၂၀၁၈ ခုနှစ်ကုန်ဆုံးလို့ ၂၀၁၉ ခုနှစ်ကို ကူးပြောင်းခါနီး အခါသမယမှာ ဗွီအိုအေပရိသတ်များနဲ့ မြန်မာနိုင်ငံသူ နိုင်ငံသားအားလုံးအတွက် မြန်မာနိုင်ငံ အဓိက ဘာသာကြီးလေးခုမှ ပုဂ္ဂိုလ်ကြီးများရဲ့ နှစ်သစ်ဆုတောင်းစကားများကို ဗွီအိုအေက စုစည်း တင်ဆက်ပေးလိုက်ပါတယ်။
ရန်ကုန် ကက်သလစ် ဂိုဏ်းချုပ်ဆရာတော်ကြီး ကာဒီနယ်ချားလ်စ်ဘို ၊ မြန်မာနိုင်ငံလုံးဆိုင်ရာ ဟိန္ဒူဗဟိုအဖွဲ့ချုပ် ဦး နန္ဒ ၊ တိပိဋကသြဝါဒစရိယက ဒေါက်တာဘဒ္ဒန ္တအင်္ဂ ိသ နဲ့ ဘာသာပေါင်းစုံ ငြိမ်းချမ်းရေး(ငြိမ်းချမ်းမေတ္တာ)အဖွဲ့ဝင် ဦးအေးလွင် တို့က နှစ်သစ်စကားပါးထားတာကို နားဆင်ရအောင်ပါ။
ရန်ကုန် ကက်သလစ် ဂိုဏ်းချုပ်ဆရာတော်ကြီး ကာဒီနယ်ချားလ်စ်ဘိုက
အားလုံး မင်္ဂလာပါ ကျနော့်အနေနဲ့ မြန်မာပြည်မှာ မှီတင်းနေထိုင်ကြသော ညီအကို မောင်နှမများအားလုံးကို ၂၀၁၈ ခုနှစ် နှစ်ဟောင်းပြီးဆုံးပြီးတဲ့နောက် ၂၀၁၉ ခုနှစ် နှစ်သစ်ကို ကူးပြောင်းနေကြပါတယ်။ နှစ်ဟောင်းမှာ အဆင်မပြေမှုများ ရှိခဲ့သလို၊ အဆင်မပြေမှုအခက်အခဲများလည်း ကျနော်တု့ိ ဖြတ်သန်းခဲ့ရပါတယ်။ ဒါပေမယ့် ဒီတပတ် ရက်အတွင်းမှာပဲ ကျနော်တို့ ကောင်းမွန်တဲ့သတင်း နှစ်သစ် သတင်းကောင်းအနေနဲ့ တပ်မတော်ကိုယ်တိုင် ထုတ်တဲ့သတင်းကို ရရှိတဲ့အခါမှာ ကျနော်တို့ ဝမ်းသာဝမ်းမြောက်ကြပါတယ်။ ၄ လ ပစ်ခတ်မှုတွေ ရပ်စဲပြီးတဲ့နောက် ငြိမ်းချမ်းရေးခရီးလစ်းစဉ်ကို သွားမယ်ဆိုတဲ့သတင်းဟာ နှစ်သစ်အတွက် သတင်းကောင်းဖြစ်ပါတယ်။ ၂၀၁၉ ခုနှစ်မှာ နှစ်သစ်ကို စိတ်သစ် ကိုယ်သစ် ၊ ယုံကြည်မှု အသစ်နဲ့ ကျနော်တို့ စဖို့ရန်အတွက် အထူးဆုတောင်းပါတယ်၊ မေတ္တာ ပို့သပါတယ်။ အတိတ်က ဖြစ်ခဲ့တဲ့ အနာဟောင်းတွေ ၊ အဆင်မပြေမှုတွေကို မေ့ပြီးတော့ နှစ်သစ်ကို စိတ်သစ် ကိုယ်သစ် ၊ ယုံကြည်မှု အသစ်နဲ့ ခရီးလမ်းကို လျောက်ကြဖို့ရန်အတွက် အစိုးရသော်လည်းကောင်း၊ တပ်မတော် ကိုသော်လည်းကောင်း၊ လက်နက်ကိုင်အဖွဲ့များကို သော်လည်းကောင်း၊ မြန်မာပြည်တပြည်လုံးကို ကျနော့်အနေနဲ့ မေတ္တာရပ်ခံရင်းနဲ့ နှစ်လုံးသားတိုင်းထဲမှာ မိသားစုတိုင်းထဲမှာ တပြည်လုံးမှာ အေးချမ်းသာယာသော ၂၀၁၉ ခုနှစ်ဖြစ်ပါစေလို့ အထူးဆုမွန်ကောင်းတောင်း မင်္ဂလာနှတ်ခွန်းဆက်လိုက်ပါတယ် အားလုံးကို ကျေးဇူးတင်ပါတယ်။ I wish all a very Happy New Year
မြန်မာနိုင်ငံလုံးဆိုင်ရာ ဟိန္ဒူဗဟိုအဖွဲ့ချုပ် ဦး နန္ဒ က
“ နိုင်ငံတော်က လုပ်ဆောင် နေတဲ့ ငြိမ်းချမ်းရေး ၂၁ ရာစုပင်လုံညီလာခံ အမြန်ဆုံးပြီး မြောက်အောင်မြင်နိုင်ပါစေ။ မြန်မာပြည်သားအားလုံး တနယ်မှ မကျန်အားလုံး ငြိမ်းငြိမ်းချမ်းချမ်းနဲ့ ကိုယ့်ပြည်နယ် ကိုယ့်မြို့က အေးအေးချမ်းချမ်းနဲ့ တိုးတက်နိုင်ပါစေလို့ ဆုတောင်းချင်ပါတယ်။
တိပိဋကသြဝါဒစရိယက ဒေါက်တာဘဒ္ဒန ္တအင်္ဂ ိသ က တော့
“ အဲဒီတော့ ဘယ်ဘာသာမျိုးမဆို ခုနပြောသွားတဲ့ ဗုဒ္ဒဘာသာ တို့ ဟိန္ဒူဘာသာတို့ မွတ်ဆလင်ဘာသာတို့ အစ္စလာမ်ဘာသာတို့ ခရစ်ယာန်ဘာသာတို့ အကုန်လုံးဟာ သစ္စာတရားရှိကြတဲ့လူတွေနဲ့ ပဲ ။ အဲဒီ သစ္စာတရားကို အသုံးချတတ်ဖို့ အရေးကြီးပါတယ်။ နောက်ပြီး သစ္စာတရားကို လက်ကိုင်ထားပြီးတော့ နိုင်ငံသားတွေအကုန်လုံးပေါ့လေ ဘာသာတရားတွေ ကမ္ဘာမြေပေါ်မှာ အတူတကွ ဖန်ဆင်းပေးလိုက်တာကိုယ်က ညီလိုအကိုလို ဆွေမျိုးသားချင်းလိုဖြစ်အောင် လုပ်ပေးလိုက်တာပဲ။ ညီလိုအကိုလို ဆွေမျိုးသားချင်းလိုဖြစ်အောင် လုပ်ပေးလိုက်တာ ကိုက တို့ ပရိတ်သတ်က ဘာသာရေးသမားတွေက အကုန်လုံးကို လိုက်နာပြီးတော့ သစ္စာရှိကြမယ်ဆိုရင် ဒီကမ္ဘာကြီးဟာ ငြိမ်းချမ်းတဲ့ ကမ္ဘာကြီး ဖြစ်သွားမှာပဲ ။ တဦးနဲ့ တဦး ချစ်ခင်နှစ်သက်ပြီးတော့ နေသွားမယ်ဆိုရင် ငြိမ်းချမ်းရေးအခွင့်အလမ်းတွေ အများကြီးရှိတာပေါ့နော်။ ငြိမ်းချမ်းရေးအခွင့်အလမ်းတွေ ပွင့်လာအောင် မေတ္တာတရား ဂရုဏာတရား