တရုတ် ပိုင်နက် နယ်မြေ ကတဆင့် မြောက်ကိုရီးယား ကနေ အမေရိကန် စစ်သား Travis King ထွက်ခွါဖို့ ခွင့်ပြုခဲ့တဲ့အတွက် အမေရိကန် သမ္မတ အိမ်ဖြူတော် က တရုတ် အစိုးရ နဲ့ ဆွီဒင် အစိုးရတို့ကို ဗုဒ္ဓဟူးနေ့ က ကျေးဇူးတင်စကား ပြောလိုက်ပါတယ်။
အမေရိကန် စစ်တပ် က တပ်သား ထရာဗစ် ကင်း Travis King မြောက်ကိုရီးယား ကနေ တရုတ် က တဆင့် ထွက်ခွါရာမှာ လွယ်ကူချောမွေ့အောင် ကူညီခဲ့တဲ့အတွက် တရုတ် ပြည်သူ့ သမ္မတ နိုင်ငံ အစိုးရ ကို ကျွန်တော်တို့ ကျေးဇူးတင်ရှိပါတယ်လို့ အမေရိကန် အမျိုးသား လုံခြုံရေး အကြံပေး ဂျိတ်ဆူလီဗန် Jake Sullivan က ကြေညာချက် မှာ ပြောပါတယ်။ TRAVIS KING ဟာ ခု အခါမှာတော့ တောင်ကိုရီးယား မှာ ရှိတဲ့ အမေရိကန် စစ်စခန်းကနေ အမေရိကန် နိုင်ငံ ကို ပြန်လာနေပြီ ဖြစ်တယ်လို့ အမေရိကန် နိုင်ငံခြားရေး ဝန်ကြီးဌာန ပြောရေးဆိုခွင့်ရှိသူ မက်သယူး မီလ်လာ Matthew Miller က ဗုဒ္ဓဟူးနေ့ က ပြောပါတယ်။
ဗုဒ္ဓဟူးနေ့ အစောပိုင်းမှာ ဆွီဒင်တာဝန်ရှိသူတွေ က အမေရိကန် စစ်သား ထရာဗစ် ကင်း Travis King ကို မြောက်ကိုရီးယား နဲ့ တရုတ် နယ်စပ် ကို ခေါ်ဆောင်လာခဲ့ကြတာပါ။ နယ်စပ် ကို တရုတ်နိုင်ငံဆိုင်ရာ အမေရိကန် သံအမတ်ကြီး နီကိုလာ့စ်ဘန်း Nicholas Burns, တရုတ်နိုင်ငံဆိုင်ရာ ဆွီဒင် သံအမတ်ကြီး နဲ့ အမေရိကန် ကာကွယ်ရေး ဝန်ကြီးဌာန က အနည်းဆုံး အရာရှိတစ်ယောက် တို့ က လာရောက်ခေါ်ဆောင်ကြတာပါ။ တရုတ်ပြည်ကနေ ထရာဗစ် ကင်း Travis King ကို တောင်ကိုရီးယား စစ်စခန်း က တဆင့် အမေရိကန် ကို ပြန်ခေါင်ဆောင်ခဲ့ကြတာဖြစ်ပါတယ်။
