကိုဗာကတော့ အရင်အိမ်ထောင်ရှိခဲ့ပြီး သူ့ခင်ပွန်းဟောင်းက ကုဋေကြွယ်သူဌေး အလက်စ်ဇန်းဒါး ဇက်ကိုဗာဖြစ်ပါတယ်။

ရုပတ်မားဒေါ့ဟာ သူ့အလုပ်တာဝန်တွေကနေ မနှစ်က စက်တင်ဘာကျမှ အနားယူလိုက်တာဖြစ်လို့ သူ့ရဲ့ နှစ် ၇၀ တာ ကာလရှည်တလျှောက် သတင်းမီဒီယာလုပ်ငန်းရှင်ဘဝကို အောင်အောင်မြင်မြင် နိဂုံးချုပ်ခဲ့တာ ဖြစ်ပါတယ်။