မုဒိတာတရား ဥပက္ခာတရား တွေထားပြီးတော့ ဆောင်ရွက်ကြပါလို့ ဘုန်းကြီးက တိုက်တွန်းပါတယ်။ အဲဒီတော့ မေတ္တာတရား ရှိမှ ချမ်းသာမှာပါ၊ ချမ်းသာမှ လူ့သက်တမ်းစေ့နေနိုင်ကြမှာပါ။ ဒါကြောင့် အားလုံးသော ကမ္ဘာသူ ကမ္ဘာသားအပေါင်းတွေ တညီတညွှတ်ထဲနဲ့ ဆန္ဒတခုတည်းနဲ့ ညီမျှအောင်လုပ်ပြီးတော့ တည်တည်ငြိမ်ငြိမ်နဲ့ ကြီးပွားတဲ့ ပုဂ္ဂိုလ် တွေဖြစ်ကြပါစေလို့ ဘုန်းကြီး ဆုတောင်းပါတယ်။”
ဘာသာပေါင်းစုံ ငြိမ်းချမ်းရေး(ငြိမ်းချမ်းမေတ္တာ)အဖွဲ့ဝင် ဦးအေးလွင်
“ဒီ ၂၀၁၉ နှစ်သစ်မှာ အားလုံးမြန်မာနိုင်ငံမှာ ရှိတဲ့ ပုဂ္ဂိုလ် တွေရော ကမ္ဘာအဝှမ်းမှာရှိတဲ့ပုဂ္ဂိုလ် တွေရော အားလုံး နှစ်လုံးစိတ်ဝှမ်း အေးချမ်းပြီးတော့ ငြိမ်းချမ်းသာယာပါစေလို့ ကျနော့်အနေနဲ့ မေတ္တာပို့ ဆုတောင်းပါတယ်။ဟောင်းတိုင်း မကောင်းတာတော့မဟုတ်ဘူး။ ပြောင်းရမယ့်အဟောင်းတွေတော့ရှိတယ် ဒါပေမယ့်လည်း စံထားအပ်တဲ့ ကောင်းတဲ့အဟောင်းတွေရှိပါတယ်။ အဲလို ကောင်းတဲ့ အစဉ်အလာတွေကို ဆက်လက်ထိန်းသိမ်းပြီးတော့ ပြုပြင်သင့် ပြောင်းလဲသင့်တဲ့ ဟာတွေကို ပြောင်းလဲပြီးတော့ နှစ်သစ်မှာ စိတ်သစ် ကိုယ်သစ်နဲ့ ကျနော်တို့သည် အခွင့်အရေးသစ်တွေကို လက်လှမ်းပြီးတော့ ယူရမယ် စိန်ခေါ်ချက်တွေကို ရှိသလို အခွင့်အရေးတွေလည်းရှိပါတယ်။ စိန်ခေါ်ချက်တွေကို အခွင့်အရေးအဖြစ် ပြောင်းလဲပစ်နိုင်ခြင်းသည် အရည်အချင်းတခုဖြစ်ပါတယ်။ လူ့လောကဆိုတာ ပြဿနာနဲ့ မကင်းပါဘူး။ အဲဒီတော့ လူလုပ်တဲ့ အန္တရာယ်များ ကို လူသားဟာ ဖြေရှင်းနိုင်မှာ ဖြစ်တဲ့အတွက် မလျော့သော ဇွဲလုံလနဲ့ ကျနော်တို့ဟာ ညီညီညွှတ်ညွတ်နဲ့ ကျနော်တို့ ဦးတည်ချက် ပန်းတိုင်ဖြစ်တဲ့ နှလုံးစိတ်ဝမ်းလည်းအေးချမ်းရမယ်၊ ပတ်ဝန်းကျင်လည်း အေးချမ်းရမယ် ဆိုတာ ငြိမ်းချမ်းရေးပန်းတိုင်ကို အားလုံး တက်ညီလက်ညီ ချီတက်ကြပါစို့လို့ ကျနော် ဆုတောင်းမေတ္တာပို့အပ်ပါတယ်။”
