မြန်မာနိုင်ငံမှာ စက်သုံးဆီ ပြတ်လပ်နေတဲ့သတင်းတွေ မှန်ကန်မှုမရှိကြောင်း စစ်ကောင်စီပြောခွင့်ရ ဗိုလ်ချုပ် ဇော်မင်းထွန်းက ဒီကနေ့ တုံ့ပြန်ပြောဆိုလိုက်ပါတယ်။
စက်သုံးဆီတွေ ပြည်တွင်းမှာ အလုံအလောက်ရှိနေကြောင်းနဲ့ ပုံမှန်ခွဲတမ်းအတိုင်း ထုတ်ပေးနေကြောင်း စစ်ကောင်စီ ပြန်ကြားရေးအဖွဲ့ကနေ သတင်းမီဒီယာတွေကို ပေးပို့တဲ့ အသံဖိုင်မှာ ဗိုလ်ချုပ်ဇော်မင်းထွန်းက ပြောထားပါတယ်။
"ဆီခွဲတမ်းများနဲ့ပတ်သတ်ပြီး ယခင်အတိုင်းပဲဖြစ်တယ်။ ကျွန်တော်တို့စိစစ်တာတခုပဲရှိတယ်။ ယခင်အတိုင်းပဲဖြစ်တယ်။ လျှော့ပြီးလုပ်ပေးတာမရှိဘူး။ နံပါတ် ၂ ကတော့ ပြည်တွင်းမှာ စက်သုံးဆီ အလုံအလောက်ရှိပါတယ်။ အများသုံးနေတဲ့ စက်သုံးဆီဖြစ်တဲ့ 92 ဆိုရင် ပြည်တွင်းလက်ကျန် ဂါလံ ၁၃ သန်းကျော်ရှိပြီးဖြစ်တယ်။ ဒီဇယ်ဆိုရင် ဂါလံ သန်း ၃၀ ကျော်ရှိပြီးဖြစ်တယ်။ ပြီးရင်ကျွန်တော်တို့ ထပ်မံရောက်ရှိလာမဲ့ ဆီတင်သင်္ဘော ၁၅ စီးနီးပါးရှိပါတယ်။ "
ဒါအပြင် မည်သည့်စက်သုံးဆီမဆို တလ အရံရှိအောင် အမြဲတမ်းဆောင်ရွက်နေကြောင်းလည်း ဗိုလ်ချုပ်ဇော်မင်းထွန်းက ပြောပါတယ်။
စက်သုံးဆီခွဲတမ်းတွေလျော့ချတာ၊ ဆီဝယ်ယူဖို့အတွက် အစိုးရဘက်က ဒေါ်လာငွေ မချပေးဘူးဆိုတဲ့သတင်းတွေဟာ မှန်ကန်ခြင်းမရှိပဲ ကောလဟာလသတင်းတွေသာဖြစ်တယ်လို့ ဗိုလ်ချုပ်ဇော်မင်းထွန်းက ပြောသွားပါတယ်။
ဒါပေမဲ့လည်း စက်သုံးဆီအရောင်းဆိုင်တွေအတွက် လိုအပ်တဲ့ဆီတွေကို စစ်ကောင်စီက ပုံမှန်ခွဲတမ်းထက် ၈၀% ကျော် လျှော့ချလိုက်တဲ့အတွက် အဓိကစီးပွားရေး အချက်အခြာမြို့ဖြစ်တဲ့ ရန်ကုန်နဲ့ တခြား မြို့တွေမှာ အခုလို ဆီပြတ်လပ်မှုနဲ့ ရင်ဆိုင်နေရတာလို့ ပြည်တွင်းသတင်းတချို့မှာ ရေးသား ဖော်ပြခဲ့ကြတာပါ။
ရန်ကုန်မြို့မှာဆိုရင် ပြီးခဲ့တဲ့ ဗုဒ္ဓဟူးနေ့လောက်ထဲကစလို့ စက်သုံးဆီအရောင်းဆိုင်တချို့မှာ ဝယ်ယူနိုင်ဖို့ ကားတွေစောင့် ဆိုင်းနေတာ မြင်ရတယ်လို့ ရန်ကုန်မြို့ခံတွေက ပြောပါတယ်။ စက်သုံးဆီ အရောင်းဆိုင်အတော်များများကလည်း ကျပ်တသောင်းဖိုးသာ အကန့်အသတ်နဲ့ ရောင်းချပေးနေတယ်လို့ ရန်ကုန်မြို့ခံတွေက ပြောပါတယ်။
